[Le cinquiesme vice par le quel le deable tempte la personne]

|¹¹² Le cinquiesme vice par le quel le deable tempte la personne estant ou lit de la mort, |¹¹³ principalment ceulx qui sont mondains et mettent leur estudie aux choses temporelles |¹¹⁴ et ne pensent a autre chose en ce monde que a acquerir rentes, heritages, maisons pour enrichir leurs parens, qui sont cause de les faire aller a dampnation. |¹¹⁵ Et, quant il eschiet qu’il leur vient maladie, soit petite ou grande, mesmes en la fin de leurs jours, si ne laissent ilz point a penser a leurs biens et a demander de  leurs affaires. |¹¹⁶ Lors, le deable leur ramentoit : |¹¹⁷ « Tel povre homme te doit de l’argent. |¹¹⁸ Que ne le fais tu contraindre de toy paier ? |¹¹⁹ En endures tu ? » |¹²⁰ Ainsi mainnent les deables [40v] la creature jusques a tant qu’il ait perdu la parole et n’a point aucunes foiz confession, dont c’est pitié. |¹²¹ Et est en grant dangier cil ou celle qui muert en tel estat. |¹²²  C’est grant pitié que pour les biens de ce monde on se vueille dampner. |¹²³ Par aventure, ung jour, aprés sa mort, sera tout son avoir despendu et tout le tresor qu’il avoit amassé sera par autruy entassé.

|¹²⁴ Tel pour autre tresor amasse
|¹²⁵ Qui pour lui mesmes feu embrasse.