|⁷⁴¹ Ensuyvent aucunes autres exhortacions faictes aux mourans.

|⁷⁴² Selon ce que dit le glorieux apostre de Dieu monseigneur saint Pol, |⁷⁴³ Sine fide impossible est placere Deo, |⁷⁴⁴ c’est a dire que « Sans foy, il est impossible de plaire a Dieu ». |⁷⁴⁵ Pour ce, l’ancien ennemy, le dyable d’enfer, ayant congnoissance icelle foy estre la pierre du fondement de l’Eglise et la naissance de toutes vertus, |⁷⁴⁶ il s’efforce de l’impugner et assaillir en moult de merveilleuses manieres, comme par faulses opinions et erronees ymaginacions. |⁷⁴⁷ Et, celuy qu’il ne peut dejecter de la stabilité et fermeté de la foy, touteffois, il se met en fait de le pertroubler sans relache par faulses industries et dolositéz.

|⁷⁴⁸ Par quoy, a ses temptacions et machinacions, il est a obvier et a aller en l’encontre cauteleusement et espirituellement, |⁷⁴⁹ c’est assavoir mettre en nonchaloir toutes les fantasies, ymagnacions, choses erronees plaines de venin, blasphemes et toutes choses veues et ouÿes par sa faulseté et les porter paciamment et esperer fort en la misericorde de Dieu, |⁷⁵⁰ car, comme il est escript, les cogitacions des hommes sont vaines et moult diverses et ainsi comme infnies.

|⁷⁵¹ Pour icelle cause, l’home ne doit point se joindre ne se unir ne arrester ne discuter ne enquerir les causes pour quoy il souffre et soustient telles fantasies et telles eurres impu [d i r]gnantes et bataillantes encontre la foy et toutes bonnes meurs, |⁷⁵² car de tant que aucun s’arreste plus aux choses erronees, c’est a dire plaines d’erreurs dyaboliques et faulses sugestions, en voulant les excecuter et experimenter, tant plus tost se nourrit il en erreur et en ennuy de pensee.

|⁷⁵³ Mais, pourtant, pour telles choses contraires, l’omme ne doit pas oultre mesure enquerir ne blasmer ne celles ymaginacions imputer absolutement et determinement a sa defaulte, |⁷⁵⁴ car c’est temptacion au regard de coupe.

|⁷⁵⁵ Et, pourtant, a tout loyal, la temptacion de ces choses est du tout en tout contre sa voulenté et a luy moult desplaisante |⁷⁵⁶ et, pour ce qu’elle luy est paine, elle ne luy est reputee a aucun pechié |⁷⁵⁷ mais luy est purgacion de son ame, enforcement de pacience, action et effect de humilité, instigacion et esmouvement a esperance de la vie eternelle.

|⁷⁵⁸ Car saint Augustin dit, au livre De Vraie religion : |⁷⁵⁹ Omne enim peccatum est voluntarium et, si non sit voluntarium, non est peccatum, |⁷⁶⁰ c’est a dire que « Tout pechié est voluntaire et, s’il n’est voluntaire, c’est a dire se la voulenté ne s’y consent, ce n’est point pechié ».

|⁷⁶¹ Et, pour ce, dit Isidore : |⁷⁶² Qui, passionibus anime insidiante, adversario cruciatur, non idcirco se credat alienari a Christo, qui talia patitur, sed magis laudet Deum, qui hujus virgule corrigit ipsum ut spiritus salvus fiat, |⁷⁶³ c’est a dire que « L’ame la quelle est tourmentee par les passions de l’esperit adversaire, qui toujours l’espie, ne doit point ymaginer pourtant estre estranger de Jesucrist, s’il seuffre qu’elle les porte, mais le doit plus louer pour ce qu’il la corrige de telle verge affin que son esperit soit sauvé », |⁷⁶⁴ car sachéz de certain que telle passion est reputee pour vertu a celuy qui la porte.

|⁷⁶⁵ Et, combien qu’il soit ainsi qu’on soit ignorant et qu’on ne sache pour quel vice ou pour quelle cause on seuffre ces choses, |⁷⁶⁶ touteffois, Dieu, qui fait son soleil luyre sur les bons et sur les mauvais, le sçait et recommande estre humblement juste et misericordieusement, |⁷⁶⁷ car le dyable ne peut plus tempter les esleus que la voulenté de Dieu le permet.

|⁷⁶⁸ Et, s’il est ainsi que, en nous temptant, il nous sert a nostre prouffit combien qu’il ne le veulle pas, touteffois, sa temptacion sert a l’utilité des saintz, |⁷⁶⁹ car les temptacions les quelles ilz poursuyvent pour [d i v] la perdicion de l’omme, Jesucrist les convertist salutairement en salut et en vertus d’icelluy. |⁷⁷⁰ Et soies certain que jamais nostre adversaire n’est vacant qu’il ne soit toujours prest de grever l’omme en esmouvant vers luy grans assaulx de temptacions |⁷⁷¹ ou par tribulacions de cueur les quelles il luy fait porter ou par douleurs de corps les quelles il luy fait souffrir.

|⁷⁷² En aprés aussi, la force malicieuse des dyables souvent tourmente la pensee du juste de diverses douleurs tant que, aucune fois, il est contraint d’encheoir jusques en desesperacion pour la tres grande angoisse qu’il sent. |⁷⁷³ Mais, quant l’ame demeure en la crainte et amour de Dieu, celle douleur et angoisse luy prouffite moult, |⁷⁷⁴ car, de quelconque maladie ou angoisse de quoy elle soit tourmentee, elle n’est pas pourtant de Dieu separee mais conjointe et en son amour preservee. |⁷⁷⁵ Et, ja soit ce que l’omme juste seuffre en son ame plusieurs choses adverses par l’instigacion et esmouvement du dyable, touteffois, il ne le peut faire perir de la vie eternelle pour toutes ses machinacions, |⁷⁷⁶ car le Seigneur debonnaire ne repute jamais a dampnacion de couppe la chose la quelle il seuffre par la permission de sa divine Majesté, ce qu’il ne voulsist point.

|⁷⁷⁷ Et, pour ce, nous ne pechons point se ce n’est par la couvoitise de nostre desir ou se nous ne flechissons au delict et voluptuosité, |⁷⁷⁸ car ce en quoy nous somes amenéz par violence et contre nostre voulenté nous est seulement paine et misere et non pas couppe ou pechié.

|⁷⁷⁹ Et, pour ce, dit Isodore que |⁷⁸⁰ « Aucune fois, il semble a celuy qui est tempté que telle desloyaulté ou doubte n’est pas petite couppe la quelle il estime par illusion des dyables qui mettent paour avec luy. |⁷⁸¹ Et, combien que telle doubte ne soit point de la foy, la quelle doubte est couppe voluntaire ou au moins ignorance affectee et sans cause la quelle contient plus erreur que verité. |⁷⁸² Et, comme il soit ainsi que foy soit habit de la voulenté, c’est a dire que tu crois par foy et croire c’est croire ou esperer est esperer et non doubter est non doubter.

|⁷⁸³ Pour ce dit l’Apostre : |⁷⁸⁴ Corde creditur ad justiciam, |⁷⁸⁵ c’est a entendre que « Ta voulenté est en ton cueur et, ce que ton cueur croit de bien, il est reputé a justice », |⁷⁸⁶ car en la [d ii r] voulenté la quelle ne peut estre contrainte gist tout le merite ou desmerite, c’est a dire bien ou mal.

|⁷⁸⁷ Touteffois, la pensee est aucune fois obfusquee en telle maniere que aucun ne peut congnoistre sa voulenté, mais, pourtant, on ne se doit troubler, |⁷⁸⁸ car les bonnes œuvres preuvent la voulenté estre bonne et les mauvaises œuvres prouvent la voulenté estre mauvaise. |⁷⁸⁹ Mais, aucune fois, les mauvaises œuvres presument estre bonnes jusques a ce que raisonnablement ilz soient congnues estre mauvaises.

|⁷⁹⁰ Et, s’il advient que celle temptacion devant dicte soit en toy, offrant a ta pensee choses faulses pour vrayes, et qu’elle te trouble continuellement, |⁷⁹¹ tu dois, par maniere de adjuracion et de accersion contraire, exprimer et declairer ta foy par ta bouche encontre la temptacion couverte, cauteleuse et soubtille.

|⁷⁹² Et, se sains iest que ta congnoissance ne s’y consente, il est escript : |⁷⁹³ Ore autem confessio fit ad salutem, |⁷⁹⁴ c’est a dire que « La confession la quelle est faicte de la bouche est au salut ». |⁷⁹⁵ Car, de certain, nul n’est deceu des falaces de l’ennemy adversaire qui deliberement et appertement est trouvé en icelles contrediseur tant en fait qu’en parolle.

|⁷⁹⁶ Et, pourtant donc, l’enemy est moult debile qui ne peut vaincre sy non le voulant et la voulenté deliberee.

|⁷⁹⁷ Non pourtant, nul ne doit en telles choses enquerir le quel voit les ennemys tempter diversement les eslus de Dieu, |⁷⁹⁸ car le dyable congnoit et espie la prompte inclinacion de la complexion d’un chacun. |⁷⁹⁹ Et, celuy qu’il voit trop enrousé d’umeur melencolique, iceluy ennemy le travaille et pertrouble merveilleusement de temptacion espiritelle, |⁸⁰⁰ car, comme les docteurs parlans des choses naturelles dient, la fumee de noire couleur passante jusques au cervel parvient au lieu de la pensee et luy obscurcit et trouble sa lumiere en telle maniere que l’ame ne sçait rien juger ou discerner.

|⁸⁰¹ Telz donc sont tristes et craintifz et, sans cause raisonnable, faitz pusillanimes et de petite courage et maigres de complexion, |⁸⁰² mais, pourtant, celle crainte et tristresse ne leur est pas imputee a couppe, car ce leur est paine et contre leur voulenté. |⁸⁰³ Et souvent sont deceus de dyable, cuidans et ayans en opinions choses faulses estre vrayes, |⁸⁰⁴ car, comme j’ay [d ii v] dit devant, ilz sont empeschéz pour la noire fumee couvrante leur cerveau, c’est a entendre pour leur complexion, |⁸⁰⁵ qu’ilz ne peuent discerner le vray du faulx ne la chose certaine de la chose incertaine. |⁸⁰⁶ Et icelluy auldit ennemy considere l’estat d’un chacun.

|⁸⁰⁷ Et, pour ce, Leon pape dit, en ung sermon de la circoncision Nostre Seigneur : |⁸⁰⁸ Non desinit hostis antiquus decepcionum laqueos ubi licet pretendere et ut fidem credencium quo modo corrumpat instare, |⁸⁰⁹ c’est a dire que « L’ancien ennemy, le dyable d’enfer, ne cesse instamment de tendre ses las de decepcion par tous lieux affin qu’il puisse en aucune maniere corrumpre la foy des creans », |⁸¹⁰ car il congnoit a qui il baille la chaleur de couvoitise, a qui il conseille et enseigne les delectacions de gloutonnie, |⁸¹¹ a qui il met les incitacions et esmouvemens de luxure et a qui il espant le venin d’envye. |⁸¹² Il congnoit le quel il trouble en erreur, le quel il deçoit par joye, le quel il tue par pensee, le quel il seduyt par admiracion. |⁸¹³ Il discerne et congnoit les coustumes de tous, les espart, il en a soing, il espie et enquiert les affections |⁸¹⁴ et, en toutes ces choses, il quiert cause de nuyre en tout lieu et principallement ou il trouve qu’on est ocuppé tres curieusement.

|⁸¹⁵ Et, a ce propos, Leon pape dit : |⁸¹⁶ Hinc est quod frequenter immittit tantam amaritudinem mentibus fidelium complexionem agitando ac timorem incuciendo quod vivere eis creditur supplicium et mori lucrum et remedium, |⁸¹⁷ c’est a dire que « L’ennemy d’enfer souvent met tant de amertume et de tristesse aux pensees des loyaulx amys de Dieu en debtant leur complection et metant en eulx telle paour qu’ilz croient vivre leur estre tourment et mourir leur estre prouffit » |⁸¹⁸ et tant que aucune fois pou s’en fault qu’ilz ne se desesperent de la vie du corps et de l’ame, |⁸¹⁹ car a cause de telles sourvenantes temptacions, ilz cuident estre delaisséz et relenquis de Dieu, qui permet ses esleus estre ainsi esprouvéz.

|⁸²⁰ Et est ce que dit l’Ecclesiastique : |⁸²¹ Vasa figuli probat fornax, homines autem justos temptacio tribulacionis, |⁸²² c’est a dire que « La fournaise esprouve les vesseaulx du potier et la temptacion de tribulacion esprouve les hommes justes » ;

|⁸²³ Et Job dit : |⁸²⁴ Probavit me quasi aurum quod per ignem transit qui scit omnes d iii r] vias meas, |⁸²⁵ c’est a dire « Celuy qui sçait toutes mes voies m’a esprouvé ainsi comme l’or qui passe par le feu. »

|⁸²⁶ Et a ce propos dit l’Apostre : |⁸²⁷ Modicum oportet contristari in presenti ut probacio fidei nostre multo preciosior sit auro quod per ignem probatur, |⁸²⁸ c’est a dire qu’« Il est necessaire d’estre ung pou troublé en ce present temps affin que la probacion de nostre foy appaire plus precieuse que n’est l’or qui est esprouvé par le feu ».

|⁸²⁹ Et, pour ce, dit l’ange a Thobie : |⁸³⁰ Quia acceptus eras a Deo, necesse erat ut temptacio probaret te, |⁸³¹ c’est a dire « Pour ce que tu estoies a Dieu agreable, il estoit necessaire que la temptacion t’esprouvast. »

|⁸³² Et, a ceste cause il est necessaire par force espirituelle, c’est assavoir l’amertume devant dicte ou tribulacion envoiee, la porter pacientement en la soustenant humblement |⁸³³ et dire avec Job, par forme et maniere de pacience : |⁸³⁴ Si bona suscepimus de manu Domini, mala autem quare non suscipiamus ?, |⁸³⁵ c’est a dire « Se nous avons receu les biens de la mains de Nostre Seigneur, pourquoy ne receverons nous les maulx » |⁸³⁶ en recordant le merite de pacience en ce present temps et le louyer de la joye au temps ad venir ? |⁸³⁷ Prie donc ung chacun avecques Job Nostre Seigneur qu’il n’espargne point la douleur et die que, se l’ennemy l’a occis, qu’il esperera a son Seigneur.

|⁸³⁸ Et quelle merveille est ce se l’omme mort et meschant est troublé en ce temps present quant le Saulveur de tout le monde, par son Psalmiste, dit de luy mesmes : |⁸³⁹ Anima mea turbata est valde, |⁸⁴⁰ c’est a dire « Mon ame est tres troublee. »

|⁸⁴¹ Et, plus oultre, en son Evangile : |⁸⁴² Tristis est anima mea usque ad mortem, |⁸⁴³ c’est a dire « Mon ame est triste jusques a la mort. » |⁸⁴⁴ Et mesmes, en sa passion, il croit a son Pere, disant |⁸⁴⁵ Deus meus, Deus meus, ut quid dereliquisti me ?, |⁸⁴⁶ c’est a dire « O mon Dieu, mon Dieu, m’as tu relenqui ? ».

|⁸⁴⁷ Recorde pareillement le dit de Isaÿe le prophete parlant en la personne de Dieu : |⁸⁴⁸ In modico dereliqui |⁸⁴⁹ et, in momento indignacionis mee, adbscondi parumque faciem meam a te |⁸⁵⁰ et in misericordia sempiterna miserus sum tui, |⁸⁵¹ c’est a dire « Je t’ay delaissé ung petit de temps |⁸⁵² et, au mouvement de mon indignacion, j’ay muché ung pou ma face de toy, |⁸⁵³ mais ce non obstant, j’ay eu de toy pitié en ma misericorde sem[d iii v]piternelle. »

|⁸⁵⁴ Et, certainement, la chose est moult briefve et de petit mouvement la quelle nous souffrons en ce temps present au regart de la retribucion eternelle qui est misericordieusement esperee et attendue. |⁸⁵⁵ Nul donques ne se doit esmerveiller se aucun homme espirituel est tempté espirituellement et ainsi comme singulierement, |⁸⁵⁶ car sa bonne voulenté en luy demourante ne souffrira point qu’il soit dejetté hors de foy, d’esperance ne de charité, |⁸⁵⁷ mais en sera plus ferme, plus constant et plus fort et robuste en toute vertu.

|⁸⁵⁸ Et, pour celle cause, Nostre doulx Sauveur Jesucrist enseignoit a ses disciples le prouffit et le remede quant il disoit : |⁸⁵⁹ Ecce Sathanas expetivit vos ut cribraret sicut triticum, |⁸⁶⁰ c’est a dire « J’ay veu Sathan le quel a enquis et espié contre vous affin qu’il vous crible comme le fourment ». |⁸⁶¹ Il est a entendre que, ainsi comme le bon grain est par le crible esleu du mauvais, ainsi le dyable eslyt les œuvres vertueuses des bons en regardant la maniere comme il les pourra faire perir par le crible de ses fallacieuses temptacions.

|⁸⁶² Et, certainement, aucun est criblé quant, dedens, en sa pensee, espirituellement et parfaictement, il est examiné.  |⁸⁶³ Il est aussi roboré, parfait et enforci quant, par la vertu de pacience et d’oraison devote et salutaire ammonicion de son prochain, il est confermé en bien.

|⁸⁶⁴ Et, pour ce, s’ensuyt : |⁸⁶⁵ Ego autem pro te rogavi ut non deficiat fides tua et tu aliquando conversus confirma fratres tuos, |⁸⁶⁶ c’est a dire « J’ay pour toy prié que ta foy ne defaille point et, pour ce, quant tu l’auras congnu, conferme et conseille tes freres », c’est assavoir tes prochains.

|⁸⁶⁷ Et, s’aucun est confermé par la monicion de son prochain et qu’il soit parfait en Jesucrist, die ce vers : |⁸⁶⁸ Quare tristis es, anima mea, et quare conturbas me ? Spera in Deo,  |⁸⁶⁹ c’est a dire « O mon ame, pourquoy es tu marrie et triste et pourquoy me troubles tu ? Espere de Nostre Seigneur. »

|⁸⁷⁰ Et, adonc, de rechief, prie et chante de cueur et face les biens les quelz il peut faire |⁸⁷¹ et regarde la saincte Escripture et recorde les parolles des prophetes et mesmes commande et mette en sa memoire les ditz de la saincte Evangile. |⁸⁷² Et, s’il est ainsi qu’il ne treuve en ces choses aucune sensible devocion, la soustienne pacientement.

|⁸⁷³ Touteffois, [d iiii r] ait et mette paine d’avoir celle devocion, la quelle peut suffire pour son salut, |⁸⁷⁴ car utilement et pour nostre prouffit nous est soustraicte l’actuelle devocion, affin que plus meritoirement soit faicte oraison.

|⁸⁷⁵ Et, pour ce, dit saint Bernard sur celle cantique : |⁸⁷⁶ Quesivi et non inveni, et cetera : |⁸⁷⁷ Abscondit se sponsus dum queritur ut avidius queratur,  |⁸⁷⁸ c’est a dire « J’ay quis mon espoux et ne l’ay point trouvé, car il se muche quant on le quiert affin que par plus grant soing il soit quis. »

|⁸⁷⁹ Et, a ce propos, dit saint Augustin, au Livre des parolles de Nostre Seigneur : |⁸⁸⁰ Cum aliquando Deus tardius dat sua bona commendat non negat,  |⁸⁸¹ c’est a dire que « Quant aucune fois Dieu donne tart la chose qu’on luy demande, il n’est pas a entendre pourtant qu’il la denye mais il le fait en commandant a garder ses biens le quelz il donne ». |⁸⁸² Car les choses longuement desirees sont plus songneusement gardees et aymees |⁸⁸³ et, par raison contraire, les choses qui legierement sont donnees, on les tient villes et non pas chieres.

|⁸⁸⁴ Et, pour ce doncques, demande. |⁸⁸⁵ Quier en demandant justes choses et, en querant, cresces, |⁸⁸⁶ c’est a dire « En requerant, demande chose de valeur affin que tu prennes », |⁸⁸⁷ c’est a dire « Affin que par demander choses villes, tu ne soies indigne de obtenir ce que tu demandes ». |⁸⁸⁸ Car, pourtant, saches que se tu n’as effect de ta demande legierement, icelluy t’est gardé et ne te veult pas Dieu bailler, affin que tu ayes cause de graigneur chose demander. »

|⁸⁸⁹ Et, pour ce, dit saint Augustin : |⁸⁹⁰ Tunc sancti melius exaudiuntur quando non ad nutum exaudiuntur, |⁸⁹¹ c’est a dire que « Les saintz sont mieulx essaucéz quant ilz ne sont pas du tout a leur plaisir et voulenté essaucéz », |⁸⁹² c’est a dire « incontinent et en la façon ou maniere qu’ilz le requierent ». |⁸⁹³ Car, au premier temps de la conversion, Dieu donne et ottroie a aucuns devocion de souefveté et de doulceur affin qu’ilz soient convertis en l’amour de Nostre Seigneur et qu’ilz soient plus fermes. |⁸⁹⁴ Et, aprés ces choses, il leur soustrait celle devocion de doulceur affin qu’ilz deservent plus de merite et que, en le desservant, ilz soient couronnéz plus souverainement.

|⁸⁹⁵ Et, pour ce, dit le Philosophe : |⁸⁹⁶ Cum enim virtus consistat circa difficile, illud quod difficilius [d iiii v acquiritur virtuosius obtinetur, |⁸⁹⁷ c’est a dire « Comme il soit ainsi que vertu trouvee envers les choses dificiles, la chose la quelle est acquise plus difficilement », |⁸⁹⁸ c’est a dire « a plus grant paine, est la plus songneusement obtenue et plus vertueusement ». |⁸⁹⁹ Car Nostre Seigneur Jesucrist, en enseignant ceste chose, dit a saint Pierre : |⁹⁰⁰ Cum autem esses junior, cingebas te et ambulabas ubi volebas. |⁹⁰¹ Cum autem senueris, extendes manus tuas et alius te cinget et ducet quo tu non vis.  |⁹⁰² C’est-à-dire : « O Pierres, quant tu estoies jone, c’est a dire au commencement que je t’appellay, tu te chaingnoies et cheminoies ou tu vouloies, |⁹⁰³ c’est a dire, pourtant que je te demenoies en ma doulceur, ce t’estoit chose plaisante a ta voulenté et a ta sensualité ; |⁹⁰⁴ mais, maintenant que tu es vieulx, c’est a dire que tu congnois ce que tu ne congnoissoies point de moy, tu estendras tes mains et autre te chaindra et menera la ou tu ne veulx point ». |⁹⁰⁵ C’est a dire : « Tu souffriras pour moy et seront tes mains estendues en la croix et seras lyé et detenu des lyens de Neron ou de ses ministres et te menera l’en ou tu ne veulx point aller. |⁹⁰⁶ C’est a dire que, selon ton humanité, tu ne veulx point mourir ».

|⁹⁰⁷ Et, pour ce dit Dieu a ses apostres nouvellement convertis : |⁹⁰⁸ Lac vobis potum dedi, non escam, |⁹⁰⁹ c’est a dire « Je vous ay donné lait et non pas viande ». |⁹¹⁰ Car, au commencement de la conversion des apostres, ilz estoient a estre nourris de lait de doulceur et de devocion, pour ce que, aprés, ilz estoient a estre enforcéz de viande de paine et de tribulacion.

|⁹¹¹ Et, comme tu congnois que les petis enfans, au commencement, ne sont pas nourris de grosses viandes mais de petites, comme de lait, de choses doulces et tendres de legiere digestion, |⁹¹² et, aprés qu’ilz commencent a croistre et a enforcir, le pain materiel et les autres viandes grosses, les quelles leur estomach peut porter leur sont administrees, ainsi semblablement estoit il des apostres estans avec Jesucrist. |⁹¹³ Car, devant sa passion, ilz estoient nourris de la doulceur de sa personne et de ses belles parolles et aprés eurent les grosses viandes a gouster, comme de fain, de soif, de froit, de chault, de bastemens de leurs persecuteurs, paines, angoisses, travaulx et crudelitéz, jusques a la mort, aprés qu’ilz [d v r] furent enforcéz de la grace du Saint Esperit.

|⁹¹⁴ Et, certainement, c’est chose moult doulce et moult souefve d’ensuyr Dieu avec joyeuseté de pensee et avec paix et tranquilité, |⁹¹⁵ mais c’est une chose tres haulte et tres parfaicte d’ensuyr Dieu avec tristesse de cueur par tribulacion de temptacion de foy ou impugnacion et bataille continuele de pensee. |⁹¹⁶ Car a monseigneur saint Pierre l’apostre estoit moult doulce chose d’estre avec Nostre Saulveur Jesucrist en sa joyeuse et glorieuse transfiguracion quant il dit : |⁹¹⁷ Bonum est nos hic esse, |⁹¹⁸ c’est a dire « O Sire Dieu, ce nous est chose moult bonne estre tousjours avec toy en ce lieu ». |⁹¹⁹ Mais ce luy fust chose moult dure et moult terrible en sa douloureuse et cruelle persecucion, c’est a dire en la passion, quant il le renya et qu’il dit : |⁹²⁰ Non novi hominem, |⁹²¹ c’est a dire « Je vous prometz que je ne congneu oncques celuy homme que vous me dictes ».

|⁹²² Et, touteffois, celuy qui par sa doulceur l’a racheté, par nuyt, a la terreur et crainte d’une chamberiere, l’a renyé. |⁹²³ Mais, aprés que le dit monseigneur saint Pierre fut enforcé du Saint Esperit, devant les princes et les roys jusques a la mort l’a fermement confessé et son nom a tous manifesté. |⁹²⁴ Et pour celle passion est engendree en partie la complexion de crainte.

|⁹²⁵ Et, pour ce, celuy qui a telle complexion paoureuse se doit forment garder que en chose doubteuse il ne demeure longuement et qu’il n’en enquerre trop parfondement en pensant a luy tout seul |⁹²⁶ mais declaire plainement sa temptacion aux clercz sages et discretz affin que, par le conseil et consolacion d’iceulx, il soit mis en salutaire ammonicion. |⁹²⁷ Car il est escript : |⁹²⁸ Ve soli quia, si ceciderit, non habet sublevantem, |⁹²⁹ c’est a dire : « Paine et douleur est a celuy qui est seul, |⁹³⁰ car, s’il chiet, il n’a aucun qui luy donne ressourse ne allegement. »

|⁹³¹ Et, pour ce donc, celuy qui est troublé de temptacion et est craintif et triste de sa complexion, il luy est necessité qu’il s’esjouysse par force et bonne vertu de courage, |⁹³² car, de tant plus que aucun est contraint et bataille a soy douloir et estre en crainte, de tant plus se doit donner courage de s’esjouyr et consoler. |⁹³³ Et de cecy est il escript : |⁹³⁴ Ibant apostoli gaudentes a conspectu concilii, quoniam digni habiti sunt pro nomine Jesu contumeliam pati, d v v]|⁹³⁵ c’est a dire que « Les apostres s’en alloient esjouyssans de devant le regard du conseil pour ce qu’ilz estoient dignes de souffrir paines et tribulacions pour le nom de Jesucrist. »

|⁹³⁶ Et s’il advient que, par nulle instruction de aucun escript, tu ne sentes aucune consolacion espirituelle, soustien celle tristesse paciamment et humblement et met paine d’avoir et prendre aucune licite et honneste consolacion temporelle |⁹³⁷ en ensuyvant le conseil de l’Apostre, qui dit : |⁹³⁸ Ne forte ex habundanciori tristicia absorbeatur qui hujusmodi est, |⁹³⁹ c’est a dire « Affin que par trop habondante tristesse celuy qui est en ceste maniere en soit deceu et absorbé », |⁹⁴⁰ car ce qui est fait a cause de utilité et prouffit de recouvrer salut n’est point tourné ne tenu a folie ou vanité. |⁹⁴¹ Car saint Gregoire dit que l’ange Sathan invisiblement se transforme en ange de lumiere soubz espesse de bien, admonnestant les pechiéz en couvrant erreurs et choses faulses de couleur de verité |⁹⁴² affin qu’il puisse advenir a la decepcion des povres ames de Dieu.

|⁹⁴³ Aucune fois, il offre et met en la memoire de l’omme occupé au divin service une doubte de continuelle enqueste de sa conscience et plusieurs autres fantasies |⁹⁴⁴ affin que, l’office a luy appartenante, soubz espesse de bien il puisse empescher et troubler sa pensee.

|⁹⁴⁵ Touteffois, combien qu’il soit escript |⁹⁴⁶ Omnia tempus habent, |⁹⁴⁷ selon Salomon, |⁹⁴⁸ c’est a dire que « Toutes choses ont leur temps », |⁹⁴⁹ encore tu dois savoir le souverain et expert remede pour telles fantacies et ymaginacions oster et les espirituelles temptacions estre destruites, |⁹⁵⁰ car il est necessaire de resister au commencement. |⁹⁵¹ Et, s’il advient que elles t’assaillent estant en ton oraison, en tant comme il t’est possible ne veulles en aucune maniere t’y arrester ne entendre a icelles.

|⁹⁵² Aucune fois aussi, il remet en memoire les pechéz des quelz vraie confession a esté faicte et des quelz on a eue dure et amere contricion, en troublant la creature et luy mettant en sa pensee qu’ilz ne sont point pardonnéz, |⁹⁵³ ou, au moins, il met en doubte celle chose la quelle autrefois elle congnoissoit estre vraie.

|⁹⁵⁴ Et iceluy ennemy fait ce par la recordacion et memoire de la confession ou des autres bonnes œuvres en luy presentant une obscurté de petit courage et disposant [d vi r] crainte en sa pensee et luy mettant en courage de retourner a confession.

|⁹⁵⁵ Mais, pourtant, il ne le fait pas affin que l’ame en soit purgee par icelle confession mais affin que la pensee en soit troublee et par celle doubte soit revoquee et mise hors de transquilité et du bien de paix, |⁹⁵⁶ car il est esperit tout plain de venin et de pestilence. |⁹⁵⁷ Hayant la paix de tout cueur uny et conjoint a Dieu, il appete et demande en son affection amertume de turbacion, a la suggestion et ammonicion du quel il est a resister et contredire soubtillement de ceste part, |⁹⁵⁸ c’est assavoir en dissimulant la confession admonnestee de telles doubtes, la quelle est par la suggestion du dyable d’enfer par maniere de temptacion et de paine, et aussi en la delaissant salutairement, combien que la conscience contredie.

|⁹⁵⁹ Et, combien que la confession du pechié soit utile et necessaire par vray remors et salutaire compunction, |⁹⁶⁰ encore vault il mieulx que telle confession admonnestee par la suggestion du dyable d’enfer soit delaissee, |⁹⁶¹ car elle pourroit estre infructueuse. |⁹⁶² Car telle confession n’est pas delaissee par complement de religion chrestienne et d’ordonnance ecclesiastique mais par cautelle et soubtilité de temptacion estre delaissee.

|⁹⁶³ Et, combien qu’il soit ainsi que une chose soit congnue estre mauvaise, touteffois toute chose est bonne qui est faicte en bonne intencion, |⁹⁶⁴ car la cause pourquoy la chose est faicte et, avecques ce, l’intencion donnent a l’œuvre finale devocion et remuneracion. |⁹⁶⁵ Et cecy nous a enseigné Jesucrist quant il fust tempté par la suggestion du dyable d’enfer, en luy disant : |⁹⁶⁶ « Se tu es filz de Dieu envoyé, laisse toy cheoir de hault en bas ». |⁹⁶⁷ Mais, pourtant, il ne le voulut pas faire en ceste maniere, |⁹⁶⁸ car il eslut a decliner et a delaissser les machinacions et temptacions d’icelluy en descendant par les degréz de discrecion, |⁹⁶⁹ nous donnant exemple que nous ne debvons point legierement obeir a la suggestion du dyable, la quelle il nous baille et presente souvent soubz espesse de bien, |⁹⁷⁰ mais nous debvons resister et aller a l’encontre par la voie et degréz de discretion.

|⁹⁷¹ Aucune fois aussi, le mauvais esperit faulx et erronique empesche la pensee de l’omme par diverses manieres de vices et de pechiéz fort differens |⁹⁷² et, par diverses occultes [d vi v] et muchees commocions, demonstrant estre chose illicite et pechié la quelle en soy est bonne ou demonstrant la chose estre bonne la quelle en soy est mauvaise ou la chose estre mortelle la quelle en soy est venielle.

|⁹⁷³ Et de telles choses pense la creature que continuellement il appartient estre confessé |⁹⁷⁴ et, en ces choses, tant plus y met sa pensee et les arreste en sa memoire, tant plus indiscretement se trouble et se deçoit. |⁹⁷⁵ Car iceluy ennemy ne quiert et ne demande fors qu’il face paour et trouble la pensee et qu’il l’empesche de bien faire et qu’il forge et institue a la creature conscience plaine d’erreur.

|⁹⁷⁶ Et mesmes, aucune fois, il contraint plus fort consentir a la conscience erronee et decevable que humblement obeir a la discrecion et enseignement d’aucun bon conseil, la quelle chose est moult diverse et heretique.

|⁹⁷⁷ Pour celle cause donc, aucun tempté en telle maniere doit de mettre telle erreur a l’arbitre et determinacion du maistre espirituel et ensuyvir la vérité. |⁹⁷⁸ Et, s’il est ainsi qu’il ne veulle humblement obeir et que telle erreur voluntaire demeure en sa pensee, l’apostre enseigne ung remede en l’encontre, disant : |⁹⁷⁹ Nolite credere omni sporitui, sed probate qui sunt spiritus Dei, |⁹⁸⁰ c’est a dire « Ne veulléz pas croire a tout esperit, |⁹⁸¹ c’est a entendre a toute pensee, mais esprouvéz les quelz esperitz, c’est a dire les quelles pensees, sont de Dieu. »

|⁹⁸² Et, pour les esprouver et savoir, discrecion, mere de vertus, nous est en toutes choses necessaire. |⁹⁸³ De la quelle saint Gregoire dit en ceste maniere : |⁹⁸⁴ Discrecio est auriga virtuum ut inter bonum et malum recte dijudicetur ne quis sub specie boni incaute fallatur, |⁹⁸⁵ c’est a dire que « Discrecion est mere et adresse de vertus affin que par elle on sache jugier et discerner entre le bien et le mal et que aucun ne soit, soubz espesse de bien, cauteleusement deceu ».

|⁹⁸⁶ Et dit saint Augustin de l’esperit et de l’ame : |⁹⁸⁷ Humanus spiritus aliquando bonus aliquando malus spiritus assumitur, nec facile discerni potest qualis spiritus assumatur nisi quia bonus instruit, malus autem fallit, |⁹⁸⁸ c’est a dire que « L’esperit humain aucune fois est prins pour le bon, aucune fois pour le mauvais et est chose moult difficile a discerner se du bon ou du mauvais les bonnes pensees nous sont donnees, sy non par ce que le [e i r] bon instruit et enseigne et le mauvais met paine de decepvoir ».

|⁹⁸⁹ Et, aucune fois, il admonneste le bien a estre fait |⁹⁹⁰ affin que plus legierement il seduyse et decepve en son intencion plaine de dolosité. |⁹⁹¹ Pour la quelle cause, il n’est pas bon de croire du tout a soy ne soy arrester a son propre sens, mais on doit plus obeir a la verité du tesmoing des Escriptures et a reguliere discrecion, |⁹⁹² car, pour certain, icelluy ancien serpent est deceptible, mauvais, fraudulent et decepveur des ames. |⁹⁹³ Le quel, adonc, quant il apperçoit qu’il ne peut mettre nul erreur de pechié en la pensee par ses decepcions fraudulentes, il s’efforce aucunement la cuyder encliner et flechir par trop grant paour |⁹⁹⁴ en luy forgant, disposant et mettant en sa memoire chose faulse et terrible et en luy espandant le venin de sa malicieuse, perverse et cauteleuse iniquité, comme par diverses et differentes ymaginacions, |⁹⁹⁵ et, avec ce, s’efforce luy aggraver son enfermeté de intollerable paine. |⁹⁹⁶ Et toutes ces choses affin que, par la diversité et varieté d’icelles, il le puisse atraire en aucune |⁹⁹⁷ et, par aucun bien commencé, il fasce cheoir et trebucher la creature et qu’il en puisse faire moquerie et derrision.

|⁹⁹⁸ Il est donc utile, necessaire et convenable que, a toutes ses suggestions et souvenances premieres les quelles il met en la pensee de chacune creature soubz espesse de bien, qu’on les refuse et resiste |⁹⁹⁹ en tant que force humaine le peut faire moiennant la grace de Dieu et que ceste paine de ses ameres temptacions soit humblement et pacientement portee, la quelle il met en la pensee craintive et aussi par luy tourmentee.

|¹⁰⁰⁰ Aucune fois, s’il s’efforce et met paine de grever la creature en son dormir par diverses illusions et erreurs, la quelle il ne peut en veillant faire cheoir en pechié. |¹⁰⁰¹ Et de cecy dit saint Gregoire, en ses Morales sur Job : |¹⁰⁰² Terrebit ne per sompnia hostis insidians quo electos vigilantes minime superat et dormientes gravius impugnat, |¹⁰⁰³ c’est a dire que « Le dyable d’enfer espie les eslus de Dieu par divers songes affin que, tant qu’ilz sont formans, il les poingne et face trebucher plus griefvement, les quelz par nulle maniere, tant comme ilz ont esté veillans, il n’a peu surmonter par pechié ».

|¹⁰⁰⁴ Et ces choses seuffre et permet be[e i v]gninement Dieu, que es cueurs de ces eslus l’ennemy d’enfer ne cesse mettre elles passions, |¹⁰⁰⁵ affin que par le repos de dormir ne soit perdu le louyer le quel leur est appareillé a cause des refus, opposicions et bonnes resistences les quelles ilz ont faictes en l’encontre d’icelluy ennemy.

|¹⁰⁰⁶ O en quantes manieres merveilleuses et diverses l’ame de l’omme le quel craint Dieu est debatue et assaillie, |¹⁰⁰⁷ car ce nous tesmoigne ce qui est prins en une hympne, ainsi disant : |¹⁰⁰⁸ O serpens tortuose, qui mille per meandros agitas quieta corda, discede, liquesce : |¹⁰⁰⁹ Christus nobiscum est, |¹⁰¹⁰ c’est a dire « O serpent qui point ne chemines par la droite voie, qui debatz et tourmentes les cueurs paissibles par mile manieres de voies obliques et plaines de decepcion, depart toy et te met en fuyte, |¹⁰¹¹ car Jesucrist est avecques nous. »

|¹⁰¹² O tres mauvais transgresseur de l’amour de Dieu, le signe de la croix condampne ta compaignie !

|¹⁰¹³ O tant c’est chose debonnaire, utile, caritative et salutaire, conforter et renforcer le troublé, le tourmenté, le desolé et relenqui et mesmes le passant par le feu de probacion ou par le fournet de tribulacion |¹⁰¹⁴ et le mener en refrigeracion et affreschissement de repos et en consolacion contenante esperance de pardon !

|¹⁰¹⁵ Et, se ainsi est que le troublé de telles persuasions ne puisse obtenir et prendre consolacion mais par longue espace de temps ait deffaulte d’icelle, |¹⁰¹⁶ touteffois ait esperance et croie fermement qu’il doit avoir finablement consolacion espirituelle, |¹⁰¹⁷ car Bonaventure dit en ceste maniere : |¹⁰¹⁸ O mire benignitatis Altissime, qui nos temptari permittis, non ut capiamur sed et timentes ad te portum tutissimum fugiamus ! |¹⁰¹⁹ c’est a dire « O tres Souverain de benignité merveilleuse, qui nous permetz estre temptéz, non pas |¹⁰²⁰ affin que nous soions prins et deceus mais affin que nous, qui sommes craintifz, courons a toy qui es port tres sceur ! »

|¹⁰²¹ O Sire Dieu, qui fais toutes ces choses en la maniere de la bonne mere la quelle desire veoir et embracher son petit filz eslongné d’icelle, |¹⁰²² car elle luy fait avoir paour par aucune chose terrible et espouentable et adonc estent les bras et reçoit son filz accourant pour estre de elle conservé et luy fait joie et rys et luy donne et eslargit moult de doulz baissiers |¹⁰²³ et puis [e ii r] l’instruit et exhorte qu’il ne se departe plus d’avecques elle, |¹⁰²⁴ affin qu’il n’en chiesse en celuy mal par le quel luy pourroit inconvenient venir ! |¹⁰²⁵ Aprés le reconforte et de rechief, l’estraingnant entre ses bras, luy administre ses mammelles.

|¹⁰²⁶ O donc beneuree temptacion la quelle ne contraint point fuyre ne eslongner des embrachemens divins !

|¹⁰²⁷ O doulx Sire, qui permetz que nous soions fuitifz en tous lieux et tousjours, tu te donnes a nous, refuge salutaire, affin qu’en tout temps nous demourons avec toy !

|¹⁰²⁸ O homme, ne t’esmerveille point se tu as aucunes temptacions mais, se tu les crains, met ta fuyte en Dieu, |¹⁰²⁹ car c’est le lieu par le quel tu auras sceurté, ou, se tu n’y fais ton cours, tu pourras estre prins et eternellement dampné ! |¹⁰³⁰ Et, se ainsi est que tu congnoisses estre trop eslongné de ton Dieu par tes deffaultes et que tu ne puisses a luy courir de plain cueur et devot, |¹⁰³¹ haste toy de approucher et tenir pres de Jesucrist et te muche au puis de son destre costé perché pour toy et te couvre du drap de vraie confidence et n’aies doubte que l’ennemy d’enfer ne te fera point de terreur. |¹⁰³² Et tien tousjours pour rigle generale que quiconques vouldra incliner Dieu a soy, il doit profondement penser et porter en son cueur les plaies de Jesucrist et qu’il soit tout enrousé de son sang. |¹⁰³³ Et, s’il est ainsi, il pourra fuyr sceurement et faire son cours a Dieu son Pere |¹⁰³⁴ et icelluy, tres doulx, le pourverra plainement comme son filz en ce qui luy sera utile, necessaire et convenable. |¹⁰³⁵ Approuche donc a Jesucrist et le prie humblement qu’il te veulle en son sang renouveller ses plaies, |¹⁰³⁶ combien qu’il n’appartient pas icelluy Jesucrist encore une fois estre deplayé et vulneré, et qu’il te veulle totalement taindre et vestir en son sang. |¹⁰³⁷ Et, se tu es ainsi vestu de ce vestement, tu pourras aller et entrer sceurement au palais du Roy celestiel.

|¹⁰³⁸ O toy donc, quiconques es tempté, met en ton cueur et pense chacun jour les plaies de Jesucrist et icelles te seront tousjours refrigeracion, joye et consolacion. |¹⁰³⁹ Et ne doubtes mais croy fermement que, se tu les metz, emprains et escriptz en ton cueur, que tu ne seras amené ne seduyt a quelconque temptacion. |¹⁰⁴⁰ Mais dy moy qui est celuy le quel veulle ou ose plus de rechief [e ii v] perpetrer et commettre nulles defaultes ou pechiéz s’il voit et considere que le Seigneur de gloire est deplayé et vulneré pour noz pechiéz ? |¹⁰⁴¹ Et, s’il est ainsi que, pour la reverence et compassion d’icelles plaies, il ne delaisse a pechier, au moins s’en devroit il abstenir |¹⁰⁴² considerant que, se celuy le quel est innoscent en toutes choses a tant souffert, que le pecheur doit souffrir plus griefves plaines, sans nulle compareson. |¹⁰⁴³ Et, se tu consideres ces choses en toy et tu congnois que Jesucrist, soit par tes pechiéz, indigné contre toy, adresse et met ton esperance envers sa doulce Mere, advocate des pecheurs, |¹⁰⁴⁴ et luy fay reverence comme a la Mere de Dieu en luy demandant et requerant son aide par pleurs et lamentacions |¹⁰⁴⁵ et croy et aies confidence certaines que, se tu perseveres incessamment, que la chose la quelle tu luy demanderas tu l’obtendras. |¹⁰⁴⁶ Et la cause sy est car en icelle croit toute miseracion et pitié.

|¹⁰⁴⁷ Et, avecques ce, luy est commis, de son office, donner et satisfaire aux povres et miserables pecheurs quelque chose que iceulx luy veulent demander et requerir. |¹⁰⁴⁸ Et, s’il est ainsi que, par grande diligence, elle excerce et face aide communement envers tous, elle ne te pourra refuser, qui es seul. |¹⁰⁴⁹ Et, se tu vois que quelques consolacion ne te soit donnee, congnoy que Dieu te ayme et te reçoit, mais il ne se veult pas encore manifester ne faire congnoistres, |¹⁰⁵⁰ affin que tu congnoisses l’orreur, la laidure et la profundité de tes pechiéz et que tu ne soies pas ignorant de ta misere, et ceste chose te sera tres grant don de Dieu. |¹⁰⁵¹ Car saches de certain que la presumpcion d’aucuns ne plait point a Dieu, les quelz se reputent justes et qui approchent de Luy, Tres Hault et Souverain, ainsi come ilz feroient de leur familier amy, |¹⁰⁵² mais veult que quiconques, tant soit grant, qu’il soit ainsi comme ministre, se reputant comme rien, et en ceste maniere vienne et se represente devant le regart de Dieu |¹⁰⁵³ en recordant la confusion de ses pechiéz, ayant grant crainte et luy faisant grande reverence. |¹⁰⁵⁴ Et, de quelque estat que tu soies, tant soit grant, se nostre Dieu tres debonnaire te veult et daigne regarder de loing, ne le desprise pas, mais repute ce estre grant chose.

|¹⁰⁵⁵ Et, pour cecy, confesse de plain cueur la magnitude de Dieu et la gravité et ma[e iii r]lice de tes pechiéz et dy : |¹⁰⁵⁶ « Sire mon Dieu, je ne suis pas digne que tu entres en la maison de ma conscience ne que j’approche de toy en nulle maniere. » |¹⁰⁵⁷ Je te dy que, se tu perseveres sans nulle cesse avoir recordacion de tes deffaultes et, en desplaisance et vraie humilité, tu te approches de luy, esperant de sa misericorde, il ne te verrra pas seulement mais te merra en ses tres secretes joyes. |¹⁰⁵⁸ La quelle chose veulle donner celuy qui est benoit et tout puissant Seigneur au siecle des siecles. |¹⁰⁵⁹ Amen.

|¹⁰⁶⁰ Il est a savoir, en aprés, que le dyable d’enfer, avec ses malins esperitz, vient aux homes les quelz labourent a leur derraine heure, |¹⁰⁶¹ affin qu’il les tempte des articles de la foy plus que de nulle autre chose, |¹⁰⁶² car il ne met pas sy tost en la memoire du mourant la gloire et la joye des richesses ou des delices et autres biens de ce monde pour ce que le malade sçait bien que il ne les peut emporter avec luy, |¹⁰⁶³ ne les honneurs pareillement, luy baille les suggestions fraudulentes en l’encontre de la foy, le cuidant decevoir, pour ce que elle est fondement de salut, |¹⁰⁶⁴ affin que, quant le fondement sera destruit, que tout l’autre edifice des autres vertus soit destruit. |¹⁰⁶⁵ Et fait tant que tous ses pechiéz luy revoque et met en la memoire affin que, en considerant la multitude et grandeur d’iceulx, il le puisse miserablement tirer en desesperance.

|¹⁰⁶⁶ Pour ceste cause, ce n’est pas chose sceure amener en la recordacion de ses pechiéz le labourant a la derraine heure de sa fin, |¹⁰⁶⁷ mais on luy doit donner cause de esperer avoir pardon de la divine misericorde, |¹⁰⁶⁸ car, a cause de trop grant recordacion de ses pechiéz, il se pourroit desesperer. |¹⁰⁶⁹ Et, aussi, on luy doit mettre en memoire la passion de Nostre Seigneur et aucuns biens |¹⁰⁷⁰ les quelz, par la grace de Dieu, il a fais en sa vie et pour les quelz il peut esperer de la misericorde de Dieu.

|¹⁰⁷¹ Et, pour ce est ce bonne coustume entre les religieux que, quant aucun d’iceulx laboure en l’article de la mort et qu’ilz en ont congnoissance par aucun signe de dehors ; |¹⁰⁷² adonc, les freres, en quelque lieu qu’ilz soient, ou en la table ou en leur lit, se leveront et iront luy mettre en memoire le Symbole qui est chanté en l’eglise, c’est assavoir Credo in unum Deum, et cetera, |¹⁰⁷³ et, pareillement, en recordant [e iii v] l’autre Symbole affin qu’ilz le conferment en la foy, le quel le dyable s’est efforcé le mettre hors.

|¹⁰⁷⁴ Telz donc sont en tres grande et merveilleuse angoisse, car les malins espiritz les tourmentent de toutes pars et en toutes manieres |¹⁰⁷⁵ quant ilz recordent et repliquent leurs mauvaises œuvres, leurs ditz, leurs cogitacions, les biens delaisséz et les maulx faitz et perpetréz et moult d’autres choses inenarrables.

|¹⁰⁷⁶ Et, pour ce, dit saint Augustin : |¹⁰⁷⁷ Presto erit dyabolus in ultimo die nostro, recitans verba professionis nostre |¹⁰⁷⁸ et objiciens nobis quitquid mal fecimus et in quocumque loco et in quacumque hors et quid puimus facisse et non fecimus, |¹⁰⁷⁹ c’est a dire que « Le dyable d’enfer sera tout appareillé en nostre derrain jour de reciter les paroles de nostre profession, |¹⁰⁸⁰ opposant et improperant les maulx que nous avons faitz en quelque lieu que ce soit et en quelcunque jour et en quelcunque heure et pareillement les biens que nous avons peu faire et nous ne les avons pas faitz. »

|¹⁰⁸¹ Pour ce donc, ung chacun considere qu’il est de faire. |¹⁰⁸² Certainement, le souverain et plus sceur remede en ce est fermement croire sans doubter et esperer en la misericorde de Dieu plus qu’en la misere de tous les homes, |¹⁰⁸³ car iceluy Jesucrist dit estre venu non pas pour les justes mais pour les pecheurs. |¹⁰⁸⁴ Et ainsy appert tous les jours que la misericorde de Dieu veille, car il reçoit tous en en sa misericorde.

|¹⁰⁸⁵ Et, pourtant, la paine de Jesucrist a plus pesé que tous les pechéz du monde. |¹⁰⁸⁶ Et la justice de Dieu dort, car il ne punit point les pecheurs mais attent affin qu’il leur pardonne. |¹⁰⁸⁷ Et, aprés ceste vie presente, sa justice veillera, car adonc il rendra a chacun ce qui est sien selon ses dessertes et merites. |¹⁰⁸⁸ Mais en quelcunque heure que le pecheur se retournera de son pechié tant comme il est en ceste vie presente, il sera sauvé, |¹⁰⁸⁹ car, ainsi comme nous desirons de jour en jour boire et menger, ainsi desire Nostre Seigneur nous sauver.

|¹⁰⁹⁰ Et sachéz que la misericorde de Dieu est causee en trois manieres. |¹⁰⁹¹ Premierement, elle est causee de nature divine, a la quelle c’est chose propre estre misericordieuse. |¹⁰⁹² Secondement, elle est causee de longue acoustumance, |¹⁰⁹³ car, depuis le commencement du monde jusques a la fin, il ne cesse eslargir et donner [e iiii r] sa misericorde. |¹⁰⁹⁴ Et, de cecy, dit le prophete David : |¹⁰⁹⁵ In eternum misericordia ejus, |¹⁰⁹⁶ c’est a dire que « La misericorde de Dieu est sans fin ». |¹⁰⁹⁷ Tiercement, elle est causee de sa grant puissance pour ce que Dieu est tout puissant et misricors.

|¹⁰⁹⁸ Et, pour ce, nostre Mere saincte Eglise chante de luy en ceste maniere : |¹⁰⁹⁹ Deus, qui omnipotenciam tuam parcendo maxime et miserando maniefstas, |¹¹⁰⁰ c’est a dire « O Sire Dieu, le quel donnes a congnoistre ta grande puissance en pardonnant aux pecheurs et mesmes en ayant pitié. » |¹¹⁰¹ Il ne dit pas « Pere de puissance » ou « Pere de science » ou « Pere de justice » mais « Pere de misericorde » et « Dieu de toute consolacion », pour demonstrer et enseigner que nul ne se doit desesperer de sa misericorde et de sa benoite consolacion.

|¹¹⁰² Il est escript que Lucifer a demandé la sapience et la puissance de Dieu et, pour ceste chose, il a esté degetté et plingé au parfons d’enfer. |¹¹⁰³ Adam a demandé la sapience de Dieu et, de ceste chose, il a esté privé et deceu. |¹¹⁰⁴ L’omme aprés la Nativité de Jesucrist, a demandé la misericorde de Dieu et il a eue et possidee come son propre heritage.

|¹¹⁰⁵ Et, pour ce, dit le Psalmiste : |¹¹⁰⁶ Misericordia tua, Domine, adjuvabit me, |¹¹⁰⁷ c’est a dire « O Sire mon Dieu, ta misericorde sera a mon aide. » |¹¹⁰⁸ Car Dieu dit : |¹¹⁰⁹ Misericordiam volo et non sacrificium, |¹¹¹⁰ c’est a dire « Je veul misericorde » dit Dieu « et non pas sacrifice. »

|¹¹¹¹ Et devéz noter que, devant l’advenement de Jesucrist, quatre choses furent et ont esté a l’omme impossibles. |¹¹¹² La premiere est le ciel, car il ne recevoit nulle creature. |¹¹¹³ La seconde est la mort, la quelle devoroit toutes choses et ravissoit les ames en enfer. |¹¹¹⁴ La tierce chose estoit Dieu, qui ne reconcilioit point l’omme. |¹¹¹⁵ La quarte estoit l’ange, le quel n’aymoit point l’omme et ne portoit au ciel nulles des ames des creatures humaines.

|¹¹¹⁶ Mais Dieu s’est recordé de sa misericorde aprés sa Nativité et, adonc, misericordieusement a moderé toute durté et a fait a l’omme toutes choses paisibles, |¹¹¹⁷ car, en Jesucrist, tant et sy grande pitié et misericorde a esté que en icelles a reconsilié l’omme. |¹¹¹⁸ Et, pour ce, dit saint Paul : |¹¹¹⁹ Cum inimici essemus Deo, reconciliati sumus per mortem Christi et placato Christo omnia sunt placabilia, |¹¹²⁰ c’est a dire que « Combien que nous fussons ennemys de Dieu, touteffois nous sommes reconsiliéz par la mort de Jesucrist, le quel appaisé, toutes choses nous sont paisibles ».

|¹¹²¹ Mais, pour [e iiii v] entendre l’excellence de la misericorde de Dieu, tu dois savoir que elle est haulte, profunde et large.

|¹¹²² De la premiere, donc, qui est haulte, il est dit qu’elle tent et monte jusques au ciel et fait remunerer les saintz selon leurs merites. |¹¹²³ Et, de ceste, est dit par le Psalmiste : |¹¹²⁴ Magnificata est usque ad celos misericordia tua, |¹¹²⁵ c’est a dire que « La misericorde de Dieu est magnifiee jusques aux cieulx ».

|¹¹²⁶ Elle est profunde, car elle est descendue jusques en enfer et en a osté et admené les saintz Peres, qui en le lieu estoient detenus, |¹¹²⁷ selon ce que la Psalmiste nous dit : |¹¹²⁸ Misericordia tua magna est super nos et eruisti animas nostras ex inferno inferior, |¹¹²⁹ c’est a dire que « La misericorde de Dieu est grande sur nous, car elle a osté noz ames du plus base d’enfer ».

|¹¹³⁰ Elle est large et tant grande que elle est estendue par tout le monde, |¹¹³¹ car il est escript au Psalmiste : |¹¹³² Misericordia tua, Domine, plena est terra, |¹¹³³ c’est a dire « O Sire, la terre est plaine de ta misericorde. »

|¹¹³⁴ Par ce, on peut considerer que la misericorde de Dieu est sy multipliante qu’elle ne sçairoit estre nombree. |¹¹³⁵ Et, de cecy, dit le Psalmiste : |¹¹³⁶ Misericordie ejus non est numerus, |¹¹³⁷ c’est a dire qu’« Il n’est point de nombre de la misericorde de Dieu ».

|¹¹³⁸ Et, ainsi, come la naturelle proprieté du feu est eschaufer, ainsi est la naturelle proprieté de Dieu estre piteux et espargner. |¹¹³⁹ Et, pour ce que propre chose est a Dieu estre piteux, aussi estrange chose est a Dieu de punir et chose contre sa voulenté et tardive. |¹¹⁴⁰ Et, tout ainsi que la mouche a miel a de propre nature et de son office faire le miel et aussi qu’elle point quant elle est molestee et que ce luy est chose estrange, ainsi est il de Dieu. |¹¹⁴¹ Quant il donne le miel de sa misericorde, il fait son office et fait ce qui est de sa propre nature.

|¹¹⁴² Pareillement, quant il adjouste l’esguillon de sa justice, il en fait l’office, la quelle chose luy est estrange et contre sa voulenté, |¹¹⁴³ car il ne punit pas de legier mais envis. |¹¹⁴⁴ Et, pour ce, dit saint Jehan Crisostome : |¹¹⁴⁵ Illud quod homo facit contra naturam tarde facite. |¹¹⁴⁶ Sic Dominus facit opus misericordie sue quia illud est secundum naturam suam et tarde punit et invite et cum magno dolore compellitur peccatores dampnare, |¹¹⁴⁷ c’est a dire que « La chose que l’omme fait contre sa nature, il la fait a tart. |¹¹⁴⁸ Ainsi Dieu fait l’œuvre et envis et est contraint avec grant douleur dampner [e v r] les pecheurs », |¹¹⁴⁹ car, de certain, il ne luy fait pas tant de mal de l’offence des pecheurs a luy faicte qu’il luy fait mal que, par leurs desmerites, il soit contraint violentement les perdre et dampner, |¹¹⁵⁰ car, de sa nature, il veult tous les hommes estre sauvéz.

|¹¹⁵¹ La misericorde de Dieu, donc, est sy grande que elle est trouvee par tout lieu, |¹¹⁵² car, se nous sommes au ciel, c’est de la misericorde de Dieu, la quelle nous sauve. |¹¹⁵³ Et, a ce propos, le Psalmiste dit : |¹¹⁵⁴ Domine, in celo misericordia tua, |¹¹⁵⁵ c’est a dire « O Sire, ta misericorde s’estent jusques au ciel ! » |¹¹⁵⁶ Et de cecy dit Isaÿe : |¹¹⁵⁷ Expectat nos Dominus ut misereatur nostri, |¹¹⁵⁸ c’est a dire que « Nostre Seigneur nous attent affin qu’il ait pitié de nous ».

|¹¹⁵⁹ En expurgatoire sa misericorde est nous delivrant.  |¹¹⁶⁰ Et de cecy dit l’Ecclesiastique : |¹¹⁶¹ Liberasti me a pressura flamme que circumdedit me, |¹¹⁶² c’est a dire « Tu m’as delivré, Sire, de l’oppression de la flamme la quelle m’a environné. »

|¹¹⁶³ En enfer, sa misericorde y est appaisante, |¹¹⁶⁴ car les pecheurs ne sont punis synon que selon ce qu’ilz ont desservi. |¹¹⁶⁵ Par les quelles choses on peut veoir que Dieu n’omblira point a estre piteux et sy ne tendra en son ire eslargie ses misericordes.

|¹¹⁶⁶ Et dois noter qu’il sont trois choses les quelles Dieu ne peut faire. |¹¹⁶⁷ C’est assavoir, pour la premiere, qu’il ne peut denyer pardon a celuy qui le demande humblement. |¹¹⁶⁸ Pour la seconde, il ne peut punir la creature innoscente. |¹¹⁶⁹ Pour la tierce, il ne peut denyer estre misericors et piteux.

|¹¹⁷⁰ Pour les quelles choses dessus dites, il est appellé en son nom misericors et piteux et juste, |¹¹⁷¹ selon ce que nous enseigne le Psalmiste quant il dit en ceste maniere : |¹¹⁷² Misericordia tua, Domine, adjuvabat me, |¹¹⁷³ consolaciones tue letificaverunt animam meam, |¹¹⁷⁴ c’est a dire « O Sire Dieu, en toutes choses ta misericorde m’a aidé |¹¹⁷⁵ et tes bonnes consolacions ont esjouy mon ame. »

|¹¹⁷⁶ Car la misericorde de Dieu sauve le condampné quant et ainsi comme il luy plaist. |¹¹⁷⁷ Et, que ceste chose soit vraie, il appert en Marie Magdalene, la quelle Dieu, nostre doulx Createur, a sauvee par quatre parolles, c’est assavoir : |¹¹⁷⁸ Remittuntur tibi peccata multa, |¹¹⁷⁹ c’est a dire « Moult de pechiéz te sont remis et pardonnéz. » |¹¹⁸⁰ Semblablement, il sauva David par trois sillaibes quant il dit : |¹¹⁸¹ Peccavi, |¹¹⁸² c’est a dire : « J’ay pechié. » |¹¹⁸³ Et dois savoir et entendre [e v v] que ces trois sillaibes, c’est assavoir Peccavi, valent tant avec contricion que, par icelles, la flambe du cueur monte jusques au ciel. |¹¹⁸⁴ Pareillement, il a sauvé saint Mathieu par quatre sillaibes, |¹¹⁸⁵ c’est assavoir Sequere me, |¹¹⁸⁶ c’est a dire « Ensuy moi. » |¹¹⁸⁷ Et, avec ce, il a sauvé saint Pol par cinq paroles quant il dit : |¹¹⁸⁸ Domine, quid me vis facere, |¹¹⁸⁹ c’est a dire « O Sire, quelle chose veulx tu que je faces ? » |¹¹⁹⁰ Et, aussi, il a sauvé saint Pierre par ung petit de larmes quant il yssit hors de la compaignie des Juifz et qu’il commença a pleurer amerement.

|¹¹⁹¹ Et, pour ce, dit le prophete : |¹¹⁹² Melior est misericordia tua super vitas, |¹¹⁹³ ideo labia mea laudabunt te, |¹¹⁹⁴ c’est a dire « O Sire Dieu, ta misericorde vault mieulx sur toutes les vies des hommes. |¹¹⁹⁵ Pour ce, ma bouche te donnera louenge. »

|¹¹⁹⁶ Et est a noter que trois gerres, c’est a dire trois manieres, de pechiéz sont, qui sont sur tous les autres principaulx, c’est assavoir orgueil, luxure et avarice. |¹¹⁹⁷ Et du premier, c’est assavoir de orgueil, pecha Saül, qui est dit Paul, le quel en toute et sur toue maniere persecutoit l’Eglise de Dieu. |¹¹⁹⁸ Et du second, c’est assavoir de luxure, pecha David, le quel commit doublement adultere. |¹¹⁹⁹ Du tiers, c’est assavoir de avarice, pecha saint Mathieu, le quel estoit changeur, en tendant a avarice par art et desordonné prouffit.

|¹²⁰⁰ Touteffois, Dieu a esté appaisé par la penitance et contricion d’iceulx en telle maniere qu’il ne leur a pas seullement pardonné leurs pechiéz |¹²⁰¹ mais, avecques ce, merveilleusement les a colloquéz, accumuléz et assembléz en ses dons par sa grant misricorde. |¹²⁰² Car Paul, le grant persecuteur de l’Eglise, a fait grant predicateur et porteur de son nom tres loyal ; |¹²⁰³ David, fornicateur et homicide, a fait prince des prophetes ; |¹²⁰⁴ Mathieu, avaricieux et couvoiteux, a constitué apostre et premier evangeliste. |¹²⁰⁵ Et, en ces choses, il a demonstré sa misericorde.

|¹²⁰⁶ Pour ces causes, l’Evangile de Mathieu, les Pseaulmes de David et les Epistres de saint Paul sont plus souvent leues et recordees en l’Eglise |¹²⁰⁷ a demonstrer que la misericorde de Dieu est sy grande que quelconque pecheur, tant soit parfont en coulpe, s’il veult se convertir et demander et requerir humblement la misericorde de Dieu, qu’il ne l’obtienne.

|¹²⁰⁸ Et, en nulle maniere, le pecheur ne se doit desesperer quant [e vi r] il considere et qu’il regarde iceulx devant ditz avoir esté telz en coulpe |¹²⁰⁹ et, aprés, par la misericorde de Dieu, comme ilz ont esté montéz et mis en sa grace en ce siecle present |¹²¹⁰ et, le temps le quel leur estoit ad venir, come ilz ont esté et sont colloquéz en sa gloire. |¹²¹¹ Et cecy est la cause que David, aprés qu’il eust fait le Psaultier, composa ceste pseaulme, c’est assavoir Miserere mei, Deus, la quelle pseaulme est de remission. |¹²¹² Et icelle a voulu mettre entre les autres cinquantiesme, car ainsi comme l’an cinquantiesme – c’est a entendre l’an jubilé – est an de remission, c’est a dire l’an par le quel les pechiéz sont pardonnéz, |¹²¹³ en ceste maniere et par ceste exemple, les pechiéz venielz sont effacéz de ceulx qui dient ceste pseaulme Miserere mei, Deus avec contricion de cueur et confession de bouche.

|¹²¹⁴ Et dois noter que misericorde est en Nostre Seigneur sy grande qu’elle fait venir du ciel a nous celuy qui tant misericordieusement nasquit pour nous.

|¹²¹⁵ Et, pour ce, dit Lucas Dieu estre venu a nous pour esperance de utilité, ainsi qu’il est escript : |¹²¹⁶ Spiritus Domini eo quod unxit me, |¹²¹⁷ c’est a dire que « L’esperit de Dieu est venu en terre affin que je fusses oingt de sa misericorde ».

|¹²¹⁸ Et, premierement, il est venu pour la consolacion des povres, car il a voulu nasquir povre. |¹²¹⁹ Secondement, pour la guerison et medecine des contritz, c’est a dire des bleciéz par pechié. |¹²²⁰ Tiercement, pour la delivrance des prisonniers, c’est a dire des ames des saintz Peres et autres detenues en la prison d’enfer. |¹²²¹ Quartement, pour l’inluminacion des non enseignéz, c’est a dire de ceulx les quelz doivent congnoistre les merveilles de Dieu. |¹²²² Quintement, pour la remission des pechiéz, des quelz doit estre demandee misericorde. |¹²²³ Sixtement, pour faire le paiement de la debte de toute nature humaine. |¹²²⁴ Septiesmement, pour retribuer le merite de ceulx et celles qui accompliront les commandemans.

|¹²²⁵ En ces choses, donc, est moult declairee la grande misericorde de Dieu, |¹²²⁶ car, selon ce que saint Augustin nous dit : |¹²²⁷ Venit ad nos celestis negociator accipere contumelias nostras et dare nobis honores, subicere pro nobis mortem et dare nobis vitam sempoternam, accipere pro nobis ignominiam et dare nobis gloriam, |¹²²⁸ c’est a dire que « Le negociateur celestiel est venu a nous pour prendre notre honte [e vi v] et confusion et nous donner ses honneurs, se submettre a la mort et nous donner vie eternelle, prendre pour nous toute ignomineuseté et reproche pour nous donner sa gloire ».

|¹²²⁹ Et, semblablement, dit saint Gregoire : |¹²³⁰ Christus venit pro nobis in terra natus. |¹²³¹ Adversa petens, propsera contempnens, opprobria amplectans, gloriam fugiens, nova docens, mira faciens, prava nostra tolleravit, |¹²³² c’est a dire que « Jesucrist est venu en terre estre nasqui pour nous, |¹²³³ endurant choses adverses et contraires, contempnant les prosperitéz, embrachant toutes opprobres et injures, fuyant toute gloire mondaine, enseignant choses nouvelles, faisant miracles et choses merveilleuses, et toutes noz faultes a portees et soustenues ».

|¹²³⁴ Et, pour ceste cause, dit saint Bernard : |¹²³⁵ Necesse fuit ut Christus ad nos veniret ut, in nos per fidem habitans, illuminaret cecitatem nostram |¹²³⁶ et, in nobis manens, adjuvaret infirmitatem nostram et, pro nobis stans, fragilitatem nostram protegeret, |¹²³⁷ c’est a dire qu’« Il fut necessaire que Jesucrist vensist a nous affin que, icelluy habitant en nous, enluminast nostre aveuglement |¹²³⁸ et que, luy demourant avec nous, supportast et aydast nostre enfermeté et, estant pour nous, il deffendist nostre fragilité ».

|¹²³⁹ Et, pour ces causes, dit saint Ambroise : |¹²⁴⁰ Debent omnes christiani ad Christum confidenter accedere et in ejus misericordia indubitanter esperare, |¹²⁴¹ c’est a dire que « Tous crestiens doivent hardiment et confidentement approucher a Jesucrist et sans nulle doubte esperer en sa misericorde ». |¹²⁴² Et dit, aprés, que sa misericorde est sy grande que tous remedes peuent en icelle estre trouvéz.  |¹²⁴³ Et la cause sy est pour ce qu’il a soustenu toutes choses pour nous.

|¹²⁴⁴ Et s’ensuyt, se tu demandes estre gueri d’une plaie, c’est a dire d’aucun pechié estant en ton ame, va a luy, car il est vray medecin. |¹²⁴⁵ Se tu es en chaleur par aucune fievre, il est affreschissement et refrigeracion.  |¹²⁴⁶ Se tu es aggravé d’aucun pechié, il est justice. |¹²⁴⁷ Se tu es indigent et as necessité de ayde, il est vertu.  |¹²⁴⁸ Se tu es paoureux de la mort, icelluy est vie.  |¹²⁴⁹ Se tu desires le ciel, il en est la voie. |¹²⁵⁰ Se tu fuys tenebres, il est toute lumiere.  |¹²⁵¹ Et, se tu quiers viande, il est nourrissement. |¹²⁵² Par les quelles parolles, tu peux congnoistre que tant et telle est la [f i r] misericorde de Dieu que nul, en luy se confiant, ne peut en quelque maniere perir.

|¹²⁵³ Pense donc et considere maintenant que ceulx qui sont en enfer aymeroient au monde mieulx une petite espasse de heure affin qu’ilz impetrassent en brief temps la misericorde de Dieu |¹²⁵⁴ en disant tant seulement « Helas, helas, quelz et quantz pechiéz nous avons commis » |¹²⁵⁵ ou en disant « O Sire, aies pitié de moy, povre pecheur » |¹²⁵⁶ qu’ilz n’aymeroient toutes les richesses ou facultéz ou administracions de tout le monde. |¹²⁵⁷ Car ilz sçaivent bien que leur confidence la quelle ilz mettroient en Nostre Seigneur les sauveroit, la quelle chose ne feroit pas toutes les possessions du monde.

|¹²⁵⁸ Mais escoute ce que dit saint Martin au dyable : |¹²⁵⁹ Si misericordiam Dei humiliter implores, eam feliciter consequeris, |¹²⁶⁰ c’est a dire « Se tu requerois humblement la misericorde de Dieu, il te la donneroit joyeusement. » |¹²⁶¹ Et, adonc, respondit le dyable qu’il esliroit plustost demourer en enfer perdurablement. |¹²⁶² Pour la quelle chose est donné a entendre |¹²⁶³ que, aux hommes labourans a l’eure derraine et les quelz sont a mourir, le dyable, en tant qu’il peut, leur met en memoire les suggestions et temptacions de desesperance |¹²⁶⁴ affin que, en celle heure, ilz n’esperent point en la misericorde de Dieu.

|¹²⁶⁵ Et, ainsi, comme le dyable, par sa malice, veult et desire tous les hommes estre dampnéz, |¹²⁶⁶ au contraire, Dieu, par sa souveraine bonté et misericorde, veult tous les hommes estre sauvéz, |¹²⁶⁷ car, certainement, la misericorde de Dieu est greigneure pour nous deffendre que n’est la malice du dyable pour nous dampner. |¹²⁶⁸ Et ceste cause est a Dieu moult convenable, car il est appellé Jesucrist, c’est a dire « Roy Salvateur », |¹²⁶⁹ car il a fait son peuple sauf de leurs pechiéz, c’est assavoir du pechié originel, actuel et veniel.

|¹²⁷⁰ Et dois savoir que, pour guerir ces pechiéz, Jesucrist a receu pour nous trois manieres de playes. |¹²⁷¹ Premierement la playe du costé, affin qu’il guerist du pechié originel print sa naissance. |¹²⁷² Secondement la playe des mains, affin qu’il guerist du pechié actuel, car operacion est signifiee par les mains. |¹²⁷³ Tiercement la playe des piéz, affin qu’il guerist du pechié veniel, |¹²⁷⁴ car l’affection et voulenté est signifiée par les [f i v] piéz.

|¹²⁷⁵ En aprés Dieu est appellé Emmanuel, qui vault autant a dire come « Dieu soit avec nous », |¹²⁷⁶ car il est avec nous generalement par sa puissance, |¹²⁷⁷ car il est escript : |¹²⁷⁸ Portans omnia verbo virtutis sue, |¹²⁷⁹ c’est a dire que Dieu « porte toutes choses par la parole de sa vertu ». |¹²⁸⁰ Il est avecques nous especiallement par grace, car il est escript : |¹²⁸¹ Ubi duo vel tres congregati erunt in nomine meo, ibi in medio eorum sum, |¹²⁸² c’est a dire que « En quelque lieu que deux ou trois seront assembléz en mon nom, je seray au meilleu de eulx ».

|¹²⁸³ Il est avecques nous singulierement par union de nature, car il est escript : |¹²⁸⁴ Verbum caro factum est et habitavit in nobis, |¹²⁸⁵ c’est a dire que « La parole de Dieu est faicte chair et a habité en nous ». |¹²⁸⁶ Et dois noter que ce mot « parole » est prins pour « le Filz de Dieu ». |¹²⁸⁷ Et, quant il dit que elle « est faicte chair », il est a entendre qu’il « a pris nostre humanité ».

|¹²⁸⁸ Il est avecques nous sacramentellement par le delaissement qu’il nous a fait de son corps.  |¹²⁸⁹ Et de cecy, il est escript : |¹²⁹⁰ Qui manducat meam carnem et bibit meum sanguinem, in me manet et ego in illo, |¹²⁹¹ c’est a dire « Qui mengue ma chair et boit mon sang, il demeure en moy et moy en luy. »

|¹²⁹² Et dois savoir que Dieu, du quel la misericorde est si grande a ceulx qui le craingnent a fait en nous trois œuvres.

|¹²⁹³ La premiere œuvre est quant il ordonna le ciel pour nous donner aspiracion, la terre pour germer fruit, le soleil et la lune pour nous donner lumiere, la mer et l’air pour nous donner nourrisement.

|¹²⁹⁴ Toutes ces choses a donnees a l’omme, pour le quel ilz sont faictes, et non pas seullement ceulx cy mais, toutes celles que Dieu a eues, il nous les a donnees, |¹²⁹⁵ c’est assavoir son royaulme en possession, ainsy que luy mesmes dit : |¹²⁹⁶ Venite ad me, possidete regnum vobis paratum a constitucione mondi, |¹²⁹⁷ c’est a dire « Venéz a moy et possidéz le royaulme le quel vous est apparillé dés la constitucion du monde. »

|¹²⁹⁸ Il nous a donné son corps pour refection, car il dit : |¹²⁹⁹ Caro mea vere est cibus, |¹³⁰⁰ c’est a dire « Ma chair est la vraie viande. »

|¹³⁰¹ Il nous a donné son sang en oblacion, selon ce qu’il est escript : |¹³⁰² Lavit nos a peccatis nostris in sanguine suo, |¹³⁰³ c’est a dire : « Il nous a lavéz de noz pechiéz en son sang. »

|¹³⁰⁴ Il nous a donné son ame en redempcion, car il dit : |¹³⁰⁵ Animam meam pono pro ovibus meis, |¹³⁰⁶ c’est a dire [f ii r] « Je metz mon ame pour mes ouailles. »

|¹³⁰⁷ Il nous a donné sa deïté pour fruicion. |¹³⁰⁸ Et de ce est il escript : |¹³⁰⁹ Hec est vita eterna ut credant te solum verum Deum, |¹³¹⁰ c’est a dire « Vecy la vie eternelle a ceulx qui croient toy seul estre vray Dieu. »

|¹³¹¹ En ces choses est la grande misericorde de Dieu congnue et manifestee.

|¹³¹² La seconde œuvre que Dieu a faicte en nous est de la redempcion.

|¹³¹³ Certainement, nostre Dieu a fait toutes choses par nombre, par poix et par mesure, excepté l’œuvre de nostre redempcion, |¹³¹⁴ car tu dois savoir qu’en ce il n’a point gardé le nombre, |¹³¹⁵ c’est assavoir qu’il ait donné une goute ou deux ou trois de son sang, combien qu’il fust ainsi que une goutte tant seulement fust et estoit suffisante pour la redempcion de tout le monde. |¹³¹⁶ Ne aussi il n’a point gardé le poix, c’est assavoir qu’il en espandit une once ou une livre tant seulement. |¹³¹⁷ Ne il n’a point gardé mesure, c’est assavoir qu’il en mesurast ung calice ou deux, mais a tout baillé en païement. Il a tout donné, il a tout espandu. |¹³¹⁸ Et, a ce propos, dit le Psalmiste : |¹³¹⁹ Copiosa apud eum est redempcio, |¹³²⁰ c’est a dire « La redempcion est envers Dieu tres habondante », |¹³²¹ car il a racheté Israhel de toutes ses iniquitéz.

|¹³²² Ainsi donc, Jesucrist, en nous rachetant, n’a pour luy rien retenu, mais pour nous a tout espandu et luy mesmes pour nous s’est anichilé et anyenti. |¹³²³ Il a esté perché jouxte le cueur pour demonstrer et declairer qu’il a esté en ses benefices franc et large. |¹³²⁴ Et, ainsi come le vesseau perché ne retient rien, ainsi Jesucrist en nous rachetant misericordieusement n’a pour luy rien retenu.

|¹³²⁵ Il a esté crucifié par les piéz pour demonstrer qu’il a porté le poix de tous noz pechiéz, |¹³²⁶ car il est escript : |¹³²⁷ Vere langores nostros ipse tulit et dolores nostros ipse portavit, |¹³²⁸ c’est a dire « Certainement nostre Dieu a souffert noz langueurs et iceluy a porté noz douleurs. »

|¹³²⁹ Il a esté aussi estendu en la croix a demonster que sa misericorde et son amour, par les quelz il nous a rachetéz, demourront eternellement, |¹³³⁰ car l’Apostre dit en ceste maniere : |¹³³¹ Quis nos separabit a caritate Christi ? |¹³³² Tribulacio an angustia an persecucio ? |¹³³³ c’est a dire « Qui sera ce qui nous separera de la charité Jesucrist ? |¹³³⁴ Sera ce tribulacion ou angoisse ou persecusion ? »

|¹³³⁵ Ainsi come s’il voulsist dire et respondre que nulle chose ne nous pourroit [f ii v] separer de la charité de Jesucrist, |¹³³⁶ car il est escript : |¹³³⁷ Ecce, ego vobiscum sum omnibus diebus usque ad consummacionem seculi, |¹³³⁸ c’est a dire « Certainement, je suis avecques vous jusques a la fin et consummacion du monde. » |¹³³⁹ Et en cecy est plus grande misericorde de Dieu.

|¹³⁴⁰ La tierce operacion est de glorificacion, la quelle sera consummee et acomplie aprés ceste vie presente, |¹³⁴¹ quant nous serons glorifiéz, l’ame avec le corps, et que nous regnerons perpetuellement et eternellement avec Dieu.

|¹³⁴² Et adonc sera jour sans nulle nuyt, lumiere sans tenebres, joyes sans fin, ainsi comme l’Apostre dit : |¹³⁴³ Quod oculus non vidit nec auris audivit nec in cor hominis ascendit que preparavit Deus diligentibus se, |¹³⁴⁴ c’est a dire que « Oeul oncques ne veist ne oreille ne ouyt ne sy ne monta en cueur de homme les choses les quelles Dieu a appareillees a ceulx qui l’ayment ».

|¹³⁴⁵ Et ceste glorificacion de l’omme commença Dieu quant il le fit a sa similitude. |¹³⁴⁶ Et, a ce propos, dit le Psalmiste : |¹³⁴⁷ Signatum est super nos lumen vultus tui, Domine. Dedisti leticiam in corde meo, |¹³⁴⁸ c’est a dire « O Sire Dieu, la lumiere de ton visage est signee sur nous et, de ce, tu as donné lyesse a mon cueur. »

|¹³⁴⁹ Et dois noter que Dieu n’a pas voulu avoir parenté avec nature angelique mais avec nature humaine, |¹³⁵⁰ la quelle il a plus aymee |¹³⁵¹ et la quelle il a composee a son ymage et similitude |¹³⁵² et la quelle, aprés toutes ces choses, a tant seulement voulu racheter, |¹³⁵³ car saint Paul dit : |¹³⁵⁴ Nusquam angelos comprehendit sed semen Abrahe, |¹³⁵⁵ c’est a dire qu’« Il n’a pas prins fourme d’ange mais a prins la semence de Abraham ».

|¹³⁵⁶ Et, par ceste chose, on peut considerer qu’il y a entre Dieu et homme greigneure affinité, greigneure consanguinité de lignage et greigneure fermeté de cognacion et parenté que entre Dieu et les anges. |¹³⁵⁷ Et, en cecy, la tres grande misericorde de Dieu est manifestee.

|¹³⁵⁸ Saint Bernard dit en ceste maniere : |¹³⁵⁹ Securum accessum habemus Matrem. |¹³⁶⁰ Filius obtendit Patri latus et vulnera, et Mater obtendit Filio pectus et ubera, |¹³⁶¹ c’est a dire que « Nous avons sceur approchement envers Dieu pourtant que nous avons son Filz devers luy et envers le Filz nous avons sa Mere. |¹³⁶² Le Filz demonstre au Pere ses playes et son costé, et la Mere monstre a son Filz sa poeterine et [f iii r] ses mammelles ». |¹³⁶³ Par quoy il est impossible que, en lieu ou il y a tant d’enseignes de pitié, que aucune requeste y peut estre reboutee.

|¹³⁶⁴ O bon Jesus, combien et comment as tu doulcement conversé avec les hommes ! |¹³⁶⁵ Quantz grans dons habondamment leur as tu eslargis, dures paroles, durs batemens et tres durs tourmens de la croix as tu voulu endurer pour les homes !

|¹³⁶⁶ Certainement, Dieu a voulu estre tempté pour nous affin qu’il sourmontast toutes les temptacions du dyable. |¹³⁶⁷ Il a souffert affin qu’il asubjectist toutes passions.  |¹³⁶⁸ Il a souffert mort affin qu’il recouvrast la vie eternelle. |¹³⁶⁹ Il a eu fain affin qu’il nous refectionnast. |¹³⁷⁰ Il a eu soif affin que a nostre soif il administrast utile boisson. |¹³⁷¹ Il a esté tempté affin qu’il nous delivrast de toutes les temptacions du dyable.  |¹³⁷² Il a esté demoqué affin que nous fussons delivréz de moquerie dyabolique.  |¹³⁷³ Il a esté lié affin qu’il nous deslyast et mist hors du nou du dyable d’enfer. |¹³⁷⁴ Il s’est humilié affin qu’il nous eslevast et exaltast au ciel.  |¹³⁷⁵ Il a esté despoullé affin qu’il couvrist la nudité de la premiere transgression par indulgence. |¹³⁷⁶ Il a prins couronne d’espines affin qu’il nous donnast les fleurs de paradis les quelles nous avyons perdues. |¹³⁷⁷ Il a esté pendu au bois de la croix affin qu’il adnichillast par le bois et mist a nyent la concupiscence et le desir du premier parent. |¹³⁷⁸ Il a esté abrevé de fiel et de vin aigre affin qu’il menast et conduysist l’omme a la terre celestielle, c’est a dire a l’Eglise triumphante, habondante de lait et de miel. |¹³⁷⁹ Il a receu mortalité affin qu’il fust, aprés ces choses avecques nous, participant son immortalité.  |¹³⁸⁰ Il a esté enseveli affin qu’il donnast benediction a nos sepultures. |¹³⁸¹ Il est ressuscité de mort affin qu’il nous demonstrast estre ressuscitéz au jour du Jugement et affin qu’il nous rendist la vie eternelle. |¹³⁸² Il est monté aux cieulx pour nous ouvrir les portes celestielles.  |¹³⁸³ Il syet a la dextre de Dieu le Pere affin qu’il essausse les prieres de ceulx qui croient en luy et affin qu’il les offre a Dieu le Pere avecques les playes les quelles il a souffertes pour nous. |¹³⁸⁴ Il a prins nostre povreté, temptacion, tristesse, douleur et mort affin que, en ces choses, il fust semblable a nous et affin qu’il congneust [f iii v] mieulx noz miseres |¹³⁸⁵ et affin que, plus facilement et legierement, il feust encliné a estre doulz, piteux et misericordieux.

|¹³⁸⁶ Et appartenoit qu’il fust en toutes choses semblable a nous, qui sommes ses freres, affin qu’en toutes choses il feust misericordieux, |¹³⁸⁷ car, en ce qu’il a souffert, iceluy puissant a esté tempté affin que luy existent secourust misericordieusement a ceulx qui sont temptéz et que justement il leur feust en ayde. |¹³⁸⁸ Au quel est honneur, vertu et gloire par les infinis siecles des siecles. |¹³⁸⁹ Amen.

---

⁷⁴³ Note : Paul, Épitre aux Hébreux, 11, 6.
⁷⁵⁹ Note : L’idée se trouve chéz Augustin, De vera religione, mais sa formulation est chéz Thomas, Summa Theologiae, I, II, LXXI.
⁷⁶² Note : Isidore de Séville, De summo bono, III, 4 (De tolerentia divine correptionis).
⁷⁶⁶ Leçon non conservée : estre manque
⁷⁸⁴ Note : Paul, Épitre aux Romains, 10, 10.
⁷⁹³ Note : Paul, Épitre aux Romains, 10, 10.
⁸⁰⁸ Note : Léon I^er, De Nativitate domini, XXVII, 3
⁸¹⁶ Note : Léon I^er, De Nativitate domini, XXVII, 3
⁸²¹ Note : Bible de Jérusalem, Écclésiastique, 27, 6
⁸²⁴ Note : Job, 23, 10
⁸²⁷ Note : Pierre, Première lettre, 1, 7
⁸³⁰ Note : Livre de Tobie, XII
⁸³⁴ Leçon non conservée : non sustineamus – Note : Job, 2, 10
⁸³⁹ Note : Psaumes, 6, 2
⁸⁴² Note : Matthieu, 26, 38
⁸⁴⁵ Note : Marc, 15, 34
⁸⁴⁸ Note : Ésaïe, 54, 7
⁸⁴⁹ Leçon non conservée : meam ad t
⁸⁵⁹ Leçon non conservée : cribaret – Note : Luc, 22, 31
⁸⁹⁶ Note : Aristote, Éthique à Nicomaque, II, 2, 123
⁹⁰⁰ Note : Jean, 21, 18
⁹⁰¹ Leçon non conservée : alins te
⁹⁰² Leçon non conservée : ou u vouloies
⁹⁰⁸ Note : Paul, Première Épitre aux Corinthiens, 3, 2.
⁹¹⁷ Note : Matthieu, 17, 4
⁹²⁰ Note : Matthieu, 26, 72
⁹²⁸ Leçon non conservée : sublevamen – Note : Ecclésiaste, 4, 10
⁹³⁴ Leçon non conservée : consilii – Note : Actes des Apôtres, 5, 41
⁹³⁸ Note : Paul, Deuxième Épitre aux Corinthiens, 2, 7
⁹⁴⁶ Note : Ecclésiaste, 3, 1.
⁹⁷⁹ JNote : ean, Première lettre, 4, 1.
⁹⁸³ Note : Le passage cité renvoie en réalité à Bernard de Clairvaux, Sermones in Cantica canticorum, XLIX.
⁹⁸⁷ Note : Augustin, De anima et spiritu, XXVII.
¹⁰⁰² Note : Job, 7, 14
¹⁰⁰⁸ Note : Prudence, Cathemerinon, Hymnus 6.
¹⁰¹⁸ Note : Bonaventure, Sermones de decem praeceptis (III), Stimuli Amoris, XII.
¹⁰³⁹ Leçon non conservée : en tou cœur
¹⁰⁷⁷ Note : Augustin, Sermo contra judaeos, Parganos et Arianos.
¹⁰⁹⁵ Note : Psaumes, 135, 6.
¹⁰⁹⁹ Note : Oratio Dominicae XXVI (prière du X^e dimanche après la Pentecôte).
¹¹⁰⁶ Note : Psaumes, 94, 18
¹¹⁰⁹ Note : Matthieu, 12, 7
¹¹¹⁹ Note : Paul, Épitre aux Romains, 4, 10
¹¹²⁴ Note : Psaumes, 57, 11
¹¹²⁸ Note : Psaumes, 86, 13
¹¹³² Note : Psaumes, 119, 64.
¹¹³⁶ Note : Psaumes, 147, 5
¹¹⁴⁵ Note : Jean Chrysostome, Homélie XLVI sur l’évangile selon saint Matthieu, XXIII.
¹¹⁵⁴ Note : Psaumes, 35, 6.
¹¹⁵⁷ Note : Ésaïe, 30, 18.
¹¹⁶¹ Note : Bible de Jérusalem, Ecclésiastique, 51, 6.
¹¹⁷² Note : Psaumes, 94, 18
¹¹⁷⁸ Note : Luc, 7, 47
¹¹⁸¹ Note : Deuxième livre de Samuel, 12, 13
¹¹⁸⁵ Note : Matthieu, 8, 22
¹¹⁸⁸ Note : Actes des Apôtres, 9, 6.
¹¹⁹² Note : Psaumes, 63, 4-6.
¹²¹³ Note : Psaumes, 51, 2
¹²¹⁶ Note : Luc, 4, 18
¹²²⁷ Note : L’idée se trouve chéz Augustin, mais le texte cité est celui de Jacques de Voragine, Legenda aurea, I (qui attribue le passage au pape Léon)
¹²³⁰ Note : Grégoire I^er, Moralia in Job, II, XXXIV
¹²³⁵ Note : Bernard de Clairvaux, Sermo VII de Advenu Domini
¹²⁴⁰ Note : Référence à Ambroise non identifiée
¹²⁵⁹ Note : Référence à Martin non identifiée
¹²⁷⁸ Note : Paul, Épitre aux Hébreux, 1, 3
¹²⁸¹ Note : Matthieu, 18, 20
¹²⁸⁴ Note : Jean, 1, 14
¹²⁹⁰ Note : Jean, 6, 57
¹²⁹⁶ Note : Matthieu, 25, 34
¹²⁹⁹ Note : Jean, 6, 5
¹³⁰² Note : Apocalypse, 1, 5
¹³⁰⁵ Note : Jean, 10, 15
¹³⁰⁹ Note : Jean, 17, 3
¹³¹⁹ Note : Psaumes, 129, 7
¹³²⁷ Note : Ésaïe, 53, 4
¹³³¹ Note : Paul, Épitre aux Romains, 8, 35
¹³³⁷ Note : Matthieu, 28, 20.
¹³⁴³ Note : Paul, Première Épitre aux Corinthiens, 2, 9.
¹³⁴⁷ Note : Psaumes, 4, 7.
¹³⁵⁴ Note : Paul, Épitre aux Hébreux, 6, 13
¹³⁵⁶ Leçon non conservée : greigneure affinite greigneure
¹³⁵⁹ Note : Bernard de Clairvaux, Homiliae super Missus est
¹³⁸⁴ Leçon non conservée : seblable