|¹³⁹⁰ Exhortacions singulieres que doit faire le prestre au malade.

|¹³⁹¹ Aprés ces choses doit le prestre singulierement exhorter le malade que pacientement et benignement il soustienne ceste enfermeté et maladie, la quelle est de Dieu envoiee, |¹³⁹² en luy disant que, se l’enfermeté du corps est bien portee joyeusement et sans murmure, elle engendrera la santé de l’ame |¹³⁹³ et qu’il ne contempne pas la correction et discipline de Dieu, duquel seul est le salut de l’ame, |¹³⁹⁴ mais rende plustost graces a Dieu le flagellant et luy donnant en ceste maniere correction.

|¹³⁹⁵ Et, pour ce, dit Salomon, en ses Proverbes : |¹³⁹⁶ Flagellat autem Dominus omnem filium quem recipit, |¹³⁹⁷ c’est a dire que « Dieu corrige tout enfant qu’il reçoit » et veult recevoir en sa grace.

|¹³⁹⁸Item, le prestre pourra admonnester au malade le contempnement de ceste vie presente et l’appetit et desir de la mort, en la maniere qui s’ensuyt :

|¹³⁹⁹ O mon amy, se tu pensoies parfondement le dangier de ceste meschante vie, tu desireroies joyeusement et couvoiteroies mourir en Jesucrist.|¹⁴⁰⁰ Comme dit saint Jehan, en son Apocalipse : |¹⁴⁰¹ Beati mortui, qui in Domino moriuntur, |¹⁴⁰² c’est a dire « Benoitz sont ceulx qui meurent en Jesucrist ». |¹⁴⁰³ Considere, mon amy, la vie presente, qui est, au commencement, plaine de douleur, au moien est faicte angoisseuse et corrumpue de pechiéz et, en la fin, elle est menachante de paine doublee et intollerable. |¹⁴⁰⁴ Et regarde et considere se tu dois point plus appeter, requerir ou demander bien mourir que vivre mauvaisement, |¹⁴⁰⁵ car, come dit Cathon : |¹⁴⁰⁶ Nemo sine crimine vivit, |¹⁴⁰⁷ c’est a dire que « Nul ne vit sans pechié. » |¹⁴⁰⁸ Et cecy nous advertissoit l’Apostre quant il disoit : |¹⁴⁰⁹ Cupio dissolvi et esse cum Christo, |¹⁴¹⁰ c’est a dire « Je desire estre deslyé de ce corps et estre avecques Jesucrist ».

|¹⁴¹¹ Et [f iiii r] aprés doit le prestre dire : |¹⁴¹² « O mon amy, qui sera celuy qui sera suffisant pour nombrer et declairer les tristesses et angoisses de ceste vie presente, |¹⁴¹³ comme avoir soif, avoir fain, avoir chault, avoir froit, estre lassé et travaillé et autres choses ainsi comme innombrables et, par coustume, ces choses estre demourantes en nostre propre maison ! |¹⁴¹⁴ Avec ces choses sont autres qui portent moult de grans dommages a nostre esperit et qui sont choses moult griefves, |¹⁴¹⁵ c’est assavoir couvoiter, commettre fornicacion ou advoutrise, ravir, embler, tuer, meurdrir, se couroucier, haÿr |¹⁴¹⁶ et moult d’autres choses les quelles sont nuysibles a l’esperit, des quelles nul ne pourra estre plainement delivré sy non par la mort. |¹⁴¹⁷ Ces choses considerees, qui est celuy sage qui ne desireroit la mort ! |¹⁴¹⁸ Et, pour ce, saint Augustin, parlant a la mort, dit ainsi : |¹⁴¹⁹ O mors, desiderabilis finis omnium malorum presencium, laboris clausura, quietis principium, quis cogitare potest utilitates tuarum beatitudinum !, |¹⁴²⁰ c’est a dire ‘O mort beneuree, la quelle on doit desirer, car tu es la fin de tous maulx presens, cloture et fin de tout labour, commencement de repos, qui est celuy qui peut penser les utilitéz de tes beatitudes !’ |¹⁴²¹ Pour ceste cause, mon amy, tant come tu passes ceste voie, aies tousjours ferme foy, |¹⁴²² car l’Apostre dit |¹⁴²³ que ‘Sans foy, il est impossible plaire a Dieu’ et tout ce qui n’est de foy est pechié. |¹⁴²⁴ Et, pour ce, dit saint Augustin : |¹⁴²⁵ Fides est que primo subjungat animam Deo, deinde ad precepta, |¹⁴²⁶ c’est a dire que ‘Foy est ce qui premierement joint l’ame a Dieu et en aprés aux commandemens’. |¹⁴²⁷ Par les quelz, quant ilz sont gardéz, nostre foy est confermee, charité est nourrie et aprés commence a resplendir la chose la quelle on croit tant seulement par foy. |¹⁴²⁸ Pour ce, se tu veulx estre beatifié, soies ferme en la foy, |¹⁴²⁹ car l’Apostre dit que |¹⁴³⁰ ‘Par foy, tu verras Dieu ainsi qu’il est’, qui est moult grant promesse. |¹⁴³¹ Et saint Augustin dit |¹⁴³² que ‘Le Louyer de la foy est l’entendement’. »

¹³⁹⁶ Note : Le passage cité se trouve chez Paul, Épitre aux Hébreux, 12, 6
¹⁴⁰¹ Note : Apocalypse, 14, 13.
¹⁴⁰³ Leçon non conservé : corrumpuee
¹⁴⁰⁶ Note : Disticha Catonis, I, 5.
¹⁴⁰⁹ Note : Paul, Épitre aux Philippiens, 1, 23.
¹⁴¹⁹ Note : Augustin, De vistatio infirmorum, I, VI.
¹⁴²³ Note : Paul, Épitre aux Hébreux, 11, 6
¹⁴²⁵ Note : Augustin, De agone christiano, XIII
¹⁴³⁰ Note : Paul, Épitre aux Hébreux, 11, 6
¹⁴³² Note : Augustin, De agone christiano, XIII