|⁷⁵⁸ La tres utille conclusion que fait l’acteur en la fin de son livre et commence ou latin Si moriturus, et cetera.

cviii ra] |⁷⁵⁹Pour faire la conclusion de ceste bonne et salutaire doctrine, l’acteur dit |⁷⁶⁰ que, si aux as[cvii rb]saulx de la mort le pacient peut encore parler et avoir usance de raison, |⁷⁶¹ il doit faire de cueur et de bouche ses oraisons a Dieu le Pere [cviii va] createur en priant sa tres saincte misericorde |⁷⁶² et, par la vertu de la tres fructueuse passion de son benoist filz Jhesucrist, il ne vueille recevoir en sa grace. |⁷⁶³ Aprés ce doit invoquer et appeler la benoiste Vierge Marie |⁷⁶⁴ pour son advocate envers Dieu, |⁷⁶⁵ pareillement aussi son bon ange qui l’agarde et generalement tous les sainctz et sainctes de paradis, |⁷⁶⁶ qu’ilz vueillent prier Dieu pour lui en ayant tousjours la croix et remembrance de la passion devant soy, laquelle baiser on lui fera.

|⁷⁶⁷ En default, s’il puelt parler, ce vers ou il est escript : |⁷⁶⁸Disrupisti, Domine, vincula mea. |⁷⁶⁹Tibi sacrificabo hostiam laudis, |⁷⁷⁰ qui est a dire en françois : |⁷⁷¹  « Sire, tu as desrompu mes liens, |⁷⁷² je te sacrifieray l’ostie de louenge. » |⁷⁷³ Et le doit dire par trois fois, |⁷⁷⁴ car, selon Cassidore, le vers est de telle vertu que, par le dire devotement et en bonne contricion, en la fin les pechéz de la personne sont pardonnéz. |⁷⁷⁵Item, on lui doit faire dire, s’on peult, les motz ensuivans, que on attribue a saint Augustin, c’est assavoir : |⁷⁷⁶ « La paix de Nostre Seigneur Jesucrist, la vertu de sa benoiste passion, le signe de sa saincte croix, |⁷⁷⁷ la tres entiere et pure integrité de la Vierge Marie, la benediction de tous les saincts et sainctes, |⁷⁷⁸ la garde des anges et toutes les intercessions et suffra[b]ges des esleuz de Dieu soyent entre moy et mes ennemis visibles et invisibles en ceste heure de ma mort. |⁷⁷⁹Amen. » |⁷⁸⁰ Et les doit dire le languissant trois fois s’il peult ou aucune bonne personne pour lui. |⁷⁸¹ Oultre plus dit l’acteur et enseigne a toute sage personne d’acquerir en sa vie aucun feal amy et bon compagnon a qui il ayt ferme confidence, |⁷⁸² le quel lui assiste en l’article de la mort pour lui donner bonne et ferme constance de vouloir au plaisir prendre la mort a bon gré, |⁷⁸³ car ung tel amy peult moult valoir et prouffiter. |⁷⁸⁴ Et si en cest estat la creature meurt et qu’on voye qu’il ait eu les condicions dessus mises en sa mort avec les prieres que aucuns siens amis font et font faire pour lui, |⁷⁸⁵ on peut croire que Dieu lui a fait grace et voulu recevoir en sa gloire de paradis. |⁷⁸⁶ A la quelle nous conduie le Pere, le Filz et le benoist Saint Esperit. |⁷⁸⁷Amen.

⁷⁵⁹ Variante de W : que ainsi aux – Note : Une illustration pleine page, seules les quatre dernières lignes sont occupées par le texte sur deux colonnes.
⁷⁶⁸ Note : Psaumes, 115, 16-17
⁷⁶⁹ Note : Psaumes, 115, 8
⁷⁸¹ Variante de W : toute bonne personne te sage d’
⁷⁸² Variante de W : donner ferme et bonne c.
⁷⁸⁶ Note : Aprés 550, W ajoute Cy finist le livre intitulé l’art de bien mourir.
⁷⁸⁷ Note : Un cadre décoré portant en son centre l’indication Le rouge.