[43v]

|⁵¹⁴ Devote oraison de l’ame raisonnable a Nostre Seigneur Jhesucrist pour recepvoir le sainct sacrement de l’autel.

|⁵¹⁵ O bon Jhesus, combien que soys indigne,

|⁵¹⁶ Pour les pechéz que j’ay faiz et commis,

|⁵¹⁷ De m’approcher du sacrement tres digne

|⁵¹⁸ Lequel est cy en ma presence mys,

|⁵¹⁹ Ce nonobstant, parce qu’avéz promis

|⁵²⁰ Salut a qui le prendra dignement,

|⁵²¹ Je m’y presente en foy devotement.

|⁵²² Mon bon Jhesus, que je m’estime digne

|⁵²³ Le recepvoir impossible seroit,

|⁵²⁴ Mais je m’attendz a la doulceur benigne

|⁵²⁵ De vous Jhesus, qui rigueur ne feroit.

|⁵²⁶ Las ! Cestuy la lequel s’estimeroit

|⁵²⁷ Tant juste et bon qu’i fut digne vous prendre,

|⁵²⁸ Je croy, Jehsus, qu’i pourroit trop mesprendre.

|⁵²⁹ O bon Jhesus, je croy pour verité

|⁵³⁰ Que ce que voy, c’est vous et non plus pain.

|⁵³¹ C’est vostre corps. Vostre ame et Deïté

|⁵³² Y sont aussi, mon cueur en est certain,

|⁵³³ Par le vouloir divin et souverain

[44r] |⁵³⁴ Et la vertu de voz sainctes parolles

|⁵³⁵ Qu’a dict le prebstre et non par parabolles.

|⁵³⁶ O bon Jhesus, ce divin sacrement,

|⁵³⁷ Avant mourir, en ce monde ordonnastes

|⁵³⁸ Et, pour des bons estre le saulvement,

|⁵³⁹ Divinement vous mesmes instituastes,

|⁵⁴⁰ Ainsi le croy, et que vous declairastes

|⁵⁴¹ Que ceulx lesquelz dignement le prendroit

|⁵⁴² Apprés leur mort vie eternelle auroient.

|⁵⁴³ O bon Jhesus, j’ay faict preparatifz

|⁵⁴⁴ Vous recepvoir, comme ordonne l’Eglise,

|⁵⁴⁵ Soubz ceste espece en cueur lamentatifz

|⁵⁴⁶ Dont je n’ay pas si bonne peine mise

|⁵⁴⁷ A preparer par bonne et saincte guise

|⁵⁴⁸ Mon ame et corps ainsy qu’il appertient,

|⁵⁴⁹ Dont en douleur tristesse mon cueur tient.

|⁵⁵⁰ O bon Jhesus, saichant la gravité

|⁵⁵¹ De mes pechéz, je crains et faiz doubtance

|⁵⁵² De recepvoir la vostre humanité

|⁵⁵³ De Deïté par mon insuffisance,

|⁵⁵⁴ Mais, bon Jhesus, je prens ma suffisance

|⁵⁵⁵ En la grandeur de vostre charité,

|⁵⁵⁶ Misericorde et grant benignité.

|⁵⁵⁷ O bon Jhesus, je vous prie qu’i vous plaise

[44v] |⁵⁵⁸ Me pardonner et me donner la grace

|⁵⁵⁹ Qu’en vouloir, faict et dict ne vous desplaise

|⁵⁶⁰ Et quant a vous mieulx que n’ay faict je face,

|⁵⁶¹ Semblablement, avant que je desplace

|⁵⁶² De ce lieu cy, je puisse a saulvement

|⁵⁶³ Vous recepvoir et non a dampnement.

|⁵⁶⁴ O bon Jhesus, en prenant vostre corps,

|⁵⁶⁵ Le goust me fault, le toucher et le veoir,

|⁵⁶⁶ Mais a l’ouyr tres bien je me recors

|⁵⁶⁷ Qu’il fault par foy congnoissance en avoir ?

|⁵⁶⁸ Je vous congnois sans vous apercevoir

|⁵⁶⁹ Et vous adore, humanité latente

|⁵⁷⁰ Et Deïté, par foy vraye et patente.

|⁵⁷¹ Oraison apprés communie.

|⁵⁷² O bon Jhesus, humblement vous mercye

|⁵⁷³ Dont vous a pleu de vostre sang et corps

|⁵⁷⁴ Rassasier mon ame qui se fie

|⁵⁷⁵ Du tout en vous, o Dieu misericors.

|⁵⁷⁶ Je croy qu’ay faict avec vous mes accors.

|⁵⁷⁷ Par quoy vous prie demeurer avecq moy

|⁵⁷⁸ Et moy en vous par bonne et vraye foy.

|⁵⁷⁹ O bon Jhesus, que se sainct sacrement

|⁵⁸⁰ Soit de peché l’evacuation,

|⁵⁸¹ De tous abuz l’entier contemnement,

[45r] |⁵⁸² De volupté l’extermination,

|⁵⁸³ De tout peché l’abhomination

|⁵⁸⁴ Et de vertuz le chemin et la voye

|⁵⁸⁵ A celle fin qu’en paradis vous voye.

|⁵⁸⁶ O bon Jhesus, que ce soit ma deffence

|⁵⁸⁷ Et ferme escu contre mes ennemis.

|⁵⁸⁸ Mon instructeur pour plus ne faire offence,

|⁵⁸⁹ Le protecteur de parens et amys.

|⁵⁹⁰ Par sa vertu mon vouloir soit submis

|⁵⁹¹ A vous servir et me doint patience,

|⁵⁹² Charité, foy, esperance et science.

|⁵⁹³ Explicit