[36r]

|³⁷⁵ Complaincte du pecheur qui se treuve es latz de la mort et en voie de dampnation.

|³⁷⁶Helas, helas et plus que helas, moy tres meschante creature chetive, qui en angoisse et amertume de corps et d’esperit me treuve seul sans nul secours quelconques |³⁷⁷ et ne sçay creature au monde a qui, veu le grant dangier ou je suis presentement, je puisse ny ose avoir fiance nulle dont avoir ou esperer puisse allegement, |³⁷⁸ car mes parens et amys, a qui avoye toute fiance, sont ceulx qui, jusques a ce dangereux et douloreux pas de mort duquel je suis pris et surpris come au trebuchet, me ont, par une subtille maniere de traïson, conduict accompaigné en ryz et jeux |³⁷⁹ sans me donner congnoissance de l’horrible angoisse en quoy me sens presentement enveloppé en corps et en ame, auquel latz je couroye avecq eulx !

|³⁸⁰ O moy tres malhereuse creature ! |³⁸¹ Pour quoy ne consideroye je, alors que en santé estoye, l’horrible dangier et cruelle angoisse |³⁸² qui vient a toute creature mortelle et mesment aux pecheurs quant il approchent les traces de la mort, es quelles douloureusement je labeure ! |³⁸³ Certes, [36v] bien debvoye considerer, si le monde ne le dyable ne m’eussent bendéz les yeulz du cueur moy estant en prosperité, |³⁸⁴ combien que tousjours doubtoye de la mort ouyr parler et recremoye la ouyr nommer et ne sçavoie ymaginer ne aultruy veoir mourir sans ayde et destressé. |³⁸⁵ Or me sens d’elle assailly presentement comme en traïson et seursault et ne puis fouyr pour me mucer, |³⁸⁶ car en si grant angoisse me sens de tous costéz assailly que en riens, fors qu’a ma douleur, ne puis entendre |³⁸⁷ et si me seroit tres neccessaire que au salut de ma povre ame je entendisse, qui est en danger de habiter es griefves habitations d’enfer. |³⁸⁸ Et oncq parfaictement une seulle heure de bien en mon vivant ne vouluz faire ny entendre, cuydant tousjours y venir assez a temps quant je sentyroie la fin approcher de ma mort. |³⁸⁹ Or apperçoy veritablement que trop me suis abusé, |³⁹⁰ car je suis de douleur, d’angoisse, de paour et d’esbahyssement confondu tellement que a nulle chose salutaire ne puis nullement entendre. |³⁹¹ Et aussy apperçoy bien que a jeu perdu n’a que muer ne que dire. |³⁹² Helas, chetive creature que je suis ! |³⁹³ Comment [37r] ay je despendu et consumé le temps sy innutillement, qui est sy precieux pour mon salut et estoit prest. |³⁹⁴ Et, tousjours, au contraire de luy j’ay ouvré et faict tant de maulx que de Dieu, de saincte Eglise |³⁹⁵ ne de tous ses commandemens n’ay tenu compte mais les ay despriséz : |³⁹⁶ veux briséz, penitences enfrainctes, promesses faulces, deffences faictes au contraire, |³⁹⁷ dont remors de conscience a mon cueur murdry et rongé tellement d’aultre part que ycelle seulle douleur m’est griefve assez pour prandre la mort. |³⁹⁸ Sy j’estoie en santé dont, pour la paour des choses dessus dictes, mon ame s’efforce de demeurer dedans le corps, mais durement elle est contraincte de vuyder. |³⁹⁹ Helas, povre creature, quant je considere que suis allé hors de la voye de mon salut qui est estroicte, come apperçoy maintenant, je treuve large la voye de dampnation que tiennent plusieurs. |⁴⁰⁰ O chetive creature, si de present avoye ung seul jour de temps que gastent moult de creatures innutilles maintenant ainsy come j’ay faict le myen, |⁴⁰¹ veritablement je promectroye a Dieu mon Createur de promtement, doulcement et de vraye penitence [37v] prendre d’iceulx jours perduz et faire le salut de mon ame, |⁴⁰² car il m’est advis que riens ne me seroit a gouverner et ung blanc denier en plus que de dix mille florins, qui oncques en mon vivant ne m’ay sceu gouverner. |⁴⁰³ Et, pour ce, je congnois que peu me seroit, au salut de mon ame, ung seul jour, |⁴⁰⁴ veu que en cent jours ne feiz oncques fors que tous maulx. |⁴⁰⁵ Helas, bien douloureusement j’apperçoy que vie sans ame devient hastive mort. |⁴⁰⁶ Mort est medecine a la creature, |⁴⁰⁷ car celluy qui moingz vit moingz empire et aussy moingz accroist de pechéz. |⁴⁰⁸ O povre creature que je suis, bien doiz mauldire les faux et horribles delitz et mauvais soulas qui tant de temps m’ont duré quant, pour les grans delectations mondaines, je suis en voye de dampnation, |⁴⁰⁹ car j’apperçoy bien que seray cruellement tormenté et me semble que c’est folie de couvoiter longuement vivre sinon employer son temps au service de Dieu parfaictement. |⁴¹⁰ O povre creature que je suis, que ne consideroie je le temps que faire le pouvoye. |⁴¹¹ O creature raisonnable, que m’ont vallu lors les grans [38r] travaulx mondains et grandes afflictions, les delictz charnelz, mes habitz et pompes desordonnees ! |⁴¹² Helas, je me debvoye bien orner, engraisser et parer, qui suis viande aux vers et aux dyables d’enfer et ay laissé au dernier de mes jours tresbucher ma povre ame |⁴¹³ qui debvoit estre presentee par les sainctz anges de paradis au souverain Createur et Redempteur du monde, qui pour nous a voulu souffrir mort au monde sy angoisseuse ! |⁴¹⁴ Helas, pouvre creature que je suis, bien doiz haÿr ma vie quant, pour toy servir et complaire, je me treuve en si cruelle affliction desordonnee et en la hayne perpetuelle de mon souverain Dieu, qui tant cherement m’a aymé ! |⁴¹⁵ Helas, que n’ay je consideré les honneurs, compaignies et faveurs mondaines que si fort m’ont aveuglé et mené en cest horrible dangier ! |⁴¹⁶ Bien doy mauldire l’heure que nasquiz oncq au monde|⁴¹⁷ quant, par trop aymer et hanter les delitz mondains comme d’avoir nourry mon corps souefz, qui n’est que ung tison d’enfer, |⁴¹⁸ maintenant et par moy mesmes j’ay perdu tous les biens de grace de mon Createur, |⁴¹⁹ qui est parfaicte vie sans fin, sans [38v] faulte et sans envye, et aussy la compaignie de tous les bienheuréz du ciel, qui est sy noble que amour et charité. |⁴²⁰ Il est toute commune, sans partie, combien que je apperçoy, maintenant que c’est trop tard, de a bon droict me treuver en tel dangier que pour si peu de temps que j’ay vescu si soigneusement et travaillé mon corps, |⁴²¹ veu aussi que je pouvoye acquerir la seureté de mon salut en vivant tousjour en la craincte de mon Createur |⁴²² et aussy que, aprés ma mort que sy tost voy venir, je eusse eu perpetuel soulas, deduict, lyesse et joye sans sfin. |⁴²³ O povre creature detestable, je voy bien que maintenant commencent a venir les grans tormens miserables en peine eternelle et me deffault au besoing tout mon sens tant du corps comme de l’ame. |⁴²⁴ Et, premierement, je congnois que ma langue tres fort se lye et se prent au palays, dont me fault le parler. |⁴²⁵ Par quoy ne puis exprimer ne pronuncer le dueil et angoisse que je sens au cueur d’ennuy et de desplaisir. |⁴²⁶ Et aussy les yeulx qui se descouvrent et roullent et s’enflent, d’aultre part, pour la grant destresse habondant, qui ne peuvent [39r] plourer ne gemir. |⁴²⁷ La face se change et pallist. |⁴²⁸ La couleur s’amortist et ternist. |⁴²⁹ Le nez s’estoupe et applatist. |⁴³⁰ La bouche seiche et bee. |⁴³¹ Les dens noircissent et desjoignent. |⁴³² Les levres tiennent et fendent. |⁴³³ La gorge, enrouee, escume et roulle. |⁴³⁴ Les nerfz se rompent, tendent et se descouvre. |⁴³⁵ La poictrine, seiche, se soublieve et haulce pour faire plus grant lieu au cueur qui enfle et tend a crever. |⁴³⁶ La chair par tout se souliefve et sue. |⁴³⁷ Helas, quelle horrible, cruelle et extreme angoysse que je sens maintenant par tous mes membres. |⁴³⁸ Helas, j’ay le ventre vuydz et abbatu, la soye du doz toute seiche, les os et tous les costes s’apperent pour conter, |⁴³⁹ le sang s’enfuyt, les vaines se muent, le poux tressault, le feu estainct, le sens luy default, l’ame decline. |⁴⁴⁰ Helas, chetive creature, que n’ay je eu tousjours se mirouer devant moy, devant mes yeulx, en la veue de ma memoire ! |⁴⁴¹ Et que ne consideroye je la tres griefve amertune de mort et ses pechéz et maulx qui procedent et ensuyvent icelle, |⁴⁴² pour la douleur desquelles ne treuve nul repoz, assiz ne estandu ny [39v] aultrement, tant soye mis sur costé a aultre. |⁴⁴³ Ainçois, de toutes pars commance tellement mon corps a decliner et faillir que dés maintenant se prent a puyr come viande a vers, si que moy mesmes a paine me puis je odorer ne sentir. |⁴⁴⁴ Et, d’aultre part, mon ame est en angoisse inextimable, |⁴⁴⁵  car clarement elle apperçoit tous ses delitz, vouloirs et pensees, dictz, faictz, euvres et voyes sy legierement passees qu’i ne luy semble qu’ung songe de tout le temps qu’elle a vescu |⁴⁴⁶ au regard de la perhempnité et paine pardurable qu’elle voit devant elle au temps ad venir que jamais ne fauldra. |⁴⁴⁷ Et, nëautmoingz, clerement apperçoy toutes ses opperations, iniquitéz et mauvaistiéz. |⁴⁴⁸ Par quoy l’ame s’efforce de les mucer et absconcer. |⁴⁴⁹ Mais le corps luy respond : |⁴⁵⁰ « Nous somme tes engendreures et forméz de toy. |⁴⁵¹ Pourtant, je ne te laisseray point, |⁴⁵² ains yray avec toy au Jugement et t’accuserons au souverain Juge |⁴⁵³ et luy dirons comme souventes fois toy mesmes te es temptee et luy dirons le lieu, le temps et les circonstances qui te pourront nuyre grandement |⁴⁵⁴ et aussi [40r] comme tu n’a voulu obtemperer a ses bonnes operations et inspirations, ains les a dechassees et les messaiges qu’i t’avoit envoyés pour ton salut. » |⁴⁵⁵ O creature chetive et toute desolee, come je sens par tous les costéz et dedans et dehors de moy, c’est assavoir croistre et agrandir mes maulx et mes destourbes ! |⁴⁵⁶ Mais c’est a bon droict, car moy mesmes qui, a mon escient et contre le jugement de Dieu et de raison, me suis honny et souillé pour luy avoir desobeÿ. |⁴⁵⁷ O mes parens et amys, que ne sçavois je, lors que je vous hantoye, ce que je sçay et ce que je sens maintenant, |⁴⁵⁸ car je ne vous eusse pas ainsy creu ne aymé, ains me fusse esforcé de tout mon cueur complaire a Dieu, mon Creatuer ! |⁴⁵⁹ O povre creature, je apperçoy bien maintenant de moy ainsy lamenter, |⁴⁶⁰ car en amertune et horrible destresse et affliction me fault du monde departir et tresbuscher avecq les ennemys d’enfer qui m’attendent en la perpetuelle mansion plaine de douleur et de eternelle horreur, |⁴⁶¹ mais, d’abondant, je te supplie et requier de tres bon cuer que enhortes et charges ceulx qui mes lamentations ont ouyes, |⁴⁶² aulquel [40v] je prie mon Createur qu’ilz ayent tousjours devant l’esconsideration des gemissemens et pleurs que fait la porvre ame, |⁴⁶³ car faulte de remors de conscience a esté cause de ma dampnation pour les maulx que j’ay faitz. |⁴⁶⁴ Et aussi plusieurs fois a peché contre le benoist Sainct Esprit et me suis mis hors de la grace de mon Createur et la lumiere de congnoissance de mon salut. |⁴⁶⁵ Et, desobeïssant a mon ange et maintes fois, ay mesprisé ceulx qui bonne vie me monstroient et le bien m’enseignoient. |⁴⁶⁶ Helas, povre creature, que ne congnoissoye je bien ceulx qui le bon conseil me donnoyent, |⁴⁶⁷ ce que j’ay voulu fouyr et prins le mal qui tousjours se mectoit au devant de moy ! |⁴⁶⁸ et, par ce, maintenant et de rechief, j’apperçoy bien l’horribleté merveilleuse qui tout entour de moy sont les dyables d’enfer qui me vueillent destruyre et devorer, |⁴⁶⁹ lesquelz, par hydeux signes et horribles menasses, crient et brayent entour moy pour me tourmenter, |⁴⁷⁰ qui ont les faces si detestables, laydes et difformes que, sans plus parler, le regard d’iceulx assez est cause d’yssir hors du sens [41r] et desesperer et mectre l’ame hors du corps et faire partir. |⁴⁷¹ Et, a l’aultre costé, je voy mon bon ange, lequel n’ay voulu croyre, tout triste et doulant et courroucé et loing de moy, qui me faict pouvre semblant de salut. |⁴⁷² De mon ame ne de moy reconforter ne luy chault, ains me laisse aggrapir et souffler des ennemis d’enfer ausquelz moy estant en santé j’ay voulu obeÿr. |⁴⁷³ Et, mesmement, je voy dessus moy le hault et souverain Juge de tout le monde qui comme tout forcené, |⁴⁷⁴ qui par sa glorieuse face se courrouce et espouente de la pouvre creature qui a encouru l’indignation du benoist Createur de tout le monde. |⁴⁷⁵ Et as encouru son yre, lequel tant de biens de grace t’avoit donnéz et, de jour en jour, a prolongé sa grant misericorde en attendant a luy servir, |⁴⁷⁶ affin que devers luy me retournasse, ce que riens n’ay voulu faire. |⁴⁷⁷ O cruelle sentence irrevocable et sans nul respit que quant je considere le temps, les jours et les grans delaiz |⁴⁷⁸ que tant m’a prestéz pour l’amendement de mon salut en actendant [41v] tousjours l’endemain, qui me sont failliz ! |⁴⁷⁹ Et maintenant me trouve que ne feiz oncques bien |⁴⁸⁰ et, pour ce, je suis en telle angoisse et si cruelle destresse que exprimer ne le sçauroie. |⁴⁸¹ O pouvre creature, quelle horrible sentence que pourter me fauldra ! |⁴⁸² Et toutesfois soubstenir le me conviendra, |⁴⁸³ car force m’est que je l’endure, combien que desja voy et apperçoy les borreaulx d’enfer sans nulle pitié quelconques qui m’attendent les bras croiséz pour me tormenter perpetuellement, |⁴⁸⁴ car dessoubz moy je apperçoy et sens mon enfer et ma cruelle compaignie et mon douloreux et tenebreux lieu, |⁴⁸⁵ auquel sont tenebres espesses pour me pugnir au feu qui est sans flame et sans clarté nulle, pueur horrible pire que souffre, douleur come d’enfanter sans jamais cesser, |⁴⁸⁶ criz, braiz et gemissemens sans pouvoir pleurer, meschiefz et destresse a tousjours perpetuellement sans jamais finer la endroit. |⁴⁸⁷ Helas, pouvre creature, si dire l’osoye, les blasphemes de Dieu maugreer Dieu et despiter Dieu si tres cruellement que merveil[42r]le, |⁴⁸⁸ car j’apperçoy bien que chascum qui y est avec ses maulditz ennemys, qui sont sans repoz nul sinon que pour tormenter tousjours les ames, |⁴⁸⁹ par quoy leurs douleurs se renouvellent de jour en jour. |⁴⁹⁰ Comme je puis apercevoir que ceulx avecq lesquelx nagueres j’estoye cheoient en peché, qui, par grant hayne et maltallant, m’attendent pour estre pugniz et tormentéz perpetuellement avecq eulx. |⁴⁹¹ Et sont assiz entre serpens, couleuvres, dragons, escorpions et toutes bestes venimeuses en sy grant habondance que sans nombre. |⁴⁹² La endroit est la mort desiree, mais elle est viande sans mourir, car la convient mourir sans mourir. |⁴⁹³ O cruel et horrible lieu et estable pour moy et pour tous aultres pecheurs. |⁴⁹⁴ Comme ses angoisses de ma maladie et amertumes accroissent mes maulx et douleurs. |⁴⁹⁵ O mauldicte soit l’heure que oncques au monde je nasquiz, quant telle angoisse me fault souffrir ! |⁴⁹⁶ O pouvre creature desordonnee, que n’ay je pourveu au salut de mon ame, [42v] veu le temps et l’heure que faire le pouvoye, affin que fusses seigneur de joye perpetuelle ! |⁴⁹⁷ Helas, helas, chetive creature, comme je suis battue de tormens pardurables ! |⁴⁹⁸ O mauldicte soys, ame qui en si cruel lieu me faiz aller ! |⁴⁹⁹ Et aprés toy le corps tireras, que a tes faulx delitz accomply t’ay accompaigné et perdu la joye pardurable. |⁵⁰⁰ O la myenne mauvaise voulenté, qui oncques ne cessas d’engendrer toutes angoisses, dont je me trouve pour tousjours meus en paine eternelle ! |⁵⁰¹ O vous, montaignes et rochiers, prenéz pité de moy et vous laisséz cheoir sur moy pour moy confondre et absconcer de la face du Juge, qui tant m’est terrible a veoir et regarder, |⁵⁰² et me tuéz affin que celle plus ne sente dessus, ne dessus ne desoubz, devant ne derriere, a dextre ne a senestre, dehors ne dedans ! |⁵⁰³ O tristesse, horribleté de tormens et angoisse cruelle et detestable qui pour moy sont appareilléz ! |⁵⁰⁴ O vous, creatures formees a la semblance de Nostre [43r] Saulveur Jhesucrist, prenéz en vous exemple sans aulcunement attendre huy ne demain, |⁵⁰⁵ affin que incontinant delaisséz ses qui maynent les pouvres creatures a si cruelle et horrible fin |⁵⁰⁶ et se lavent et nectoyent par vraye pure confession et penitence salutaire et appreignent aultrement a mourir, |⁵⁰⁷ car vous pouvez bien sçavoir que les jours des hommes et de chascune personne sont briefz comme umbre de soleil |⁵⁰⁸ et ne sçait nul, de quelque estat qu’i soit, si Dieu luy donnera grace de vivre jusques au lendemain. |⁵⁰⁹ Et, toutesfois, en iceulx jours, on peult acquerir la joye eternelle, qui est sans fin ou peine infinie qui sont ordonnéz devant la constitucion du monde. |⁵¹⁰ Et prie et requiers a ung chascum, en tant qu’il luy touche, prendre sur se mirouer advis affin d’acquerir la joye pardurable, |⁵¹¹qui est sine fine in secula seculorum. |⁵¹²Amen. |⁵¹³Finis.

³⁷⁵ Note : Une illustration pleine page sur le 35r et sur le 35v
³⁹⁴ Leçon non conservée : ouvrer
³⁹⁹ Leçon non conservée : aller
⁴⁰⁵ Leçon non conservée : haplographie : mort pour mort Mort
⁴⁰⁸ Leçon non conservée : durer
⁴²⁰ Leçon non conservée : travailler
⁴²² Leçon non conservée : eusse en perpetuel
⁴²³ Leçon non conservée : commencet
⁴⁴¹ Leçon non conservée : ensuyvant
⁴⁵⁴ Leçon non conservée : envoyer
⁴⁵⁶ Leçon non conservée : avoir obeyr
⁴⁶⁵ Leçon non conservée : enseignoit
⁴⁷⁰ Leçon non conservée : destetables ; d’iceulx est cause assez est cause d’yssir
⁴⁸⁷ Leçon non conservée : maugreez
⁴⁹⁰ Leçon non conservée : cheoit
⁴⁹² Note : Entre sans mourir et O, sans biffé.
⁵⁰⁹ Leçon non conservée : qui et sans
⁵¹³ Note : Suivent 3 lignes laissées en blanc.