[La premiere temptacion est en la foy]
|25 La premiere temptacion est en la foy, |26 car, ainsi que dit l’Apostre : |27 « Foy est le commancement et fondement de tout humain lignage mettre et venir a salvation. » |28 Et aussi « Sans foy il est impossible plaire a Dieu », |29 comme est escript en la sainte Escripture en pluseurs lieux, |30 disant que cellui qui ne croit et n’a foy est jugié a souffrir peine eternele en la compagnie des deables, |31 comme on puet veoir de pluseurs qui ont fait mourir les apostres, qui sont, par leur ostination et incredulité, dampnéz perpetuelment. |32 Exemple [35r] avons bien de Neron, Pillate et Herode, qui, a ceste heure, scevent bien com la mort leur est douloureuse et a tout homme injuste. |33 O ennemi de humain lignage ! |34 com courroucié tu es de la grant vertu et force de nostre bonne foy, qui tant opprimes et deffoles les bons chrestiens en leurs extremitéz |35 pour les faire devier en icelle totalement ou par racines qui sont erreur, heresie et plusieurs autres par lesquelles les veulx mener a dampnation perpetuele !
|36 Ung chascun bon chrestien qui, en ces precedens illusions et persuasions, est tempté du deable en la fin de ses jours doit fermement en la foy et union de sainte Eglise perseverer jusques a la fin. |37 Et bien prouffitable est a celui malade, pour l’entretenir en vray propos de ferme foy et affin que les deables, l’infestans, s’enfuient, faire dire devant lui a haulte voix le Credo |38 et le reïterer pluseurs foiz et aussi [35v] lui demonstrer |39 comment les anciens catholiques Abraham, Ysaac et Jacob |40 et plusieurs payens ont tous esté saulvéz par la foy qu’ilz ont eue. |41 Exemple avons de Job, Raab, qui estoit hostelliere commune en une cité. |42 Pour tant qu’elle cognoissoit les filz d’Israel avoir ung Dieu ayant toute puissance, |43 sauva leurs espirs et depuis leur bailla la cité, de la quelle chose fut moult tourmentee du peuple payen. |44 Achior semblablement, pour tant qu’il donna conseil a Oloferne de non combatre contre les filz d’Israel, eulx estans en la grace de leur Dieu, fut lié en ung arbre, prest de mourir se du dit peuple n’eust esté delivré. |45 Et, en celle foy et congnoissance de ung seul Dieu, ont esté sauvéz et tous les sains du paradis.
27 Note : Le texte cité renvoie en réalité à Augustin, De Fide et operibus, I, 15, 24
28 Note : Paul, Épitre aux Hébreux, 11, 6