[1v]

|¹ L’art au morier

|² Ja soit que, selon le Philosophe ou tierch livre d’Ethiques, |³ sur toutes choses terribles la mort corporele est la plus terrible, toutefois, a la mort de l’ame n’est a comparer. |⁴ A ce propost dist saint Augustin |⁵ que « La perte d’une ame est plus grand damage que de mille corps ». |⁶ Et aussi dist saint Bernard |⁷ que « Tout ce monde ne se peut estimer a une ame », |⁸ pour quoi la mort de l’ame est plus horrible et detestable de tant que l’ame est plus noble et precieuse que le corps.

|⁹ Come donques l’ame est si precieuse et le dyable pour l’eternelle mort d’icelle infeste la personne a son darrain partir par si tres grands temptacions, |¹⁰ pourtant est tres grand necessité que l’omme pourvoie a son ame qu’en icelle mort ne soit perdue. |¹¹ A quoi est tres expedient que chascun l’art de bien morir frequente diligemment et pourpense sa mor et solucion, |¹² car, come dist saint Gregore : |¹³  « Cilz se sollicite moult en bone oepvre qui toutdis pense de sa darraineté ». |¹⁴ « Le futur mal ou dangier preconsideré peut on plus facilement tolerer », |¹⁵ mais pau souvent on se dispose de bon temps a la mort |¹⁶  pourtant que chascun cuide longuement vivre et nient si tost morir, |¹⁷ lequel par l’instinction du dyable se fait certainement, |¹⁸  car plusieurs par cel vain espoir se negligent et muirent indisposéz. |¹⁹ Et pourtant ne doit on trop esperer le malade ou morissant du recouvrement de sa santé corporele, |²⁰ car, selon le Chancelier de Paris, |²¹  « Par tele fainte consolation et confidence chiet en certaine dampnacion ». |²² Pour quoi devant toutes choses doit on induire le morissant az choses necessairement acquises a son salut. |²³ Premiers, |²⁴ qu’il croye come bon chrestien lyés qu’en la foy Jhesucrist et l’unité et obedience de sainte l’Eglise morera. [2r] |²⁵ Secondement, |²⁶ qu’il reconoisse griefment avoir Dieu offensé, dont il doit douloir. |²⁷ Tiercement, |²⁸ qu’il se propose fermement amender s’il sourvit et jamais plus pechier. |²⁹ Quartement, |³⁰ qu’il pardonne a ses offenseurs pour Dieu et qu’il demande pardon de ceus qu’il a offensé. |³¹ Quintement, |³² qu’il restitue ce qu’il a pris ou malement detient. |³³ Sextement, |³⁴ qu’il congnoisse Jhesucrist pour lui estre mort et que autrement ne peut estre sauvéz |³⁵ se non par la merite de la passion Jhesucrist, |³⁶ dont il rende Dieu graces possiblement. |³⁷ Az quelles choses s’il respond de bon ceur, |³⁸ c’est signe qu’il est du nombre de ceus qui seront sauvés. |³⁹ Depuis, on l’induira a la droiture de l’usance des sacremens de l’Eglise.

|⁴⁰ Premiers que par vraie contricion fache entiere confession, les autres sacremens aussi recevant devotement. |⁴¹ Et cilz qui par autrui n’est de ces choses interroguiés et informés, il se interrogue lui meymes, considerant s’il est disposés come dit est. |⁴² Et qui ensi est disposés, il se commette du tout a la passion Cristi, son Sauveur, icelle meditant continuelement, |⁴³ car, par ce, toutes temptacions du dyable et en la foy peut principalement superer. |⁴⁴ Si est a noter que les moriturs ont plus grieves temptacions que unques auparavant. |⁴⁵ Et se sont cin come aprés apara, |⁴⁶ contre lesquelles l’angele leur inspire cinc bonnes inspiracions, |⁴⁷ mais affin que ceste doctrine soit a tous fructeuse et nulz n’en soit fourcloz, ains y aprende salubrement morir, |⁴⁸ tant clercz, par la letre, come, par les ymages, layz et clercz |⁴⁹ en cest miroir poront profiter et les choses preterites et futures come presentes speculer. |⁵⁰ Qui dont veulle bien morir ces choses et subsequentes considere diligentement.

³Leçon non conservée : chose – Note : Aristote, Éthique à Nicomaque, III, 7
⁵Note : Saint Augustin, De civitate Dei contra paganos, VIII
⁷Note : Bernard de Clairvaux, Meditationies devotissimae, III (De dignitate animae)
¹³Note : Grégoire I^er, référence non identifiée
¹⁴Note : Grégoire I^er, référence non identifiée
¹⁷Leçon non conservée : se fuit c.
²¹Note : Jean Gerson, Opera omnia, I, 449
²²Leçon non conservée : netessairement
³⁹Leçon non conservée : usance dos s.
⁴⁷Leçon non conservée : doctrine soit fourcloz ains y aprende a tous fructueuse et nulz