[4r]

|⁵¹ Temptacion du dyable de la foy.

|⁵² Comme ensi est que foy est fondement de tout salut et sans icelle nulz ne peut estre saulvés, |⁵³ tesmoing saint Augustin qui dit |⁵⁴  « Foy est de tous biens le fondement et entree d’humain salut », |⁵⁵ disant aussi saint Bernard |⁵⁶  « Foy est comencement de salut humain. |⁵⁷ Sans icelle, nulz ne peut appertenir au nombre des filz de Dieu |⁵⁸  et sans elle tout labeur humain est vuyd et inutile ». |⁵⁹ Pourtant le dyable, ennemi de toute humaine lignee, de tout son pooir traveille de l’omme en sa darraineté destorner totalement d’icelle |⁶⁰ ou au mains de l’induire a y fourvoier et errer, disant :

|⁶¹ « Tu, meschant, es en grand erreur construé. |⁶²   Il n’est point ensi que tu crois et qu’on preche. |⁶³  L’enfer est rompu et deffait. |⁶⁴ Quelque chose que l’omme face, il ocist autrui ou soy meyme par indiscrete penitence, come aucuns ont fait, ou adore les ydoles, si que les roix gentilz et plusieurs payens font. |⁶⁵ N’est ce mie en fin tout ung ? |⁶⁶ Car nulz ne retourne disant la verité |⁶⁷ et ensi ta credulité et foy n’est riens. » |⁶⁸ De telz et samblables choses pour le plus labeure le dyable qu’il puisse l’omme, en sa darraineté agonizant, avertir et destourner de la foy, |⁶⁹ car il scet bien que, se le fondement deffault, tout le superedifice necessairement descherra. |⁷⁰ Toutefois est assavoir qu’en nulle temptation le dyable ne peut constraindre l’omme ne aucunement maistriier et prevaloir, que a lui se consente, si longuement qu’il ait usance de rayson, |⁷¹ se voluntairement il ne lui consent, ce que sur toute riens se fait a eschiever, |⁷² car, come dist l’Apostle : |⁷³  « Dieu est tres leal et feable qui ne vous seuffre estre temptéz au dessus que poéz porter. |⁷⁴  Ainsi vous fera par la tempaction proufit |⁷⁵  affin que le puissiés soustenir. »

[6r] |⁷⁶ Bonne inspiracion par l’angele de la foy.

|⁷⁷ Contre le premiere temptacion du dyable donne l’ange consolatoire inspiracion, disant : |⁷⁸  « O homme, ne croy les pestilentes suggestions du dyable, |⁷⁹ car il est menteur |⁸⁰ et par mentir il dechut les premiers parens, |⁸¹ et ne doute aucunement en la foy, |⁸² combien que par sens et entendement ne le peus comprendre, |⁸³ car, se tu le pouoies comprendre, ne seroit aucunement meritoire. |⁸⁴ Come saint Gregore dist : |⁸⁵ ‘Foy n’a point de merite a la quelle humaine raison preste experiment.’ |⁸⁶ Mais vous souvienge de la parole des sains Peres, assavoir de saint Pol aux Hebreus, xi^e, disant |⁸⁷ que ‘Sans la foy est impossible de plaire a Dieu’, |⁸⁸ et saint Jehan, au iij^e, |⁸⁹ ‘Qui ne croit, il est ja jugiés’, |⁹⁰ et saint Bernaert disant |⁹¹ ‘Foy est la primogenite entre les vertus’. |⁹² Et ‘Encore plus benoite fu Marie precipuant la foy de Jhesucrist que la char d’iceluy’. |⁹³ Considere aussi la foy des anchiens fideles, Abraham, Ysaac et Jacob, |⁹⁴ et d’aucuns payens, assavoir Job, Raab, meretrix, |⁹⁵ et, samblens pareillement, la foy des apostles et de immuables martirs, confesseurs et virges, |⁹⁶ car par foy ont pleu tous, anciens et modernes. |⁹⁷ Par foy, saint Pierre ambula sur les eaues, |⁹⁸ saint Jehan but sans peril le venin qu’on lui propina. |⁹⁹ Les mons de Caspes, a l’orison d’Alixandre, par foy sont adunéz et accloz. |¹⁰⁰ Et, pourtant, la foy est meritement benye de Dieu. |¹⁰¹ Pour quoy tu dois virilement resister au dyable et fermement croire tous les commands Eglise, |¹⁰² car saint Eglise ne peut errer pour ce qu’elle est gouvernee du Saint Esperit. |¹⁰³ Et, note, si tost que le malade ou morissant se sent tempté contre la foy, pense premiers quom necessaire est la foy, |¹⁰⁴ car sans elle nulz ne peut estre saulvé. |¹⁰⁵ Secondement, considere quom utile est, |¹⁰⁶  car elle peut tout, disant Nostre Seigneur : |¹⁰⁷  ‘Toutes choses sont possibles a celly qui croit.’ |¹⁰⁸ Et encor dist : |¹⁰⁹  ‘Quelcunque chose en priant vous demandéz, creéz, car vous l’obtendréz.’ » |¹¹⁰ Et ensi l’enferme facilement, par la Dieu grace, resistera au dyable. |¹¹¹ Pour quo aussi est bon qu’on die le Symbole de la foy entour l’agonizant a haute voix et que souvent soit repeté |¹¹² affin que par ce le malade ou moritur soit animé a constance de la foy et les esperis malignes, qui abhorrent oÿr le dit Symbole, soient encachiés.

⁵⁴ Note : Augustin, De Fide et operibus, I, 15, 24
⁵⁶ Note : Bernard de Clairvaux, Sermones in Cantica canticorum, XXXVII, 1
⁶⁰ Leçon non conservée : y four voiser et
⁶⁶ Leçon non conservée : nulz n retourne
⁷⁰ Leçon non conservée : marstriier
⁷¹ Leçon non conservée : lui constur ce
⁷³ Note : Paul, Première Épitre aux Corinthiens, 10, 12
⁷⁴ Leçon non conservée : par répété
⁸² Leçon non conservée : le pouoir comprendre
⁸⁵  Note : Grégoire I^er, Homiliae in Evangelia, XXVI, 1.
⁸⁷  Note : Paul, Épitre aux Hébreux, 11, 6
⁸⁹  Note : Jean, 3, 18
⁹¹  Note : La citation prêtée à Bernard de Clairvaux se trouve en réalité chez Augustin, Sermones, I, XXI, 11.
⁹² Note : Augustin, De verbis Domini et apostoli, XVII
⁹⁹ Leçon non conservée : adunz
¹⁰² Leçon non conservée : est mq.
¹⁰⁷ Note : Marc, 9, 23.
¹⁰⁸ Leçon non conservée : vous loitendréz
¹⁰⁹ Note : Marc, 11, 24.
¹¹¹ Leçon non conservée : malade au moritur