[24r]

|³⁶¹ Bien utile conclusion de ceste salutaire doctrine.

|³⁶² Se le moritur labourant en agonye et extremité peut parler et avoir usance de raison, |³⁶³ il doit ses orisons espandre a Dieu. |³⁶⁴ Premiers le invoquier et pryer que, par sa tres inestimable misericorde et par la vertu de sa tres sainte passion, il le daingne recepvoir en sa grace. |³⁶⁵ Depuis, clamera par toute diligence la glorieuse Vierge Marie |³⁶⁶ pour sa patrone et moyenneresse, |³⁶⁷ aprés, tous les sainctz anges et par especial l’ange a se propre garde deputé, |³⁶⁸ en oultre, les apostles, martirs, confesseurs et vierges et toute voix ceulx ou celles plus singlierement qu’il a eu en dilection et reverence, |³⁶⁹ desquelz les ymages et l’ymage de la sainte croix et de Nostre Dame lui seront mis au devant.

|³⁷⁰Item, il dira trois fois cestui vers : |³⁷¹  « Sire, tu az desrompu mes loyens. |³⁷² Je te sacrifiray l’ostie de loenge. » |³⁷³ Car ce ver, selon Cassidore, est de tel vertu et efficace que les pechiés de la persone lui sont pardonnéz se, en fin par vraie confession, devotement soit dit. |³⁷⁴Item, die trois fois ces moz ou semblables, les quelz on attribue en summe a saint Augustin : |³⁷⁵ « La paix de Nostre Seigneur Jhesucrist et la vertu de sa tres benoite passion et le signe de la sainte croix et la tres entiere puraine integrité de la tres saincte Mere la Virge Marie |³⁷⁶ et la benediction de tous les sains et sainctes, la garde des anges ensamble les intercessions et suffrages de tous les esleüs de Dieu |³⁷⁷ soient entre moy et mes ennemis visibles et invisibles en cest heure de ma mort. |³⁷⁸Amen. » |³⁷⁹ Mais, se l’agonisant ne scet dire les orisons, |³⁸⁰ aucun des presens illec les pourra de haute intendable voix pour lui dire ou aucunes devotes hystoires et vertueuses choses a ce propost servant, es quelles le morisant soloit avoir devote delectacion. |³⁸¹ Et il meÿmes les advoera et dira de ceur et desir, pryant aussi le mieulx qu’il poulra et saura.

|³⁸² Et, come ainsi soit que le salut de la personne est et consiste en son definement de ce monde, |³⁸³ chacun se doit soingneusement pourveoir d’un bon devot sochon, feal et ydoine ami, |³⁸⁴ qui lui assiste en ceste necessité et conforte, a constance de vraye foy, pacience, devotion et perseverance, |³⁸⁵ l’esmouvant et incitant, a bon devot corage et adrechement de ceur, a Dieu la sus, sa doulce mere, etc., |³⁸⁶ et pour lui priant feablement en son agonie et trespas et aprés par bonnes orisons et commendacions, |³⁸⁷ le quel lui peut moult valoir a sa saulvacion et est pour tel assistant au moritur chose de tres grand merite, come aussi voulroit qu’on feïst pour lui. |³⁸⁸  Mais, laz, on trouve pau de telz |³⁸⁹ qui en la mort ensi feablement assistent et secourrent a leur proixmes et amis, les interroguans, exhortans, remonstrans et amonestans a leur darrain salut et perpetuelle saulvacion |³⁹⁰ et pour ce pryent lors et aprés ayent oire de pryer et fere pryer come besoingz est, |³⁹¹ par especial quant le morisant ne s’i adonne et ne veut bonnement encore morir. |³⁹² Si est a doubter que les ames des morissans bien souvent en ce tres dangereux article de mort se poulroient meschanment perillier et precipiter sans bonne conduite et convenable adreche.

|³⁹³ Bonne remonstrance par figure et l’exposition par escripture.

|³⁹⁴ De chose utile et necessaire est cest miroir vrai exemplaire.

|³⁹⁵ Si entendéz a bon desir pour bien vivre et bien morir.

³⁶¹ Leçon non conservée : recepour
³⁷⁰ Leçon non conservée : sacrifirai lostre de
³⁷¹ Note : Psaumes, 115, 1617
³⁷⁵ Note : Référence non identifiée.
³⁷⁹ Leçon non conservée : de hauce i. ; esquell
³⁸⁵ Leçon non conservée : pour priant lui f.
³⁸⁸ Leçon non conservée : proixmos
³⁹¹ Leçon non conservée : poulroient oneschanment perillier ; conveable