[20r]

|³¹⁵ Temptacion du dyable d’avarice.

|³¹⁶ La cincisme tempacion de l’ennemi est avarice, les seculiers charnelz plus infestant et traveillant, |³¹⁷ la quelle est trop grand occupacion des choses foraines et temporeles, richesses et ensoignemens d’autres affaires qu’en leur vie ont hanté ou le plus amé. |³¹⁸ Per les quelles le dyable tres efforcheement vexe et trouble l’omme a son definement, disant :

|³¹⁹  « O chaitiz, maleureux, tu relenqueras ores tous tes biens temporels, les quelz par plusieurs sollicitudes et tres grandz labeurs sont assambléz. |³²⁰ Aussi deslairas en derriere ta femme, tes enfans, tes cousins, parens et chiers amis et toutes autres choses desiderables de ce monde |³²¹ dont te seroit grand soulaz d’estre encore en leur compaignie et seroit a eulx aussi occasion de grand bien et plaisance. » |³²² Telles et samblables distractions, selon les affaires et condicion du mourissant, l’ennemi, par stimulacion d’avarice et couvoitise, represente a l’omme en ses extremes darrainitéz |³²³ affin qu’ansi, par l’amour et cupidité de ces choses terriens, il l’averte et destourne de l’amour et affection de Dieu et de son propre salut. |³²⁴ Dont singlierement est a noter qu’on doit garder tres pres reschiever que on ne ramembre au morissant ses parens, amis corporelz, femme, enfans, avoir ne autres choses transitoires |³²⁵ fors de tant que sa santé spirituele le requert ou poulroit demander, veü que autrement ce seroit chose si grieve et de trop grant peril, |³²⁶ car ensi, par telle commemoracion ou souvenance, seroit le morissant empechié et rappellé des choses spiritueles et salutares, aux quelles, lors, de toute vigeur et puissance, au par dedens et dehors, se fait a entendre moult cordialement |³²⁷ et seroit convertis de soy negligier et occuper a ces miserables choses temporeles et charneles qui se font adont par tres grand diligence a remouvoir et oubliier de ceur et pensee, |³²⁸ es quelles certantement lors avoir soing et occupacion est chose malseant et tres perilleuse.

[22r] |³²⁹ Bonne inspiracion de l’ange contre avarice.

|³³⁰ Contre la v^e temptacion du dyable donne l’ange bonne inspiracion, disant : |³³¹  « O homme, ne veulle oÿr les tres nocives suggestions de l’ennemi, par les quelles te tend loyer et infisquier. |³³² Pour quoi les choses temporeles du tout delaisse et mets au derriere, |³³³ des quelles la memoire au resoingnement ne te peut de riens proufiter ou tourner a ton salut mais a grand detryment et destourbier d’icellui. |³³⁴ Si soyes memoratif de la parolle Nostre Seigneur disant a ceulx qui sont adonnéz et affichiés a telles choses : |³³⁵ ‘Chilz, fait il, qui ne renunche a tout ce qu’il possede, il ne peut estre mon disciple.’ |³³⁶ Et en outre : |³³⁷  ‘Celly, dist il, qui vient a moy et ne hayst ses pere, mere, sa femme ou enfans, freres et seurs, |³³⁸ encore ne peut il estre mon disciple.’ |³³⁹ Item, aux renunchans de ces choses dist il : |³⁴⁰  ‘Cilz qui relemque et delaisse sa maison, freres et seurs, pere, mere, sa femme ou enfans ou ses hiretaiges pour mon nom cent doubles en recevra et possidera la vie eternelle.’ |³⁴¹ Ramembre aussi la povreté Jhesucrist Nostre Saulveur en la croix pour toy pendant, |³⁴² sa tres sainte benigne Mere et ses tres chiers disciples pour ton salut voluntairement delaissant. |³⁴³ Considere aussi que tant de sainctes et devotes personnes en ceste renunciacion et contempt des biens et choses seculieres les ont ensivy, dignes d’oÿr leur tres haute remuneracion : |³⁴⁴ ‘Venéz, les benoéz de mon Pere. |³⁴⁵ Possidéz le regne celestien qui vous est apparreillié des le commencement du monde.’ |³⁴⁶ Si emprime ces choses en ton ceur et les transitoires totalement deboute, |³⁴⁷ convertant ton ceur entierement a la voluntaire salubre povreté |³⁴⁸ et ensi, par la promesse precedente, le regne des cieulz te sera deü et l’obtendraz. |³⁴⁹ Affirmant encore, Nostre Seigneur dit : |³⁵⁰  ‘Bien eureus sont les povres d’esperit, car a eulx est le regne des chieulz.’ |³⁵¹ Tu te commetz doncques plainement a Dieu. |³⁵² Il te donra richesses pardurables et en sa bonté espande toute ta confidence et saulvation. |³⁵³ Note, quant le moritur se sent tempter par avarice et amour des choses terrienes, considere premiers que telle affection fait separer et retraire de Dieu la personne, |³⁵⁴ car ce fourcloist et restaind l’amour de Dieu, |³⁵⁵ tesmoing saint Gregoire, qui dit |³⁵⁶ que ‘De tant est l’omme de l’amour supernele eslongié de quant qu’en ces creatures terienes et bassaines prend sa plaisance et delectacion’. |³⁵⁷ Secondement, pense que la spontaine et voluntaire povreté fait l’omme bien eureux, le adrechant au chiel, |³⁵⁸ disant Nostre Seigneur : |³⁵⁹  ‘Bien heureux les povres d’esperit, |³⁶⁰ car, ensi que dit est, le regne des chieulx est eulx.’

³¹⁸ Leçon non conservée : efforchetment
³¹⁹ Leçon non conservée : c. malemenx tu
³²⁰ Leçon non conservée : c. parers et.
³²² Leçon non conservée : il lavette et
³²⁵ Leçon non conservée : le raisort ou proutroit d.
³²⁷ Leçon non conservée : de son negliger
³²⁹ Leçon non conservée : contre davarice
³³¹ Leçon non conservée : homme N veulle
³³⁵ Note : Luc, 14, 33
³³⁷ Note : Luc, 14, 33
³⁴⁰ Note : Luc, 14, 26
³⁴⁴ Note : Matthieu, 25, 34
³⁴⁶ Leçon non conservée : convertanr ; s. poircete et
³⁴⁹ Leçon non conservée : ffirmant ; eurus
³⁵⁰ Note : Matthieu, 5, 3
³⁵¹ Leçon non conservée : donncques
³⁵⁶ Note : Grégoire I^er, Homélie 30 sur l'Évangile
³⁵⁹ Note : Matthieu, 5, 3