[a vi r]

|¹⁷³ La seconde partie de ce livre est des temptacions faictes aux mourants.

|¹⁷⁴ Et premierement de la foy.

|¹⁷⁵ Sachent toutes creatures, hommes et femmes, les quelz ont a passer de ce monde en l’autre, comme il soit ainsi qu’il n’est nul qui ne gouste la mort |¹⁷⁶ il est assavoir pour tout vray que ceulx qui sont constituéz a mourir ont a celle heure telles temptacions de nostre adversaire l’ennemy d’enfer que oncques en leur vie n’eurent a congnoistre. |¹⁷⁷ Entre les quelles en y a cinq principales |¹⁷⁸ des quelles la premiere est de la foy |¹⁷⁹  pour ce que elle est le fondement et commencement de tout salut.

|¹⁸⁰ Et, pour ce congnoissant icelle chose, le glorieux apostre saint Pol disoit : |¹⁸¹Fundamentum aliud nolo ponere nisi id quod prius positum est, |¹⁸² c’est a dire « Il n’est point en puissance de mettre fondement plus ediffiant en salut que celluy le quel j’ay mys ». |¹⁸³ Et, a celle cause, iceluy mesmes apostre nous le dit et tesmoigne par cest escript, c’est assavoir |¹⁸⁴Sine fide impossibile est placere Deo, |¹⁸⁵ c’est a dire que « Sans foy, il est impossible de plaire a Dieu ». |¹⁸⁶ Et de cecy dit saint Augustin : |¹⁸⁷Fides est omnium bonorum fundamentum et humane salutis inicium, |¹⁸⁸ c’est a dire que « La foy est le fondement de tous biens et commencement du salut humain. »

|¹⁸⁹ O creature raisonnable et ame devote, ayes donc la foy et croy ces choses et doubte le dit de saint Jehan escript au .iii. chapitre de sa Canonique, disant : |¹⁹⁰ Qui non credit, jam judicatus est, |¹⁹¹ c’est a dire que « Celuy qui ne croit et a ferme foy, il est ja venu au jugement et est jugié ».

|¹⁹² Et pourtant, nostre adversaire, sachant la grande vertu et preeminence de la foy, |¹⁹³ la force aussi que elle a de resister encontre luy et congnoissant que sans icelle nulle creature ne peut estre sauvee et que par elle on a aide et secours, |¹⁹⁴ pour telles causes, autant comme il peut, il met paine, de toute sa puissance, de pervertir et tourner l’omme hors de la foy quant il est au labour de la mort |¹⁹⁵ ou, au moins, il luy presente aucunes choses soubtilles par les quelles il le puisse decevoir, c’est assavoir par aucunes folles erreurs les quelles il met aux creatures maintenant, |¹⁹⁶ comme croire par heresie autrement qu’on ne doit et autres telles folles choses, esquelles il met grant paine affin de faire pervertir l’omme hors de la foy.

a vi v] |¹⁹⁷ Et, pour celle malicieuse chose et soubtil efforcement, le bon et loial crestien ne doit pas seullement croire les articles de la foy |¹⁹⁸ mais, avecques ce, est tenu croire fermement en toutes choses par tous les ditz de la saincte Escripture sans nul obstacle ou difficulté. |¹⁹⁹ Et, s’il est ainsi qu’il ne les entende pas sainement, comme plusieurs ne sont pas clers, il suffit pour son salut, a l’encontre de la malice du dyable d’enfer, les croire en telle maniere que ilz sont entendues |²⁰⁰ et selon ce que saincte Eglise rommaine presche et exhorte et comme elle croit. |²⁰¹ Et aussi se doit elle commettre et rendre subjecte a vouloir mourir aux constitucions et ordonnances d’icelle, |²⁰² car, autrement, sans nulle doubte, des aussi tost que, en aucune de ces choses devant dites, iceluy mourant commence a crier ou a defaillir, |²⁰³ aussi tost trebuche et chiet de la sente et adresse de vie et de salut.

|²⁰⁴ Mais tu dois savoir sans nulle doubte, pour ce que aucuns pourroient troubler leur entendement de telles choses, |²⁰⁵ que, combien qu’il soit ainsi que le dyable d’enfer mette en la memoire du mourant celles temptacions subsequentes et ensuyvantes, |²⁰⁶ touteffois il est assavoir et dois fermement croire que en nulles d’icelles ne te peut faire nuysance s’il n’est ainsi que, quant tu estoies en ta franchise et liberal arbitre de ton entendement bien disposé et sans contrainte, tu luy eusses aucune adhesion faicte ou aucun accort, |²⁰⁷ car autrement il ne te peut rien, se ce n’est par toy, a cause que, quant tu as peu resister contre luy tu ne l’as pas fait.

|²⁰⁸ Et, se tu l’as contredit a ton pouoir et as fait ce qui en toy estoit, maintenant saches de certain que Dieu te donnera resistence de luy |²⁰⁹ pour ce que, de toy maintenant, tu ne le peux faire et dois avoir en ton benoist Dieu a celle heure une grande esperance de secours et croire fermement qu’il ne souffrira point que le dyable puisse envers toy aucune chose. |²¹⁰ Car, ainsi que dit le prophete David |²¹¹ Non privabis bonis eos qui ambulant in innocencia : beatus homo qui sperat in te, |²¹² c’est a dire « O Sire, benoist est celuy qui met son esperance en toy, car tu ne le priveras pas de tes biens ». |²¹³ C’est a entendre que, s’il l’appelle en sa necessité, qu’il luy secourra et donnera son aide, |²¹⁴ car, aussi comme celuy mesmes prophete dit |²¹⁵ Prope est Dominus omnibus invocantibus eum, omnibus qui inb i rvocant eum in veritate, |²¹⁶ c’est a dire que « Dieu le Createur est pres a tous ceulx qui le demandent en vraie necessité ».

|²¹⁷ O creature raisonnable et ame devote, espere et aies confidence en ton doulx et begnin Createur et luy recorde et met devant luy ce qu’il a promis par la bouche de son prophete |²¹⁸ en disant le dit de l’Escripture devant dicte : |²¹⁹ « Sire Dieu, je croy que tu es pres et regardes noz necessitéz. |²²⁰ Je te appelle et demandes ton aide en verité et honneur de toy ; |²²¹ secours moy en ceste chose en la quelle tu congnois ma grant misere, |²²² car je sçais certainement que de nul autre ne puis estre delivré. »

|²²³ Ainsi donc, tout bon catholique et vray crestien esperant en la Providence de Dieu ne doit craindre de doubter en quelque chose les erreurs, les illusions ne toutes les persuasions du dyable, |²²⁴ car il est en toutes ses promesses deceptible et menteur selon ce que la verité de la saincte Evangile nous tesmoigne, disant : |²²⁵ Mendax est et pater ejus, |²²⁶ c’est a dire que « Le dyable est mensongier et pere de mensonge ».

|²²⁷ O ame devote, persevere fermement en la vraie unité et vertueuse obedience de nostre mere saincte Eglise et ainsi dois mourir.

|²²⁸ Mais, selon ce qu’il est acoustumé en d’aucunes religions estre fait, il est tres utile que le Symbole de la foy, c’est assavoir le Credo, soit dicte et les articles declairéz a haulte voix |²²⁹ plusieurs fois devant ceulx qui sont en la bataille de la mort |²³⁰ affin qu’ilz soient en courage plus fortz et plus fermes, plus vertueux et plus constans et aussi que les ennemys se mettent en fuyte, les quelz ne peuent jamais icelles articles ouyr.

|²³¹ Et, avecques ce, pour avoir greigneure constance et plus ferme, principallement doit estre au malade la foy de noz anciens peres tres loiaulx a Dieu enarree et declairee, |²³² come a foy de Abraham, son amy, le quel crut a ce qu’il luy fut dit, qu’il auroit ung filz nommé Ysaac, |²³³ au quel airoit a donner benediction, le quel filz multipliroit en la terre come les estoilles se multiplient au ciel. |²³⁴ Et, non obstant que son aage feust passee et de sa femme aussi, croians a la puissance de Dieu plus que a la defaulte de nature, comme il avoit esté promis ainsi fut fait. |²³⁵ Et, en aprés, en ensuyt a Abraham benediction. |²³⁶ Et aussi la foy de Ysaac, son esleü, le quel crut a la promesse qui luy fut faicte de Dieu, |²³⁷ disant [b i v] que, toutes les regions et contrees qu’il avoit acordees a son pere Abraham, icelles possideroit et multipliroit de sa semence et, aprés luy, a ses enfans donneroit benediction. |²³⁸ En aprés, semblablement, de Jacob, son bien aymé, le quel crut et adjousta foy a la promesse de Dieu, quant il cheminoit par la terre en la quelle il dormoit, |²³⁹ qui luy dist qu’il luy donneroit et a sa semence et qu’il la multipliroit ainsi comme la pouldre de la terre par toutes les parties du monde, |²⁴⁰ c’est assavoir en orient, en occident, en septentrion et en mydi, et qu’il seroit son protecteur et defenseur en toutes ses necessitéz. |²⁴¹ Et en celles promesses tous y ont adjousté foy sans nulle deviacion et ainsi leur a esté fait et tenu par la vertu de la foy, |²⁴² ainsi qu’il est mis et desclairé d’Abraham au livre de Genese, au .xviii^e. chapitre, quant il dit qu’il sera pere de plusieurs gens, et de Ysaac, au .xxvi^e. chapitre, et de Jacob, au .xxviii^e. d’icelluy livre.

|²⁴³ Et aussi au malade doit estre rememorisee la foy des payens et infideles, comme, par foy, ilz sont venus a baptesme, |²⁴⁴ et pareillement la foy des apostres, des martirs, des confesseurs, des vierges et de plusieurs autres innombrables. |²⁴⁵ Et la cause est tres bonne, car tous les anciens et semblablement ceulx de maintenant par foy ont pleu moult a Dieu, |²⁴⁶ car, comme il est dit devant, il y a en foy double utilité. |²⁴⁷ La premiere est vraye foy et c’est celle qui croit toutes choses impossibles estre possibles quant a l’entendement. |²⁴⁸ Et de ceste tesmoigne l’Evangile par la bouche de Dieu, en disant : |²⁴⁹ Omnia sunt possibilita credenti, |²⁵⁰ c’est a dire que « Toutes choses sont possibles a celluy qui les croit ». |²⁵¹ La seconde est vraye foy, la quelle nous impetre toutes choses, |²⁵² ainsi que Nostre Seigneur dit en l’Evangile : |²⁵³ Quicquid orantes petitis credite, quia accipietis et fiet vobis, |²⁵⁴ c’est a dire, mes amys, « Croyéz de certain que, se vous me demandéz quelque chose, que vous l’auréz ».

|²⁵⁵ Et ces choses dictes suffisent quant pour la premiere temptacion qui est de la foy.

¹⁸¹ Note : Paul, Première Épitre aux Corinthiens, 3, 11
¹⁸⁴ Note : Paul, Épitre aux Hébreux, 11, 6
¹⁸⁷ Note : Augustin, De Fide et Operibus, I, 15, 24.
¹⁸⁹ Leçon non conservée : .vii.
¹⁹⁰ Note : Jean, 3, 18
²⁰² Leçon non conservée : aucune des ces
²¹¹ Leçon non conservée : innoscencia – Note : Psaumes, 83, 13
²¹⁵ Note : Psaumes, 144, 18.
²²⁴ Note : Jean, 8, 44
²³² Leçon non conservée : n. Jacob – Note : Genèse, 21-24
²³⁹ Leçon non conservée : qui manque
²⁴² Note : Genèse, 18, 26-28 ; 21-12-13; 27, 27-29.
²⁴⁹ Note : Marc, 9, 23.
²⁵³ Note : Marc, 11, 24.