|²⁵⁶ De desesperance, seconde temptacion.

|²⁵⁷ Quant le dyable d’enfer, en tant comme il a peu tempter, apperçoit que en nulle maniere il n’a rien fait et qu’il n’y a point de effect aux temptacions qu’il a presentees a la creature [b ii r] estante en l’article de la mort et que elle est demouree ferme sans quelque variacion, |²⁵⁸ pourtant, s’il se voit sourmonté et confondu en la temptacion premiere, la quelle a esté de la foy, sy ne se tient il pas a tant, |²⁵⁹ mais incontinent met paine de l’oster de la bonne esperance la quelle il voit avoir a la bonne creature et aussi de la confidence la quelle il congnoit que le mallade met en Dieu, |²⁶⁰ considerant que, ces choses ostees, il pourra abatre le malade et faire trebucher en voie de desesperacion.

|²⁶¹ Et, adonc, quant il voit que la douleur au malade croist et qu’il est fort tourmenté et passionné, |²⁶² il luy met et adjouxte douleur sur douleur, |²⁶³ en luy remettant en memoire et devant les yeulx de son entendement tous ses pechéz |²⁶⁴ en toutes les manieres qu’il peut, comme l’orreur, l’abhominacion, la grandeur et la multitude d’iceulx, |²⁶⁵ affin que, par aucune de ces choses, il le puisse faire cheoir en desesperance.

|²⁶⁶ Et sachent tous, comme dit Innocent, tres venerable docteur, parlant De la Vilité de la condicion humaine, en son tiers livre, |²⁶⁷ que chacun homme, soit bon soit mauvais, verra Nostre Seigneur Jesucrist estendu en croix, devant que son ame ysse de con corps, |²⁶⁸ mais ce sera differentement, car le bon le verra a sa joye et le mauvais le verra a sa douleur, tristresse et confusion |²⁶⁹ affin qu’il ait honte que le fruyt de la passion Jesucrist et redempcion du monde ne luy sera point vaillable pour son remede et pour son salut.

|²⁷⁰ Sy devéz savoir que les pechiéz non confesséz les quelz la creature a commis, faitz et perpetréz en sa vie, le dyable les sçait tous entierement |²⁷¹ et, adonc, il les luy remet en sa memoire quant il est prest et appareillé de rendre son ame a Dieu, |²⁷² affin qu’il le face cheoir en desespoir et qu’il puisse, par ce, prendre et ravir son ame.

|²⁷³ Mais, non obstant, n’est ce pas a dire que nul se doyve desesperer ne mettre hors de son bon propos en nulle maniere queconques, |²⁷⁴ voire supposé qu’il ait commis autant de fois larcin et autant de fois homicide comme il y a de gouttes de eaue en la mer et de grains de pouldre sur la terre.

|²⁷⁵ Et supposé qu’il n’en feist oncques penitance et qu’il n’en fust oncques confessé et, avecques tout ce, a ceste heure en la quelle il se trespasse, il n’en a faicte quelque confession, |²⁷⁶ et non pas seulement de ceulx devant nomméz mais aussi de tous [b ii v] autres innombrables, |²⁷⁷ sans faulte croy fermement que encore n’est ce point que tu te doives desesperer de la misericorde de Dieu, le quel est doulx, begnin et naturellement piteux.

|²⁷⁸ Car saches de certain qu’en tel cas et a telle heure Dieu ne desire fors que tu soyes sauvé, mais que tu en aies contricion et desplaisance : |²⁷⁹ car, selon ce que dit le saint prophete David |²⁸⁰ Cor contritum et humiliatum Deus non despiciet, |²⁸¹ c’est a dire que « Le cueur contrit et humilié Dieu ne le desprisera point » |²⁸² mais le recevera begninement en sa misericorde.

|²⁸³ Et de ce mesmes parle Ezechiel le prophete, disant : |²⁸⁴ Quacumque hora ingemuerit peccator peccatum, salvus erit, |²⁸⁵ c’est a dire que « En quelcunque heure que le pecheur se recordera en contricion de son pechié, il sera saulvé ».

|²⁸⁶ Et, a ce propos, dit le glorieux et devot docteur saint Bernard : |²⁸⁷ Major est Dei pietas quam quevis iniquitas, |²⁸⁸ c’est a dire que « La pitié et misericorde de Dieu est greigneure que ne sçairoit estre quelconque iniquité ».

|²⁸⁹ Et saint Augustin dit aprés : |²⁹⁰ Neminem desperandum est dum est in hac vita, |²⁹¹ c’est a dire que « Nul qui soit en ce monde, tant soit grant pecheur, ne se doit deffier de la misericorde de Dieu ». |²⁹² Et la cause est bien raisonable, car il dit aprés : |²⁹³ Solum desperacionis crimen est quod mederi non potest, |²⁹⁴ c’est a dire qu’« Il n’est pechié, tant soit grant, qui n’ait aucun remede, se n’est le pechié de desesperacion ». |²⁹⁵ Et, aprés encore, saint Augustin dit ainsi : |²⁹⁶ Non nocent mala preterita si non placent, |²⁹⁷ c’est a dire que « Les pechiéz passéz que tu as commis ne te nuyront point se tu en as desplaisir ».

|²⁹⁸ Et, par ces causes, tu dois avoir forte perseverance en la doulceur et benignité de ton doulx et benoit Createur. |²⁹⁹ Mais considere plus fort, qu’il feust ainsi que en tout le monde universellement tu eusses commis tout seul tous les pechiéz qui oncques furent faits et qu’entre toutes les creatures de ce monde, n’eust pecheur que toy, encore, pour telle cause, ne te dois tu pas desesperer.

|³⁰⁰ Et, pareillement, je te dys et il est vray que, se le cas advenoit que tu fusses reputé ou tenu du nombre des dampnéz, encore, quelque chose qu’il en soit, |³⁰¹ ne te dois tu point desesperer, |³⁰² pour ce que, par desesperance, le tres piteux et souverain Dieu est griefvement offensé |³⁰³ et les pechiéz aussi en sont, sans quelque comparaison, plus [b iii r] aggravéz et les paines d’enfer infiniment, sans remission, plus griefves a tourmenter.

|³⁰⁴ Pour ce donc, a toute creature et principallement au malade, on doit donner cause d’avoir confidence en Dieu, quant il est en la bataille de la mort, |³⁰⁵ en luy recordant la disposicion de Dieu pendant en croix, selon l’exhortacion du benoist saint Bernard, disant par doulce et gracieuse exhortacion, ainsi que s’il voulsist demander : |³⁰⁶ Quis non rapietur ad spem et ad confidenciam impetrandam si attenderit in cruce corporis Christi disposicionem ? |³⁰⁷ C’est a dire « Qui sera celuy cueur sy dur, |³⁰⁸ considerant la maniere de la disposicion du corps Jesucrist pendant en la croix, qui ne soit promeu a avoir esperance de sa misericorde ? », ainsi comme s’il voulsist respondre qu’il n’est nul. |³⁰⁹ Et dit aprés : |³¹⁰ Vide caput inclinatum ad te calutandum, os ad te osculandum, brachia extenta ad te complectendum, |³¹¹ manus perforatas ad te largiendum, latus apertum ad te diligendum et tocius corporis extensionem ad se totum tibi impendendum, |³¹² c’est a dire « O creature de Dieu et ame devote, œuvre les yeulx de ton entendement et regarde le chief de ton Dieu encliné pour te saluer, la bouche abandonnee pour te baiser, |³¹³ les bras estendus pour toy embrachier, les mains perchees pour a toy eslargir et donner, le costé ouvert pour t’aymer et est tout son corps estendu pour soy totallement a toy habandonner ».

|³¹⁴ Et, pour ces causes donc, nul, en quelque maniere que ce soit, ne se doit desesperer, |³¹⁵ mais plainement se doit a Dieu confier, |³¹⁶ car celle vertu est moult louable et plaine de merite devant Dieu, |³¹⁷ comme saint Pol l’apostre nous exhorte icelle garder songneusement, en disant : |³¹⁸ Nolite amittere confidenciam vestram que magnam habet remuneracionem.

|³¹⁹ Pour tant donc, nul, tant soit grant et abhominable pecheur, ne se doit desesperer qu’il n’ait pardon s’il le veult et sçait requerir, |³²⁰ car de cecy nous avons tres manifeste exemple de saint Pierre l’apostre, qui renya Jesucrist, |³²¹  et de monseigneur saint Pol, qui estoit sy grant persecuteur de saincte Eglise, et aussi des deux publicans, c’est assavoir saint Mathieu et Zachee, |³²² pareillement de Marie Magdalene pecheresse, de la femme apprehendee en adultere, |³²³ du larron pendant jouxte la croix, |³²⁴ de [b iii v] Marie Egipciane |³²⁵ et, avec tout ce, de moult d’autres innombrables pecheurs et pecheresses qui tous ont trouvé misericorde en Nostre doulx Sauveur et Redempteur Jesucrist.

|³²⁶ Par les quelles choses le dit de la saincte Escripture est confermé, car, aucune fois ou le delit a plus habondé, grace y a superhabondé. |³²⁷ Par quoy il appert que la misericorde de Dieu est sur toutes ses œuvres.

|³²⁸ Et ces choses suffisent pour la seconde temptacion, qui est desesperance.

|³²⁹ De impacience, tierce temptacion.

|³³⁰ Voyant de rechief le dyable d’enfer qu’il ne peut venir a son intencion par desesperance, tantost aprés, sans nul relache, il met tout son estudie de mener et esmouvoir la creature contre Dieu par impacience, |³³¹ la quelle est contraire a charité, par la quelle nous sommes tenus aymer Dieu sur toutes choses.

|³³² Et, pour ce qu’il sçait que tres grande douleur seuffrent et portent les creatures qui sont au mourir |³³³ et principallement ceulx qui ne meurent pas de mort naturelle, |³³⁴ la quelle vient a tart, ainsi que tu vois et comme experience manifeste te l’enseigne, |³³⁵ mais vient souvent par aucun accident comme de fievre et d’apostume ou autre maladie et enfermeté griefve et plaine de tourment, longue et plaine d’ennuy, |³³⁶ par la quelle ilz sont contrains a mourir, |³³⁷ et, pour ce que aucune fois ilz sont mal disposéz a la mort, |³³⁸ plusieurs meurent sans faire accord de leur voulenté a la voulenté de Dieu.

|³³⁹ Et, en ceste maniere, la douleur qui leur semble trop grande les rend en leur impacience ainsi comme folz et insenséz, comme on le voit en plusieurs. |³⁴⁰ Par quoy il appert clerement que telz certainement defaillent en vraie charité, |³⁴¹ selon que nous tesmoigne saint Jerome, qui dit : |³⁴² Si quis cum dolore egritudinem vel mortem suscipit, signum est quod Deum sufficienter non diligit, |³⁴³ c’est a dire que « S’aucune reçoit contre sa voulenté mort ou maladie, c’est signe qu’il n’ayme point suffisaument Dieu » |³⁴⁴ ayans le default de charité, par quoy ilz sont faitz impaciens a Dieu, murmurans contre luy.

|³⁴⁵ Ainsi donc est il totalement necessaire a toute personne qui veult bien mourir qu’il ne murmure point, en sa mort [b iiii r] ne devant sa mort, de quelque enfermeté, tant soit plaine de tourment, soit longue ou briefve, |³⁴⁶ car, selon ce que dit saint Gregoire, en ses Moraulx : |³⁴⁷ Justa sunt cuncta que patimur et ideo valde injustum est si de justa passione murmuramus, |³⁴⁸ c’est a dire que « Toutes choses que nous souffrons sont justes » et que « c’est chose moult injuste se nous murmurons de ce qui nous est envoié de Dieu justement ».

|³⁴⁹ Pour ce donc, soions paciens, affin que puissons obtenir la promesse de l’Evangile, disant : |³⁵⁰ In paciencia vestra possidebitis animas vestras, |³⁵¹ c’est a dire « Vous possideréz vos ames en vostre pacience ». |³⁵² Car sachéz de vray que, ainsi comme l’ame est gardee et possidee par pacience, ainsi elle est perdue et dampnee par murmure et impacience.

|³⁵³ Et de cecy nous dit saint Gregoire, en une de ses Omelies : |³⁵⁴ Regnum celorum nullus murmurans accipit, |³⁵⁵ c’est a dire que « Nul qui murmure ne peut avoir le roiaulme du ciel ». |³⁵⁶ Car, ainsi comme dit Albert, venerable docteur, parlant de vraie contricion : |³⁵⁷ Vere contritus ad omnem afflictionem et infirmitatem letanter se offert ut pro offensa Deo satisfacere digne possit, |³⁵⁸ c’est a dire « Le vray contrit et repentant s’offre joyeusement a toute enfermeté et affliction affin qu’il puisse dignement satisfaire a Dieu pour ses offences ».

|³⁵⁹ Donc, de tant plus que chacun malade congnoit sa seulle propre enfermeté mendre ou plus legiere que les pechiéz par les quelz il a offensé Dieu, son benoist Createur, |³⁶⁰ de tant plus, sans nulle comparaison, il doit souffrir plus pacientement les douleurs et passions les quelles il a a endurer |³⁶¹ et aussi, avec ce, doit considerer que l’enfermeté la quelle il porte et endure devant sa mort luy peut estre, est ou sera pour son expurgatoire s’il prent pacience comme il appartient pour son salut, |³⁶² car selon ce que dit Albert, venerable docteur : |³⁶³ Non solum gratitudine indegimus in his que sunt as nostram consolacionem sed eciam in his qui sunt ad nostram afflictionem, |³⁶⁴ c’est a dire que « Nous n’avons pas seulement necessité rendre graces a Dieu des choses les quelles sont a nostre consolation mais aussi des choses les quelles sont a nostre tourment et affliction ».

|³⁶⁵ Pour quoy, a ce propos, saint Gregoire dit : |³⁶⁶ Divina dispensacione agitur ut prolixiori vicio prolixior egritudo adhibeat, |³⁶⁷ c’est a dire qu’« Il est souffert et permis [b iiii v] par dispensacion divine que, ainsi que le vice ou pechié a esté longuement continué, il est bien convenable que longue paine de maladie soit pour le salut adjoustee ». |³⁶⁸ Chacun enferme donc, et principallement celuy qui a a mourir, die avec saint Augustin : |³⁶⁹ Hic seca, hic ure ut in eternum michi parcas, Domine. |³⁷⁰ c’est a dire « O Sire Dieu, trenche et separe mon ame de mon corps a ta voulenté, embrase et brule ton povre meschant des tribulacions de ce monde par telle maniere que tu ne me veulles pas perdre eternellement ». |³⁷¹ Et, pour ce, dit saint Gregoire : |³⁷² Misericors Dominus, temporalem adhibet severitatem ne in eternum inferat ultionem, |³⁷³ c’est a dire que « Plusieurs fois, nostre Saulveur Jesucrist, doulx, begnin et misericors, envoie une petite temporelle tribulacion affin qu’il ne baille point eternellement aucun tourment ou cruciacion ».

|³⁷⁴ Aiant donc mis en ta memoire toutes ces choses, quant il est ainsi que la temptacion bataille encontre charité, sans la quelle nul ne peut estre saulvé, |³⁷⁵ pour telle cause, selon le dit de l’Apostre : |³⁷⁶ Vera caritas paciens est et omnia suffert, |³⁷⁷ c’est a dire que « Vraie charité est tousjours paciente et seuffre toutes choses ». |³⁷⁸ Et dois bien noter et entendre que pour grant cause est mys qu’elle seuffre toutes choses et qu’il est moult a peser et a noter, |³⁷⁹ car il entent et declaire que charité porte toutes choses pacientement, sans rien en excepter.

|³⁸⁰ Pour ce donc et par celle raison, toutes les maladies et enfermetéz sont a estre portees par raison de la pensee, sans murmure et sans nulle difficulté. |³⁸¹ Et de cecy dit monseigneur saint Augustin : |³⁸² Amanti nichil est difficile seu impossibile, |³⁸³ c’est a dire que « A celuy qui ayme nulle chose, tant soit forte a faire ne a porter, ne luy est aucunement difficile ne impossible ».

|³⁸⁴ Et ces choses dessus dites peuent suffire pour le present de la tierce temptacion, qui est de impacience.

²⁶² Note : Lothaire de Segni (Innocent III), De Vilitate condicionis humane, III.
²⁸⁰ Note : Psaumes, 34, 20.
²⁸⁴ Note : Ézéchiel, 33, 14-16.
²⁸⁷ Note : Bernard de Clairvaux, Sermones in Cantica canticorum, XIII.
²⁹⁰ Note : Augustin, Tractatus in Iohannis evangelium.
²⁹³ Note : Jérôme, Epistulae, V, 147 (Ad Sabinianum lapsum)
²⁹⁴ Leçon non conservée : perseverance eu la
²⁹⁶ Note : Augustin, De verbis Domini et apostoli,  XX (renvoie à Mathieu, 24, 19)
³⁰⁶ Note : Référence à Bernard partagée par la plupart des versions latines mais non identifiée.
³¹⁰ Note : Augustin,  Sermones Ad Fratres In Eremo Commorantes, XXXII.
³¹⁸ Note : Paul, Épitre aux Hébreux, 10, 35-39.
³³⁵ Leçon non conservée : Dans d’apostume, lecture conjecturale des deux premières lettres da, non encrées.
³⁴² Note : Référence à Jérôme (parfois à Jean) partagée par la plupart des versions en latin et en langues vernaculaires mais non identifiée.
³⁴⁷ Note : Grégoire I^er, Moralia in Job, XVIII
³⁵⁰ Note : Luc, 21, 19.
³⁵⁴ Note : Grégoire I^er, Homeliae in Evangelia, XIX.
³⁵⁷ Note : Albert le Grand, Enchiridion de virtutibus veris et perfectis, XXXIX, 3 (De contritione)
³⁶³ Note : Albert le Grand, Enchiridion de virtutibus veris et perfectis, XXXIX, 3 (De contritione).
³⁶⁶ Note : Grégoire I^er, Homeliae in Evangelia, XIX.
³⁶⁹ Note : Augustin, Enarrationes in Psalmos, XXXIII, II, 20.
³⁷² Note : Grégoire I^er, Epistula ad Marcellum, V.
³⁷⁶ Note : Paul, Première Épitre aux Corinthiens, 13, 4.
³⁷⁸ Leçon non conservée : ne lalmettre par
³⁸² Note : Manuel de saint Augustin, XXIV.