[c i v]

|⁵²⁰ La quarte partie est de quoy et comment on doit le malade enseigner, avec les deprecacions que on lui doit faire.

|⁵²¹ Combien qu’il soit de certain que les interrogacions devant dictes soient veues estre suffisantes, competentes et convenables seulement aux personnes religieuses et devotes, |⁵²² toutesfois, selon aucun venerable docteur Chancelier de Paris, |⁵²³ tous crestiens, tant seculiers que reguliers, doivent estre informéz et enquis plus certainement et plus clerement de leur estat et salut, en la bataille et luyte de la mort, |⁵²⁴ en la maniere des choses ensuyvantes.

|⁵²⁵ Et, premierement, telle demande doit estre faicte a la creature : |⁵²⁶ « Croy tu tous les principaulx articles de la foy avec l’exposicion de la saincte Escripture |⁵²⁷ selon l’opinion des sainctz docteurs catholiques de saincte Eglise et renonches a toutes heresies et foles erreurs reprouvees de l’Eglise ? |⁵²⁸ Et, avec ce, tu t’esjouys que tu meures en la foy Jesucrits et de nostre Mere saincte Eglise et en l’obedience et unité d’icelle ? »

|⁵²⁹ Secondement luy soit ainsi demandé : |⁵³⁰ « Recongnois tu avoir offensé griefvement et en moult de manieres et souvent ton benoist Createur, |⁵³¹ car, comme dit monseigneur saint Bernard, en ses Meditacions : |⁵³² Scio neminem absque sui ipsius cognicione salvari, de qua nimirum mater salutis humilitas oritur et timor Dei, qui et ipse sicut inicium est sapiencie ita et salutis, |⁵³³ c’est a dire « Je ne sçay, dit monseigneur saint Bernard, aucun estre sauvé sans la congnoissance de luy mesmes, de la quelle certainement humilité, mere de salut, est engendree et crainte de Dieu, |⁵³⁴ la quelle crainte, ainsy comme elle est commencement de sapience, ainsy est elle commencement de salut ».

|⁵³⁵ Tiercement, |⁵³⁶ il doit demander pardon de tous ses pechiéz commis contre la majesté de Dieu, contre son amour, contre sa benignité, contre sa bonté, |⁵³⁷ et des biens qu’il a peu faire qu’il n’a point faitz, et des biens qu’il a receus, des quelz il a esté ingrat, |⁵³⁸ non pas seullement pour la crainte de la mort ou de quelque paine mais pour l’amour de Dieu et de sa justice et pour la charité de la quelle nous sommes tenus iceluy aymer sur toutes choses, |⁵³⁹ et encore plus desirer qu’il veulle enluminer son cuer affin qu’il puisse avoir congnoissance des maulx qu’il a [c ii r] oubliéz, affin qu’il en puisse avoir contricion et desplaisance.

|⁵⁴⁰ Quartement, on lui doit dire : |⁵⁴¹ « Tu proposes vraiement te amender se tu avoies encore espasse de vivre et toy garder de plus pecher mortellement de propos deliberé, |⁵⁴² selon ton pouoir, pour quelque chose, tant te soit chiere, et jusques a la perte de la vie corporelle, devant que tu voulsisses plus offenser Dieu ? |⁵⁴³ Et, au sourplus, tu le pries qu’il te donne grace de continuer en ce bon propos. »

|⁵⁴⁴ Quintement : |⁵⁴⁵ « Tu pardonnes de bon cueur pour l’onneur et la reverence de Nostre Sauveur Jesucrist |⁵⁴⁶ a tous ceulx que tu as offensé de parolle ou de fait ou d’aucune chose nuysible ? |⁵⁴⁷ Et, semblablement, tu demandes et requiers pardon a tous ceulx que tu as offenséz en quelque maniere que ce soit ? »

|⁵⁴⁸ Sixtement : |⁵⁴⁹ « Veulx tu les choses qui point ne t’appartiennent estre entierement restituees, ainsi que tu es tenu, selon la valeur de tes facultéz |⁵⁵⁰ et habandonner tous tes biens jusques a suffisante et vaillable remuneracion. »

|⁵⁵¹ Septiemement :  |⁵⁵² « Croy tu pas que Jesucrist est mort pour toy |⁵⁵³ et que autrement tu ne peux estre sauvé sy non par le merite de sa passion ? |⁵⁵⁴ Et, de cecy, tu en rens graces a Dieu tant come tu peux ? »

|⁵⁵⁵ Quiconques donc pourra respondre par affirmacion, de bonne conscience et de foy non fainte a celles interrogacions, |⁵⁵⁶ tu auras evidente et claire congnoissance que, se la creature s’en va, que elle est du nombre des sauvéz.

|⁵⁵⁷ Et, se ainsi advient qu’on ne soit interrogué d’aucune des choses dessus dictes, comme il soit ainsi qu’il est pou de gens qui aient l’art ne l’instruction de ceste doctrine, |⁵⁵⁸ il doit retourner en luy mesmes en soy interrogant soubtillement et en considerant s’il est bien disposé aux choses permises, |⁵⁵⁹ car, certainement, sans celle disposicion, nul ne peut estre sauvé.

|⁵⁶⁰ Et, s’aucun est disposé ainsi qu’il est dit, se recommande du tout et commette en la passion de Jesucrist en tant comme il peut et que sa maladie souffrira, et qu’il en ait continuelle memoire, |⁵⁶¹ car, par icelle, toutes les tres grandes temptacions du dyable sont convaincues et sourmontees.

|⁵⁶² Aprés, selon le dit de saint Gregoire : |⁵⁶³ Omnis Christi actio nostra dicitur instructio, |⁵⁶⁴ c’est a dire que « Toute l’operacion de Jesucrist est dicte nostre instruction ».

|⁵⁶⁵ Pour icelle cause, les choses que Nostre Seigneur Jesucrist a faictes, [c ii v] mourant en la croix, le malade estant en la luyte de la mort doit par exemple ensuyr en tant comme il luy est possible.

|⁵⁶⁶ Et dois savoir que Nostre Seigneur Jesucrist a fait en la croix cinq choses.

|⁵⁶⁷ Car, tout premierement, il pria, car il profera ces pseaulmes : |⁵⁶⁸ Deus, Deus meus, respice in me, |⁵⁶⁹ et les autres huyt jusques a ce vers : |⁵⁷⁰ In manus tuas, et cetera. |⁵⁷¹ Secondement, il cria. |⁵⁷² Tiercement, il commanda son ame a son Pere. |⁵⁷³ Quartement, il ploura en la croix, ainsi que tesmoigne l’Apostre. |⁵⁷⁴ Quintement, il bailla son esperit, ainsi que tesmoignent les Evangelistes. |⁵⁷⁵ Vecy les choses les quelles le malade constitué en l’article de la mort doit faire, a l’exemple de Jesuscrist, |⁵⁷⁶ c’est assavoir prier |⁵⁷⁷ et, s’il ne le peut faire de voix, au moins le doit il faire de cueur.

|⁵⁷⁸ Et, pour ce, dit Ysidore : |⁵⁷⁹ Melius est cum silencio orare cordis, sine sono vocis, quam solum verbum exprimere sine intuitu mentis, |⁵⁸⁰ c’est a dire que « C’est meilleure chose prier Dieu avec silence de cueur, sans son de voix, que seulement mettre et exprimer la parolle par dehors sans le regard de la pensee ».

|⁵⁸¹ Secondement, il doit crier fort de cueur et non pas de voix, |⁵⁸² car crier de cueur n’est autre chose que la remission des pechiéz et fort desirer la vie eternelle.

|⁵⁸³ Tiercement, il doit plourer, non pas des yeulx charnelz mais par larmes de cueur, c’est assavoir en aiant vraie repentance.

|⁵⁸⁴ Quartement, il doit recommander son ame a Dieu, disant : |⁵⁸⁵ In manus tuas, et cetera.

|⁵⁸⁶ Quintement, il doit bailler son ame et voluntairement mourir en conformant sa voulenté a la voulenté divine, comme il appartient.

|⁵⁸⁷ Aprés, tant comme la créature estante au mourir aura usage de raison et que elle pourra parler, |⁵⁸⁸ die ces oraisons ensuyvantes : |⁵⁸⁹ O summa Dei immensa bonitas, clementissima et gloriosissima Trinitas, summa dilectio, amor et caritas, miserere michi, miserrimo peccatori. |⁵⁹⁰ Tibi enim commendo spiritum meum. |⁵⁹¹ En ceste oraison, tu dis a Dieu en ceste maniere : |⁵⁹² « O haultesse souveraine et bonté de Dieu, tres glorieuse et clemente Trinité, aies mercy de moy, povre pecheur, |⁵⁹³ car certainement je te commande mon esperit ».

|⁵⁹⁴ Aprés die ceste oraison ensuyvante : |⁵⁹⁵ Deus, Deus meus, piissime Pater misericordiarum, fac huic paupercule creature tue misericordiam, adjuva eam nunc et in utltima necessitate, |⁵⁹⁶ succurre, Domine, jam [c iii r] egenti anime et desolate ut non a canibus infernalibus devoretur. |⁵⁹⁷ En ceste oraison, tu requiers : |⁵⁹⁸ « O mon Dieu, tres debonnaire Pere de misericorde, fay a ta povre creature misericorde |⁵⁹⁹ et luy aide maintenant au derrain de sa necessité. |⁶⁰⁰ O Seigneur, donne secours a l’ame desolee et souffreteuse affin qu’elle ne soit des chiens infernaulx devoree. »

|⁶⁰¹ Item die ceste oraison qui ensuyt : |⁶⁰² Dulcissime et amantissime Domine Jesucriste, fili Dei vivi, ob honorem et virtutem tue beatissime passionis, jube me, famulum ttum, recipi inter numerum electorum tuorum. |⁶⁰³ En ceste oraison, tu pries et ditz : |⁶⁰⁴ « O tres aymé et doulx Seigneur Jesucrist, filz de Dieu, pour le vertu et honneur de ta tres benoiste passion, commande |⁶⁰⁵ que ton serviteur soit receu entre le nombre de tes benoistz esleus. |⁶⁰⁶ O Sauveur et Redempteur Jesus, je me rens a toy, |⁶⁰⁷ ne me veulles pas refuser, je viens a toy, |⁶⁰⁸ ne me veulles pas debouter. »

|⁶⁰⁹ Item die : |⁶¹⁰ « O Sire Jesus, je requier ton paradis non pas pour la valeur de mes merites, car je suis cendre et pouldre et tres miserable pecheur, |⁶¹¹ mais en la vertu et efficace de ta tres saincte passion, par la quelle moy meschant as voulu racheter et, par l’effusion de ton sang, as voulu que j’aye paradis. »

|⁶¹² Item die plusieurs fois ce verset : |⁶¹³ Dirupisti vincula mea, Domine, |⁶¹⁴ tibi sacrificabo hstiam laudis et nom Domini invocabo, |⁶¹⁵ c’est a dire : |⁶¹⁶ « O Sire, tu es celuy qui a rompu tous mes lyens, c’est assavoir tous mes pechéz, |⁶¹⁷ et, pour ceste cause, je veul a toy sacrifier sacrifice de louenge et invoqueray le nom de Nostre Seigneur. » |⁶¹⁸ Ce vers, selon le dit de Cassiodore, est de sy grant vertu que tous les pechiéz de l’omme sont pardonnéz s’il le dit trois fois avec confession et recongnoissance de ses deffaultes.

|⁶¹⁹ En aprés die : |⁶²⁰ « O Sire Jesus, pour la tres grande amertume et angoisseuse passion que tu as soustenue pour moy en la croix a celle heure que ta tres beneuree ame yssit de ton corps, ayes pitié de mon ame a son yssue. »

|⁶²¹ En aprés aussi, invoque et appelle instamment de cueur et de bouche, en tant qu’il t’est possible, la glorieuse Vierge Marie, |⁶²² prompte moyenne et ayderesse de tous pecheurs, en disant : |⁶²³ « O Royne des cieulx, Mere de misericorde, Refuge des pecheurs, reconsilie moy a ton seul filz, |⁶²⁴ demande pour moy, indigne pecheur, la cle[c iii v]mence et bonté d’iceluy et que, pour l’amour de toy, il me pardonne mes pechiéz. »

|⁶²⁵ Mais, pour ce que plusieurs sont qui nullement ne veulent rien ouÿr de la mort aucune fois, |⁶²⁶ selon le dit d’aucun docteur Chancelier de Paris, |⁶²⁷ souvent advient que, par une telle vaine et faulse consolacion et fainte santé et confidence de corps, la creature encourt moult souvent en perpetuelle dampnacion.

|⁶²⁸ Affin qu’il ne adviengne en ceste maniere, le malade ou enferme doit procurer la santé de son ame par vraie contricion et pure confession. |⁶²⁹ La quelle chose pourra moult valoir a son salut, car, par telz choses, il en sera plus paissible et plus sceur.

|⁶³⁰ Combien qu’il soit ainsi, selon le dit saint Gregoire, |⁶³¹ que vraie contricion ne convient sy non a pou de gens, |⁶³² touteffois, selon saint Augustin, au quart des Sentences, et les autres docteurs, |⁶³³ penitance suffisante de salut est en ceste maniere, |⁶³⁴ principalement a ceulx les quelz en tout leur temps ne garderent onques les commandemens de Dieu et de l’Eglise |⁶³⁵ ne leurs veux voluntaires raisonnablement ne veritablement, mais seullement par maniere fainte les ont gardéz.

|⁶³⁶ Pour celle cause, a ung chacun en l’article de la mort est a estre dit que, selon la possibilité, par raison des merites, labours a vraie et ordonnee penitance. |⁶³⁷ C’est assavoir que, non obstant la douleur et la crainte en luy estante, qu’il use de raison en tant comme il peut |⁶³⁸ et aussi s’efforce avoir desplaisance voluntaire pour la fin la quelle est deue, c’est dire pour l’amour de Dieu, |⁶³⁹ et delaisse, pour l’amour de luy, l’effect a sa propre inclinacion et delectacion des choses precedentes |⁶⁴⁰ et laboure a discipline en tant qu’il pourra, combien qu’elle soit briefve. |⁶⁴¹ Et, affin qu’il n’entre en desesperacion, luy soient proposees les choses qui sont dictes en la seconde partie.

⁵³² Note : Bernard de Clairvaux, Sermones in Cantica Canticorum, XXXVII, 1
⁵⁶³ Note : Le passage cité renvoie en réalité à Thomas d’Aquin, Lectura in Iohannis evangelium, XI, 6.
⁵⁶⁸ Note : Psaumes, 21, 2
⁵⁷⁰ Note : Psaumes, 30, 6
⁵⁷⁹ Note : Isidore de Séville, Opera omnia, De oratione, VII, 4.
⁵⁸⁵ Note : Psaumes, 30, 6
⁶⁰² Note : Jean Gerson, Guide brefve et facille des Curéz, p. 223.
⁶¹³ Note : Psaumes, 115, 16-17
⁶¹⁴ Note : Psaumes, 115, 8
⁶¹⁶ Note : Psaumes, 115, 16-17
⁶¹⁷ Note : Psaumes, 115, 8
⁶³² Note : Il s’agit ici vraisemblablement d’un renvoi au quatrième Liber sententiarum de Pierre Lombard, dont la pensée s’inscrit dans le prolongement de celle d’Augustin.