|¹⁴³³ Des articles de la foy.

|¹⁴³⁴ Pour eviter a ignorance, il est assavoir qu’il sont quatorse articles de la foy, des quelz en y a sept appartenans au mystere de la Trinité, |¹⁴³⁵ c’est assavoir quatre appartenans a la Divinité et trois appartenans a l’operacion et effect d’icelle cheans sur la foy. [f iiii v] |¹⁴³⁶ Et les autres sept appartiennent a l’umanité de Jesucrist.

|¹⁴³⁷ Le premier article appartenant au mystere de la Trinité est « Croire en ung seul Dieu », |¹⁴³⁸ c’est a dire « Croire en unité de divine essence ainsi comme Trinité indivisible de trois personnes ». |¹⁴³⁹ Le second article est « Croire Dieu le Pere non engendré ». |¹⁴⁴⁰ Le tiers est « Croire Dieu le Filz ensemble, estre Dieu d’une substance et equalité avec le Pere et le Filz ». |¹⁴⁴¹ Le quart est « Croire le Saint Esperit ne fait ne engendré mais, procedant du Pere et du Filz ensemble, estre Dieu d’une substance et equalité avec le Pere et le Filz ». |¹⁴⁴² Le quint article est « La creacion du ciel et de la terre, c’est a dire de toute creature visible et invisible estre faicte de toute l’indivisible Trinité ». |¹⁴⁴³ Le sixiesme est « Croire la sanctificacion de l’Eglise par le Saint Esperit et sacrement de grace et les autres choses aux quelles l’Eglise chrestienne communique ; |¹⁴⁴⁴ en quoy est entendu que l’Eglise catholique, avecques ses lois et sacremens, riglee par le Saint Esperit, suffit pour salut a tout homme, tant soit grant pecheur, |¹⁴⁴⁵ et que ce qui est fait hors l’Eglise catholique n’est point pour salut ». |¹⁴⁴⁶ Le septiesme article est « Croire la consummacion de l’Eglise par la gloire eternelle, par la chair de Jesucrist qui est vraiement resuscité en ame et en corps ; |¹⁴⁴⁷ et, par opposite, est entendue dampnacion eternelle des reprouvéz ».

|¹⁴⁴⁸ Le premier article des sept qui appartiennent a l’umanité de Jesucrist est « Croire l’incarnacion du Filz de Dieu ou vraie chair prinse fut de la Vierge Marie ». |¹⁴⁴⁹ Le second est « La vraie nativité de Dieu incarné de la Vierge non corrumpue ». |¹⁴⁵⁰ Le tiers est « La vraie passion et mort en croix de Jesucrist soubz Pilate ». |¹⁴⁵¹ Le quart est « La vraie descente de Jesucrist aux enfers en ame, son corps reposant au sepulchre pour la despoulle d’iceulx enfers ». |¹⁴⁵² Le cinquiesme est « La vraie resurrection de mort a vie le tiers jour ». |¹⁴⁵³ Le sixiesme est « La vraie ascension d’iceluy Jesus aux cieulx. |¹⁴⁵⁴ Le septiesme article est « La tres certaine expectation d’iceluy au Jugement ».

|¹⁴⁵⁵ Et, aprés la declaracion de ces articles, on luy doit ainsi dire : |¹⁴⁵⁶  « O mon amy, il fault maintenant que tu aies charité, |¹⁴⁵⁷ c’est que ty aymes Dieu sur toutes choses et ton prochain pour l’amour de luy, car, sans charité, foy ne te profiteroit point, |¹⁴⁵⁸ selon ce que nous dit l’Apostre : |¹⁴⁵⁹ Si haberem omnem fidem ita ut montes transferam, caritatem autem non habuero, nichil michi prodest, [f v r] |¹⁴⁶⁰ c’est a dire que ‘Se j’ay foy si grande que je transmue les montaignes et je n’ay point charité, tout ce ne me proffite rien’. |¹⁴⁶¹ Pour ce donc, tant que tu peux, fay et accomply les œuvres de charité, car charité fait et accomplit de grans choses ou elle est, et, se on refuse a ouvrer, charité n’y est point. |¹⁴⁶² Pour ce, la chose est grande qui procede de bonne et grande voulenté. |¹⁴⁶³ Exerce donc les œuvres de pitié et, se tu as moult, donne habondamment. |¹⁴⁶⁴ Se tu as petit de chose, estudie a voulentiers la departir. |¹⁴⁶⁵ Et, devant toutes choses, se tu as aucun blecié injustement, se tu peux, fay vers luy satisfaction et, se tu ne peux, il est expedient de luy demander pardon. |¹⁴⁶⁶ Se aucun t’a fait aucun desplaisir, pardonne voulentiers affin que Dieu te pardonne et espargne a ceulx qui ont pechié en toy. |¹⁴⁶⁷ Ayme ceulx qui te ont en hayne. Retribue les biens pour les maulx, car Dieu dit : |¹⁴⁶⁸ Dimitte et dimittetur tibi, |¹⁴⁶⁹ c’est a dire : ‘Delaisse et on te delaissera’. |¹⁴⁷⁰ En aprés, il fault que ayes bonne et ferme esperance en Nostre Seigneur. |¹⁴⁷¹ Et, se aucune multitude de tes pechiéz accourt en ta pensee, deffay les et ne te desespere point mais pense ce qui est escript : |¹⁴⁷² Misericordia Domini super omnia opera ejus et ei soli proprium est misereri semper et parcere, |¹⁴⁷³ c’est a dire que ‘La misericorde est sur toutes ses œuvres et a luy seul est chose propre tousjours estre piteux et espargnable’. |¹⁴⁷⁴ Dy donc en ton cueur : |¹⁴⁷⁵ In te, Domine, speravi, non confundat in eternum, |¹⁴⁷⁶ c’est a dire ‘Sire, j’ay esperance en toy que je ne seray point confondu eternellement.’ |¹⁴⁷⁷ Espere donc en Nostre Seigneur et fay aucun bien tant comme tu peux, car celuy qui espere en luy sera de misericorde environné. |¹⁴⁷⁸ Ceste articulacion et enseignement delivre, conforte et eslieve la pensee selon ce que dit le prophete : |¹⁴⁷⁹ Qui sperant in Domino imitabuntur fortitudinem, assument pennas, volabunt et non deficient, |¹⁴⁸⁰ c’est a dire que ‘Ceulx qui esperent en Nostre Seigneur ensuyvront force et prendront esles et voleront et ne defauldront point’. |¹⁴⁸¹ Et dois entendre quant il dit volabunt, c’est a dire que ‘ilz voleront de tenebres en lumiere, de chartre en royaulme, de ceste presente misere a la gloire eternelle’. |¹⁴⁸² A la quelle gloire nous veulle conduyre et mener le Filz de la glorieuse Vierge Marie, qui est benoist au siecle des siecles. |¹⁴⁸³ Amen. »

¹⁴³² Note : Augustin, De agone christiano, XIII
¹⁴⁴⁶ Leçon non conservée : de Jesucrist qui manque
¹⁴⁵⁹ Note : Paul, Première Épitre aux Corinthiens, 13, 2.
¹⁴⁶⁸ Note : Augustin, Sermo IX de Evangelio Luc
¹⁴⁷² Note : Litaniae Sanctorum
¹⁴⁷⁵ Note : Psaumes, 30, 2
¹⁴⁷⁹ Note : Ésaïe, 40, 31