[f v v] 

| ¹⁴⁸⁴ Du prouffit et utilité de ceste doctrine.

|¹⁴⁸⁵ Affin que les estudians de ce livre qui pourroient avoir petite memoire des choses devant dictes puissent plus legierement recorder et mettre en leur retentive le prouffit et utilité salutaire de ceste estude |¹⁴⁸⁶ et que tousjours de mieulx en mieulx ilz soient animéz et enclins mettre en leur entendement chose dont il puisse sortir en leurs cueurs vertueux effect, |¹⁴⁸⁷ me suis disposé, soubz pou de paroles, enarrer les parties de ceste presente œuvre, |¹⁴⁸⁸ priant Dieu que, en la premiere partie, c’est assavoir de la louenge de la mort et science de bien mourir, puissons tellement mettre et ficher nostre entendement en celle science |¹⁴⁸⁹ que nous soions contens et appareilléz de mourir a la volenté de Dieu, nostre Createur.

|¹⁴⁹⁰ En la seconde partie, qui est des temptacions, puissons avoir telle vertu que nous aions victore de noz ennemys.

|¹⁴⁹¹ En la tierce, des peticions et demandes, puissons respondre en telle maniere que, par les veritables responses issantes de nostre bouche, appaire et soit manifeste la foy de nostre cueur.

|¹⁴⁹² En la quarte, puissons avoir telle instruction et enseignement qu’ilz nous puissent esmouvoir a devocion enflambee de charité.

|¹⁴⁹³ En la quinte, soions en telle maniere exhortéz que ce soit a nostre salut.

|¹⁴⁹⁴ En la sixte, puissons prendre telle ferveur d’oraison qu’elle nous prepare entree au royaulme de paradis.

|¹⁴⁹⁵ Et, consequamment et oultre la determinacion des parties dessus dictes, puissons, en aprés, fuyre et eviter toutes foles ymaginacions mises en nostre foy par la suggestion du dyable d’enfer.

|¹⁴⁹⁶ Et, semblablement, puissons avoir esperance ferme en la misericorde de Nostre doulx Sauveur et Redempteur Jesucrist, ses articles entierement et parfaictement croire |¹⁴⁹⁷ et son digne corps recevoir en toute netteté et purité defendement jusques en la gloire et vie pardurable. |¹⁴⁹⁸ En la quelle nous veulle conduire et mener le Pere et le Filz et le Saint Esperit, ung seul Dieu en trois personnes. |¹⁴⁹⁹ Au quel est honneur souverain et gloire eternelle. |¹⁵⁰⁰ Amen.

|¹⁵⁰¹ Cy fine le livre de La Doctrine de bien mourir.

¹⁴⁸⁴ Note : En titre courant
¹⁴⁸⁶ Leçon non conservée : chose donc il