|²³ Le premier chapiltre qui est de la louenge de la mort et de la maniere de bien morir.

[145v] |²⁴ Si comme dit le Philosophe en ses Ethiques, |²⁵ Quamvis secondum Philosophum, tercio Ethicorum, omnium terribilium mors corporis sit terribilissima, morti anime nullatenus est comparanda. |²⁶ La mort est chose terrible et la derniere de toutes les autres terribles, |²⁷ mais toutesfois la mort de l’ame est de tant plus horrible et plus espouentable et detestable que n’est celle du corps, |²⁸ de tant que l’ame est plus noble et plus precieuse que le corps. |²⁹ Dont dit monseigneur saint Augustin : |³⁰ Majus dampnum est in amiscione unius anime quam mille corporum |³¹ « Plus grant dommaige et plus grant perte est d’une ame morte et perdue que ce n’est de mille corps ».

|³² Et saint Bernard aussi dit : |³³ Totus iste mondus ad unius anime precium estimari non potest |³⁴ « Tout ce monde n’est nullement a comparager a la noblesse et dignité d’unne seulle [146r] ame ». |³⁵ Et dit le Psalmiste : |³⁶ « La mort des pecheurs entre les autres est tres mauvaise », |³⁷ car, quant ilz meurent, ilz meurent en corps et en ame ensemble. |³⁸ La mort du corps est la separation de l’ame et de luy, mais la mort de l’ame est separacion de Dieu et de elle. |³⁹ Jheremie le prophete dit, secundo capitulo : |⁴⁰ Duo enim mala fecit populus meus : me derelinquerunt fontem aque vive |⁴¹ « Mon peuple m’a deguerpy, qui suis la fontaine de vie ». |⁴² Et saint Augustin dit en son livre de La Cité de Dieu : |⁴³ « L’ame est morte si tost que Dieu l’a habandonnee |⁴⁴ si comme nous veons que le corps est mort si tost que l’ame l’a habandonné ».

|⁴⁵ Or est ainsi que, si comme la mort des pecheurs est mauvaise, |⁴⁶ « La mort des saintz est tres bonne », come dit et tesmoigne le sus nommé Psalmiste, « et est tousjours precieuse devant Nostre Seigneur ». |⁴⁷ Je dy des saintz qui vaincquent l’amour de leur nature par regart de l’amour de Nostre Seigneur, [146v] qui est universel acteur et reparateur de nature humaine.

|⁴⁸ Pourtant doncques, de quelque mort corporelle que telz saintz meurent, est tousjours precieuse. |⁴⁹ Je ne dy pas seullement des saintz martirs ou eslus mais aussi des autres qui sont justes, assavoir des bons chrestiens |⁵⁰ qui vainquent, en esperance de immortalité, la desperacion de ceste presente vie mortelle en mourant en Nostre Seigneur Jhesucrist en esperance de leur justificacion, |⁵¹ selon qu’il est escript par l’Apostre, disant : |⁵² « Jhesucrist est mort pour noz pechiéz et est resuscité pour nostre justificacion ». |⁵³ Et, pour ce, se nous mourons avec luy, nous vivrons aussi avec luy.

|⁵⁴ Puis encore di que non seullement la mort des saintz et des justes est precieuse |⁵⁵ mais aussi celle des pecheurs, combien que mauvais soient, |⁵⁶ c’est assavoir de ceulx qui meurent en contricion et repentence de leurs [147r] pechiéz et en vraye foy et unité de nostre Mere sainte Eglise. |⁵⁷ Dont Dieu nous dit, par la bouche de son prophete Ezechiel, 2^o et .xxxiii^o. : |⁵⁸ Si dixero impio « Morte morieris », et egerit penitenciam a peccato suo, vita vivet et non morietur |⁵⁹ « Se bien je dy a aucun mauvais pecheur ‘Tu morras’ |⁶⁰ et il fait penitence de son pechié, il ne mourra pas pourtant, mais vivre de vie ». |⁶¹ Et ce est a entendre selon le final Jugement, c’est a dire de la rigoureuse justice de la quelle Nostre Saulveur usera en son derrain Jugement. |⁶² Si pouons icy veoir comme Dieu change sa sentence, ja soit ce que son conseil permagne eternellement.

|⁶³ Pourtant, comme dit l’apostre en l’Apocalipse : |⁶⁴ Beati mortui qui in Domino moriuntur |⁶⁵ « Beneureux sont les mors qui meurent en Nostre Seigneur », |⁶⁶ car, comme il est recité ou quart chapiltre du Livre de Sapience, |⁶⁷ « Se bien le juste est pre[147v]occuppé de mort, c’est a dire s’il meurt ainçois qu’il ait fait ou acompli sa penitence, il toutesfoys obtendra refrigere par grace », |⁶⁸ car il sera mis en lieu remissible et venial, assavoir en purgatoire, qui est venial, et non pas en enfer, |⁶⁹ pourveu que, en mourant, il supporte toutes temptacions et batailles de mort constamment et prudentement. |⁷⁰ Platon dit : |⁷¹ Summa prudencia est continue mortem sepe premeditari |⁷² « Souverainne philosophie, c’est a dire souveraine saigesse, est avoir continue meditacion de la mort ». |⁷³ Et le Saige aussi dit : |⁷⁴ « La mort n’est autre chose que une yssue de prison ». |⁷⁵ Sur quoy le Psalmiste concordant dit : |⁷⁶ Educ de custodia animam meam, .xli^o.c^o. capitulo, |⁷⁷ « Delivre, Sire, mon ame de prison ». |⁷⁸ La fin qui est fin de tout peril est deposicion de tres grant charge |⁷⁹ et, pour ce, quant l’ame est deschargee du corps, elle est quitte d’une grant charge.

148r] |⁸⁰ Les philosophes dient que l’ame au commencement de sa creacion, c’est quant elle entre au corps, va hors de soy, c’est a dire hors de sa nature, |⁸¹ car elle va de region non materiale, assavoir du ciel, a region materiale, assavoir du monde, ou quel elle demeure comme en exil, |⁸² car la region dont elle vient est pure et nette, sans chaleur, sans froideur et sans nulle corruption, et la region du monde est froide et chaulde et plaine de maladies et de toutes corrupcions.

|⁸³ Et pour ce est il que la mort est terminacion de toutes maladies. |⁸⁴ Elle est aussi evasion de mortiferes questions et de perilz. |⁸⁵ Elle est consummacion de tous maulx. |⁸⁶ Elle est dirrupcion des liens de ceste miserable vie mondaine. |⁸⁷ Elle est solucion du droit de nature. |⁸⁸ C’est le retour au pays. |⁸⁹ C’est celle qui nous met en voye d’aler en gloire. |⁹⁰ Ecclesiastes dit : |⁹¹ Dies mortis est melior die nativtatis, .vii^o. capitulo : |⁹² « Mieulx vault [148v] le jour de la mort que le jour de la nativité ». |⁹³ Et ce est a entendre des bons tant seullement, car, quant aux mauvais, ne le jour de la nativité ne celuy de la mort ne se peut dire bon.

|⁹⁴ Et, pour ce, le bon chrestien et aussi chascun pecheur qui est feal et a contricion et repentence de ses pechiéz ne doit jamais doubter la mort corporelle ou temporelle |⁹⁵ ne se troubler nullement par regart d’elle, quelle que elle soit. |⁹⁶ Aussi, en quelque maniere ou par quelque cause que elle vienne, on la doit actendre tousjours et recevoir de franche voulenté |⁹⁷ en confermant sa voulenté a la divine voulenté |⁹⁸ comme il en est tenu juste la parolle saint Mathieu, ou .vi^e. chapiltre : |⁹⁹ Fiat voluntas tua sicut in celo et in terra |¹⁰⁰ « Ta voulenté soit faitte en la terre si comme au ciel ». |¹⁰¹ Aussi par l’exemple Nostre Sauveur, qui dist : |¹⁰² Pater my, non mea voluntas sed tua fiat, [149r] |¹⁰³ en faisant oroison au Jardin au temps de sa benoiste passion, |¹⁰⁴ « Mon Pere, non pas ma voulenté mais la tienne soit faitte », |¹⁰⁵ car chascune son action est nostre instruction.

|¹⁰⁶ Et en ceste maniere se doit porter le bon chrestien s’il veult bien et seurement mourir, |¹⁰⁷ disant ung saige : |¹⁰⁸ Belle mori est bene mori |¹⁰⁹ « Bien mourir est voulentiers mourir », |¹¹⁰ c’est a dire raysonnable voulenté, combien que ce soit impossible de voulenté naturelle, |¹¹¹ car, comme dit saint Ciprien : |¹¹² Carnem propriam nullus unquam odio habuit |¹¹³ « Nul ne eut jamais en haine sa char ».

|¹¹⁴ Comme doncques la mort soit a tous commune, tellement que par devoir et par droit faille tous mourir, quant et come et la ou il plaira a Nostre Seigneur, il nous doit tousjours trouver appareillez a son plaisir, |¹¹⁵ car sa voulenté est juste en chascun lieu, |¹¹⁶ disant Cassien en la Vie des sainctz Peres : |¹¹⁷ « Dieu est tres feal, car il dispense toutes [149v] choses, tant adversaires que prosperes, si comme lui semble qu’elles sont a nous plus prouffitables ». |¹¹⁸ Et si regarde et enseigne plus le prouffit de nous que nous meismes, |¹¹⁹ car il scet et voit ce qui nous est necessaire et nous maintesfois demandons nostre contraire. |¹²⁰ Si est donc que, comme nous ne puissons enfuir nullement ne eschever ne muer la mort temporelle, |¹²¹ nous nous devons disposer et tousjours tenir prestz a la recevoir |¹²² volentairement |¹²³ sans contradicion, |¹²⁴ car, aussi comme dit Senecque : |¹²⁵ « C’est bien sote sote chose doubter ce que l’en ne peut eschever ». |¹²⁶ Puis dit encore : |¹²⁷ « Se tu veulx fuir les choses aus quelles tu es estraint, il ne convient pas seullement que tu soies ailleurs que ou les choses sont que tu doubtes mais aussi fault que tu soies |¹²⁸ aultre que tu n’es ».

|¹²⁹ Affin donc que l’homme chrestien puisse bien et seurement mourir, |¹³⁰ il se doit parforcier et premierement [150r] apprendre et entendre la maniere de savoir bien mourir. |¹³¹ Si dit ung saige : |¹³² « Qui veult savoir la maniere de bien mourir, il doit tousjours avoir le cœur et le couraige ententif aux choses supernelles |¹³³ affin que, quant la mort adviendra, elle le treuve prest a le recevoir comme celuy qui actent l’avenement de son compaignon qu’il desire ». |¹³⁴ C’est la science en la quelle non seullement les religieux mais aussi tous bons chrestiens doivent principallement estudier. |¹³⁵ Et quant je di doivent, c’est pourtant que les religieux y sont tenus tant par rayson du vœu precedent de leur religion que par vigueur de la loy consequent de nature qui ordonne mourir. |¹³⁶ Et les seculiers y sont tenuz par auctorité de la mesme loy, la quelle est telle que elle ne veult nul excuser, tant soit grant ou riche ou fort ou saige que mourir ne le faille.

|¹³⁷ Le Philosophe dit, [150v] en son livres des Elenques, |¹³⁸ que « Rayson naturelle bien deliberee congnoist et juge plustost eslire la mort que la mauvaise vie ». |¹³⁹ Puis encores dit, ou quart livre de ses Ethiques, |¹⁴⁰ que « L’en doit plustost eslire mourir que nullement faire chose qui soit contre le bien de vertu ». |¹⁴¹ Et ceste election se doit trouver en chascun qui est juste.

|¹⁴² Toutesfois, qui vouldra bien considerer la difference de ceste miserable vie a la vie eternelle, il congnoistra et jugera que, quant plus tost en yssons, tant plus est nostre prouffit, |¹⁴³ car, aussi come en ce monde nous ne puissons demorer sans trebucher entre les vices bien souvent cent fois la journee, |¹⁴⁴ ceulx doncques qui moins y demeurent sont ceulx aussi qui le moins de charge de pechiéz enportent avec eulx quant ilz s’en vont. |¹⁴⁵ Et, pour ce, dit doncques le prophete ayant desplasance de plus y demourer : |¹⁴⁶ « Hé my ! car ma demoree [151r] est prolonguee.  |¹⁴⁷ Hé my ! que je suis encore eslongié du païs que tant desire. »

|¹⁴⁸ Et, pourtant, tout bon crestien se doit tousjours disposer en toutes manieres a bien vivre et a bien mourir aussi, |¹⁴⁹ tellement que, quant Dieu le vouldra appeler a soy, il soit prest de recevoir la mort avec desir.

|¹⁵⁰ Exemple de saint Pol, disant : |¹⁵¹ « Je desire estre resolu, c’est a dire morir pour estre et vivre avec Jhesucrist ». |¹⁵² Et ainsi les choses dessus dicte souffisent a present quant a la science de bien mourir, et cetera.

²⁵ Note : Aristote, Éthique à Nicomaque, III, 7.
³⁰ Note : Augustin, De civitate Dei contra paganos, VIII.
³³ Note : Bernard de Clairvaux, Meditationies devotissimae, III (De dignitate anima).
³⁶ Note : Psaumes, 34, 22
⁴⁰ Note : Jérémie, 2, 13
⁴³ Note : Augustin, De civitate Dei contra paganos, XIII, II
⁴⁶ Note : Psaumes, 115, 6
⁴⁹ Note : Paul, Épitre aux Romains, 4, 25
⁵² Leçon non conservée : mas a.
⁵⁵ Leçon non conservée : morte moriens et
⁵⁸ Note : Ézéchiel, 33, 14-16.
⁶⁴ Note : Apocalypse, 14, 13
⁶⁷ Note : Livre de la Sagesse, 4-5
⁷¹ Note : Platon, Phédon, IX
⁷⁴ Note : Augustin, De civitate Dei contra paganos, XIII, II
⁷⁶ Note : Psaumes, 142, 8
⁹¹ Note : Ecclésiaste, 7, 1
⁹⁹ Note : Matthieu, 6, 10
¹⁰² Note : Luc, 22, 42
¹⁰⁴ Note : Luc, 22, 42
¹⁰⁸ Note : Sénèque, Epistulae morales ad Lucilium, I,4
¹¹¹ Note : Il s’agit en réalité de Paul
¹¹² Note : Paul, Épitre aux Éphésiens, 5, 29
¹¹⁷ Note : Jean Cassien, Collationes patrum  in Scithico eremo commorantium, I, 6-11
¹²⁵ Note : Sénèque, Epistulae morales ad Lucilium, CIV
¹²⁷ Note : Sénèque, Epistulae morales ad Lucilium, CIV
¹³³ Note : Henri Suso, Horologium Sapientiae, II, II.
¹³⁸ Note : Aristote, Réfutations, I, V, 9 (exemple de syllogisme par réduction à l’absurde).
¹⁴⁰ Note : Aristote, Éthique à Nicomaque
¹⁴² Leçon non conservée : il répété
¹⁴⁶ Note : Psaumes, 120, 5.
¹⁴⁹ Leçon non conservée : a foy il