|²⁹⁰ Ensuit la .iii^e. temptacion.

|²⁹¹ Cy commence la tierce temptacion, qui se nomme impacience.

[159r] |²⁹² La tierce temptacion est impacience, qui est contre charité, |²⁹³ par la quelle nous sommez tenuz de [159v] aymer Dieu sur toute chose et nostre proesme comme nous mesmes, |²⁹⁴ car, ainsi, quant vient a l’article de la mort, les malades seuffrent moult grant douleur de cœur |²⁹⁵ et mesmement ceulx qui ne mourent pas de mort naturelle |²⁹⁶ mais par accidens si comme par fievres, pestilence ou autres excés |²⁹⁷ par les quelz les pluseurs morent a grant douleur et a plus de traveil que ne font ceulx qui meurent de mort naturelle, c’est a dire de vieillesse, si comme nous le veons chascun jour.

|²⁹⁸ Puis est ainsi que les maladies sont aucunneffois tres grieves d’elles mesmes et les aucuns malades si foebles de couraige |²⁹⁹ que, si tost que l’infirmité ou maladie les destruit ung pou griefment, |³⁰⁰ ilz se rendent si tres impaciens |³⁰¹ que bien souvent ilz en perdent le sens et la memoire et toute congnoissance de Dieu et dont bien souvent advient [160r] qu’ilz s’en perdent, dont c’est pitié.  ^|302 Sur quoy aussi dit saint Jerosme : |³⁰³ Si quis cum dolore egritudinem vel mortem patitur seu accipit, signum est quod sufficienter Deum non dilligit |³⁰⁴ « Se celuy qui est malade porte en douleur sa maladie et d’elle prent impacience et en elle reçoit la mort, c’est signe qu’il n’aime pas souffisamment Dieu ».

|³⁰⁵ Et, pour ce, est necessaire a tout homme qui desire bien mourir que, en quelque maladie que Dieu luy envoye, il ait pacience sans soy enyrer ne troubler par elle nullement, |³⁰⁶ car Dieu les nous donne aucunes fois a nostre probacion. |³⁰⁷ Et saint Pol dit : |³⁰⁸ Caritas paciens benigna est |³⁰⁹ « Charité paciente et souffrente en toute humilité est tres benigne et agreable a Dieu ». |³¹⁰ Disant saint Gregoire en ses Morales : |³¹¹ « Toutes les choses que nous souffrons sont justes ». |³¹² Et l’Apostre dit : |³¹³ « Toutes les passions que nous souffrons en ce monde ne sont nul[160v]ment dignes au regart de la gloire a venir ».

|³¹⁴ Et pour ce est il chose injuste de se tenner ne enyrer pour les passions et maladies que nous seuffrons, pourtant dont devon nous prendre pacience et par elle deduire noz infirmitéz, |³¹⁵ car, comme dit saint Luc : |³¹⁶ In paciencia vestra possidebitis animas vestras |³¹⁷ « En pacience vous possesserés voz ames ». |³¹⁸ Et, si comme en pacience se possede l’ame, ainsi par impassience et murmuration, elle se perd et dampne, |³¹⁹ tesmoing saint Gregoire en ses Omelies : |³²⁰ Regnum celorum nullus murmurans accepit |³²¹ « Nul qui se enire ne possessera ja le royaulme des cieulx », |³²² Quia opportuit Christum pati et sic intrare in gloriam suam |³²³ « Car il a falu que Nostre Seigneur Jhesucrist ait souffert et ainsi soit entré en sa gloire ».

|³²⁴ Nous veons que les pluseurs sont tant compassiens aux [161r] maulx d’aultruy que, par compasion, ilz se parforcent reconforter et consoler de fait et de parolles les malades en toutes manieres a eulx possibles, la quelle chose chose louable est.  |³²⁵ Moult par plus fort rayson nous devons parforcier avoir en noz infirmitéz pacience et les supporter constamment |³²⁶ si comment veult l’Appostre, disant : |³²⁷ « En mes infirmitéz, je me glorifiray aussi. »

|³²⁸ Considere que les maladies que nous seuffrons devant la mort nous sont comme ung purgatoire |³²⁹ quant on les supporte paciemment en louant Dieu. |³³⁰ Comme Albertus dit : |³³¹ « Nous n’avons pas seullement besoing de maladie es choses qui sont a nostre consolacion mais aussi en celles qui sont en nostre affliction » |³³² et saint Gregoire dit : |³³³ « C’est par divine dispensacion que, en grant vice, grant maladie soit adjoustee ». |³³⁴ Et pour ce doit le pacient dire avec saint [161v] Augustin :  |³³⁵ Domine, hic ure, hic seca, ut in eternum michi parcas |³³⁶ « Sire, quant tu vois que je seuffre et suis en angoisse, viens a moy et brule en moy et decouppe ainsi qu’il te plaira affin que tu me pardonnez eternellement ». |³³⁷ Misericorditer Deus adhibet temporalem severitatem ne eternam inferat ultionem. |³³⁸ Et saint Gregoire dit : |³³⁹ « Dieu use aucunesfois de rigueur contre nous en ce monde misericordieusement affin qu’en l’autre il nous actraye et ne prengne pas eternelle vengence de nous ».

|³⁴⁰ Nullez tribulacions doncques ne te doivent esmouvoir ne perturber, |³⁴¹ car ilz monstrent que Jhesucrist ne te veult relenquir ne habandonner, |³⁴² en ensuivant ce que escript saint Augustin et saint Gregoire : |³⁴³ Mala que nos hic pungunt ad Deum nos ire compellunt |³⁴⁴ « Les maulx que nous souffrons en ce monde nous pressent et contraignent [162r] d’aler a Dieu et avoir joye pardurable ».

|³⁴⁵ Et pour certain saichés que le salut de l’ame ne se fait point es plaisirs de la chair ne es voluntéz mondaines mais eternelle dampnacion. |³⁴⁶ Come dit saint Augustin : |³⁴⁷ Signum magnifeste dampnacionis est beneplacita assequi et a mundo diligi |³⁴⁸ « Signe tres evident et magnifeste de dampnacion est avoir ses desiers acomplis en ce monde ». |³⁴⁹ Et de rechief : |³⁵⁰ Mirum est omnibus in eternim dampnandis omnes lapides non surgunt in solacium |³⁵¹ sed magis mirum est quod omnibus in eternum salvandis omnes lapides non surgunt in periculum |³⁵² « Merveille est, dist il, que ceulx qui doivent estre dampnéz que les pierres et caillous ne se lievent a leur soulas, |³⁵³ mais plus grant merveille est que a ceulx qui sont et doivent estre saulvéz que les pierres ne s’eslievent a leur peril et encombrement ».

|³⁵⁴ Oste donc de toy impacience comme venimeuse pestilence |³⁵⁵ et coeuvre [162v] toy de l’escu tres fort de pacience par le quel tous les ennemis et adversaires de l’ame sont facillement surmontéz et vainquus |³⁵⁶ et regarde a Nostre benoist Saulveur et Redempteur Jhesucrist le tres pacient et aussi de tous les sains qui ont souffert et enduré jusques a la mort. |³⁵⁷ Et doit on principallement considerer qu’il n’est rien plus nuysant que impacience, |³⁵⁸ car elle divertit et separe la personne de l’amour de Dieu, |³⁵⁹ comme Nostre Seigneur mesmes le dit : |³⁶⁰ Super quem requiescet spiritus meus nisi super quietem et humilem corde ? |³⁶¹ « Mon esperit ne reposera ne ne sera fors sur l’umble et paisible de cœur ».

|³⁶² Saichéz oultre que pacience doit tres diligemment estre gardee et cherement tenue, car elle est tres necessaire, |³⁶³ comme dit saint Pol : |³⁶⁴ Paciencia est vobis necessaria. |365 Et saint Gregoire : |³⁶⁶ Nunquam servari concordia nisi per 163r] pacienciam valet |³⁶⁷ « Jamais ne peut estre maintenue ne gardee concorde fors par pacience ».

|³⁶⁸ Et, aprés, elle nous est tres utille et prouffitable, comme dit Nostre Seigneur : |³⁶⁹ In pasciencia vestra possidebitis animas vestras |³⁷⁰ « En vostre pacience possederés voz ames », |³⁷¹ c’est a dire, en portant paciemment et en souffrant les paines et tribulacions qui vous survendront en ce monde, vostre ame en aura joye pardurable. |³⁷² Et saint Gregoire dit : |³⁷³ « Pour ce donc, quant celle temptacion avient, nous nous devons armer de la vertu de pacience et de charité ».

|³⁷⁴ Car aussi impacience est contre charité et qui est sans charité il est sans salut, |³⁷⁵ car en vraye charité se treuve tousjours pacience qui supporte tousjours toutes choses propres et adverses d’un egal couraige. |³⁷⁶ Se nous avons hardement de nous exposer aucunesfois et commectre les maulx jus[163v]ques a mort pour complaire aux princes terriens en esperance d’acquerir leur grace qui est fresle et tantost passee, |³⁷⁷ pour quoy ne nous devons nous mieulx enhardir de supporter les maulx que Dieu nous donne pour acquerir vie sans fin ! |³⁷⁸ Et saint Gregoire dit : |³⁷⁹ Melioris meriti est adversa tollerare quam bonis opperibus insudare |³⁸⁰ « Tu ne saroies faire œuvre de plus grant merite que d’avoir pacience en tes adversitéz ».

^|381 Item, iceluy Gregorius : |³⁸² Sine ferro martires esse possumus |³⁸³ « Sans fer nous pouons estre martirs » |³⁸⁴ se vrayement gardons et soutenons pacience en nostre couraige. |³⁸⁵ Et Salmon dit : |³⁸⁶ Melior est paciens viro forti et qui dominatur animo suo expugnatore urbium |³⁸⁷ « C’est chose plus notable et meilleur a l’omme pacient |³⁸⁸ qui scet vaincre et dominer son couraige en ses adversitéz que n’est fort homme [164r] expugnateur et conquesteur de villes et citéz ». |³⁸⁹ Certes, comme dit saint Augustin : |³⁹⁰ « Il n’est riens difficille ne impossible a celuy qui bien ayme. »

290 Note : Une illustration sur une hauteur de 20 lignes. Le texte reprend sur les 4 dernières lignes.
303 Note : Passage prêté à Jérôme (parfois prêté à Jean) dans de nombreuses versions en latin et en langues vernaculaires, mais non identifié.
306 Leçon non conservée : probaticion
308 Note : Paul, Première Épitre aux Corinthiens, 13, 4.
311 Note : Grégoire I^er, Moralia in Job, XVIII.
313 Note : Paul, Épitre aux Romains, 8, 18.
316 Note : Luc, 21, 19
320 Note : Grégoire I^er, Homéliae in Evangelia, XIX
324 Leçon non conservée : chose se chose
327 Note : Paul, Deuxième Épitre aux Corinthiens, 12, 9
331 Note : Albert le Grand, Enchiridion de virtutibus veris et perfectis, XXV, 4
333 Note : Grégoire I^er, Homeliae in Evangelia, XIX
335 Note : Augustin, Enarrationes in Psalmos, XXXIII, sermo II, 20
337 Note : Augustin, Epistula ad Marcellum, V
343 Note : Grégoire I^er, Moralia, XXVI, XXIV
347 Note : Le renvoi à saint Augustin se fait ici à travers Pseudo-Eusebius Cremonensis, De morte Hieronymi ad Damasum, XXV
350 Note : Pseudo-Eusebius Cremonensis, De morte Hieronymi ad Damasum, XXV
352 Note : grant soulas merveille avec soulas exponctué
360 Note : Ésaïe, 66, 1-2
364 Note : Paul, Épitre aux Hébreux, 10, 36
366 Note : Grégoire I^er, Moralia in Job, XXI, XXI, 33
369 Note : Luc, 21, 1
373 Note : Référence non identifiée
379 Note : Grégoire I^er, Homeliae in Evangelia, II, XXXV, 7
382 Note : Grégoire I^er, Homeliae in Evangelia, II, XXXV, 7
386 Note : Proverbes, 16, 32
390 Note : Manuel de saint Augustin, XXIV