|²⁷² La quarte temptacion que fait le dyable a l’omme malade est de vaine gloire.

|²⁷³ Quartement tempte le dyable l’omme par la plaisance de soy meismes, qui est appellee orgueil espirituel, par le quel il traveille plus les devotes et religieuses personnes et meismes les plus parfais que de nul autre vice, |²⁷⁴ car, quant le dyable ne puet induire l’omme a devier de la foy et le mettre en desperation ou en impacience, |²⁷⁵ adont l’assault il par luy meismes complaire, qui est vaine gloire, |²⁷⁶ en lui gettant teles penssees en son cuer :

|²⁷⁷ « O homme, |²⁷⁸ comme tu es fermes et certain en la foy |²⁷⁹ et en vraie esperance |²⁸⁰ et comment tu es constant et pacient en ta maladie ! |²⁸¹ O que tu as fait en ta vie moult de bonnes euvres ! |²⁸² Certes, tu te doibs moult glorifier en toy |²⁸³ mesmes de ce que tu n’es pas ainsi ne tel comme ces autres hommes qui ont fait et perpetré infinis maulx [11v] |²⁸⁴ et toutesfois, par seul gemissement de repentance, ilz sont parvenus au royame des cieulx. |²⁸⁵ Ainsi doncques, de raison on ne le te puet denier, |²⁸⁶ car tu as virilement batailllié contre les vices. |²⁸⁷ Prens doncques la couronne de gloire qui t’est appareillie et le siege plus hault de tous les autres obtendras. » |²⁸⁸ Par teles et samblables vantances et eslievement de corage labeure instamment le dyable affin qu’il puist induire l’omme a estre orguilleux espirituelement, qui est vaine gloire. |²⁸⁹ Pour quoy il est a noter que ceste vaine gloire est moult a fouyr par dessus tous vices pour pluiseurs raisons. |²⁹⁰ Premierement, car par elle l’omme est fait samblable au dyable, |²⁹¹ car seulement par orgueil l’angele fut fait dyable. |²⁹² Secondement, car par elle l’ome commet et enchiet ou pechié de blasphemie par ce que le bien qu’il a receu de Dieu, il presume l’avoir de soy meismes. |²⁹³ Tiercement, car sa delectation porroit, en ceste vanité, estre si grande qu’il seroit eternelement dampnés. |²⁹⁴  A ce, monseigneur [12r] sainct Gregoire : |²⁹⁵  « Quant aucun, en remembrant les biens qu’il a fais, se eslieve en soy meismes, il chiet de la face et presence de l’aucteur de humilité. » |²⁹⁶ Et saint Augustin dit : |²⁹⁷  « Se l’omme se justifie et presume de sa justice, il dechiet de la gloire celestre. »

|²⁹⁸ Bonne inspiration de l’angele pour ratraire l’omme de vaine gloire.

|²⁹⁹ Contre la precedente temptation de vaine gloire donne l’angele au malade tele bonne inspiration et dist : |³⁰⁰ « O chaitif et miserable homme, pour quoy te enorguillis, toy attribuant constance en foy, esperance et pacience, la quele est seulement a attribuer a Dieu, |³⁰¹ attendu que de toy meismes n’as aucun pou de bien, |³⁰² disant nostre Seigneur : |³⁰³  ‘Sans moy ne poés faire aucune chose’ ? |³⁰⁴ Et ailleurs est escript : |³⁰⁵  ‘Ne te enorguillis |³⁰⁶ et ne te vantes |³⁰⁷ ne ne exauches desraisonnablement |³⁰⁸ et de toy ne vueilles presumer |³⁰⁹ de attribuer a toy aucune chose de bien.’ |³¹⁰ Car Nostre Seigneur a dit que : |³¹¹  ‘Cellui qui se exaucera sera hu[12v]milié.’ |³¹² Et en outre dist : |³¹³  ‘Vous, hommes, se vous n’estes aussi humbles comme ce petit enfant, vous n’enterrés ja ou regne des cieulx.’ |³¹⁴  – ‘Humilies toy doncques et tu seras exauchiés’, |³¹⁵  comme a dit Nostre Seigneur. |³¹⁶ Et sainct Augustin dit : |³¹⁷  ‘Se tu te humilies, Dieu descendera a toy |³¹⁸  et, se tu te exauches, Dieu se departira de toy.’ |³¹⁹ Oste doncques ta pensee d’orgueil, le quel fist de Lucifer, le trebel angele, le tres plus lait de tous les dyables |³²⁰ et du hault du ciel le jetta ou plus parfont d’enfer, et le quel orgueil fut cause de tous pechiés. |³²¹ Comme dit sainct Bernard : |³²²  ‘L’entree et commencement de tous vices et la cause de toute perdition est orgueil. |³²³ Oste, dist il, cestui vice et, de legier et sans aucun labeur, tu osteras tous autres vices.’ |³²⁴ Il est a noter singulierement que, toutes les fois que le malade se sent tempter d’orgueil et de vaine gloire, il doit premierement penser |³²⁵ que cestui pechié desplait tant a Dieu que, a l’occasion d’icellui seulement, le tres plus noble des creatures, Lucifer, avec tous ses complices et adherens, fut precipité et trebuchié [13r] ou parfont d’enfer, eternelement dampné. |³²⁶ Et ainsi, par tele consideration, l’omme s’abaissera et humiliera et recordera ses pechiés par contrition de cuer, |³²⁷ car il doit ignorer s’il est digne de la hayne ou amour de Dieu, |³²⁸ et si doit principalement prendre exemple a sainct Anthoine, au quel le dyable dist : |³²⁹  ‘O Anthoine, tu m’as vaincu, |³³⁰ car, quant je te vuelz exaulchier, tu te desprises |³³¹ et, quant je te vueil abaissier, tu te exauches.’ |³³² Secundement, il doit penser que humilité pleut tant a Dieu qu’elle fut la cause et occasion pourquoi la benoite Vierge Marie conceut le Filz de Dieu et fut exaulcie par dessus les chors des angeles. »

²⁷³ Variante de Q : orgueille espirituelle
²⁷⁴ Variante de Q : desesperation
²⁸¹ Variante de Q : toutefois
²⁸⁵ Variante de Q : t’ (aprés qui) manque
²⁹⁴ Variante de Q : de lhumilité
²⁹⁵ Note : Grégoire I^er, Homeliae in Evangelia, IV, 1
²⁹⁷ Note : Augustin, Enarrationes in Psalmos, XXI, II, 2
³⁰⁰ Variante de Q : a (aprés seulement) manque
³⁰¹ Variante de Q : bien fait disant
³⁰³ Note : Jonas, 15, 5
³⁰⁴ Variantes de Q : te (devant vantes) manque ; ne (entre ne et exauces) manque
³⁰⁵ Note : Isidore de Séville, Synonyma, II, 21
³¹¹ Note : Matthieu, 18, 3
³¹³ Note : Matthieu, 23, 12; Luc, 14, 11; Luc, 18, 14
³¹⁷ Note : Augustin, Enarrationes in Psalmos, XXXII, II, 23
³²² Note : Bernard de Clairvaux, Sermones in natali sancti Andreae, II, 7
³²⁵ Leçon non conservée : fut precipé et trebuchié répété au début du 13r – Variante de Q : fut precipé et
³²⁶ Variante de Q : Et aussi par
³²⁹ Note : Référence à Antoine partagée par la plupart des textes mais non identifiée.
³³² Leçon non conservée : veenge