|³³³ La quinte et derreniere temptation que fait le diable au malade : d’avarice.

|³³⁴ La cinquiesme temptation que fait l’ennemy a cellui qui labeure a la mort et especialement plus les seculiers et mondains et ceulx qui sont empeschiés es choses terriennes et exteriores |³³⁵ comme a leurs femmes, enfans et [13v] amis charnelz, les quelz ilz en leurs vies ont le plus amé, |³³⁶ et generalement a ceulx qui ont fort mis leur cuer en richesses temporeles. |³³⁷ Par les queles choses dessus dictes le dyable traveille moult l’omme et dit :

|³³⁸ « O meschant et maleureux home, tu maintenant delaisses toutes tes richesses temporelles, les queles par grande solicitude et labeurs tu as asembleez, |³³⁹ aussi delaisses ta femme, tes enfans, tes chiers et prochains amis et toutes choses desirables en cestui monde, especialement tes riches joyaux, robes et beaux chevaulx, |³⁴⁰ es quelz moult te delittoyes et qui te seroient en grant solas se plus longuement vivre pouoies. |³⁴¹ O quel et com grant dommage aront tes beaux enfans en ta mort ! |³⁴² Ta femme, qui tant estoit de toy amee et chierie, que devendra elle ?  |³⁴³ Certes, ta mort sera occasion de moult d’angoisses. » |³⁴⁴ Teles et samblables temptations met le dyable au devant du malade |³⁴⁵ affin que, par l’amour et convoitise des choses terriennes et mondaines, il le destourne de l’amour de Dieu, son Redempteur, et du salut et salvation de son ame. [14r] |³⁴⁶ Pourquoy est singulierement a noter que au pacient en son extremité ne lui soient ramenés a memore sa femme, ses enfans, ses amis corporelz, ses richesses et autres choses temporeles |³⁴⁷ fors en tant que la santé espirituele du malade le requiert, comme de ordonner son testament affin de eviter debas et procés entre amis aprés sa mort, |³⁴⁸ car autrement ce lui seroit un trop grant peril. |³⁴⁹ Toutes fois, on doit lors, de toutes forces et vertus, entendre et ammonnester le malade en son extremité des choses appertenans au salut de son ame en le revocant et eslonguant des choses temporeles et charneles, |³⁵⁰ car moult perilleuse chose est d’en estre lors occupé d’y penser.

|³⁵¹ Une bonne inspiration que donne l’angele a l’encontre d’avarice des choses temporeles.

|³⁵² Contre la quinte et derreniere temptation que a fait l’ennemi au malade donne l’angele la bonne inspiration qui ensieut et dist : |³⁵³ « O homme, destourne et estouppe tes oreilles contre ces mortiferes suggestions du dyable, par les [14v] queles il s’esforce toy intoxiquier et envenimer. |³⁵⁴ Je te prie que vueilles mettre arriere et en oubli, totalement oster de ta memoire les richesses terriennes et choses mondaines, |³⁵⁵ car elles ne te peuent en riens aidier a ton salut, mais par contraire te peuent conferer et porter grant empeschement. |³⁵⁶ Ayes remembrance des parolles de Nostre Seigneur parlant a ceulx qui leurs corages mettent et se adherdent a teles vanitéz : |³⁵⁷ ‘Se l’omme n’aura renuncié a toutes les choes qu’il possede, il ne puet estre mon disciple.’ |³⁵⁸ Et aincoires Nostre Seigneur : |³⁵⁹  ‘Se aucun vient a moy et n’a en hayne son pere, sa mere, sa femme, ses filz, ses freres, ses sereurs et meismes son ame, |³⁶⁰ aincoires ne puet il estre mon disciple.’ |³⁶¹ En oultre, a ceulx qui ont renuncié aux choses dessus dictes dit Jhesucrist : |³⁶²  ‘Et cellui qui relenquira sa maison ou ses freres, ses sereurs ou son pere, sa mere ou sa femme, ses enfans ou ses richeses pour mon nom, il en recevera cent doubles et possedera la vie eternele.’ |³⁶³ Ramaine a ta memoire les povretéz et angoisses que Jhesucrist souffri en la crox pour te rachater [15r] des paines d’enfer |³⁶⁴ en delaissant volentairement sa tres amee mere et ses tres chiers disciples pour ton salut. |³⁶⁵ Considere aussi que tant de sains hommes l’ont ensiuvi par martire en contempnant les vanités temporeles affin de oÿr ou Jugement derrenier ceste benigne sentence : |³⁶⁶ ‘Venés, les benois de mon Pere, |³⁶⁷ possessés le royame qui vous est appareillié dés le commencement du monde.’ |³⁶⁸ Imprime doncques ces choses en ta pensee et tu reputeras et debouteras de toy comme venin les voluptés transsitores de ce monde. |³⁶⁹ Convertis ton cuer entierement a povreté volontaire |³⁷⁰ et, en ce faisant, t’est deu le regne du ciel comme chose promise |³⁷¹ par la bouce de Nostre Seigneur, disant : |³⁷²  ‘Benois soient les povres d’esperit, |³⁷³ car a eulx appartient le royame des cieulx.’ |³⁷⁴ Commés toy doncques et te voe du tout a un tel Seigneur |³⁷⁵ qui te confere et donne richesses si plaines et si delectables qu’elles ne sont a estimer. |³⁷⁶ Fonde totalement ta pensee en lui sans varier.

|³⁷⁷ Notes que, quant le malade se sent tempter d’avarice ou des choses terriennes, |³⁷⁸ il doit premierement considerer que teles voluptés et amour [15v] desordonnee separe l’ame de la compaignie de Dieu et des sains, |³⁷⁹ comme tesmoingne monseigneur sainct Gregoire, qui dit : |³⁸⁰  « Tant comme aucun se desjoinct et separe de la supernele amour, tant plus s’abaisse ici en choses vaines et transitoires, es queles il se delitte ». |³⁸¹ Secondement, il doit considerer que volontaire povreté beatifie l’omme et le maine ou ciel |³⁸² comme Nostre Seigneur mesmes le dit.

³³⁷ Leçon non conservée : traveilee
³⁵³ Leçon non conservée : o. coutre tes m. ― Variante de Q : subgections
³⁵⁴ Variantes de Q : vueilliez ; Ayez ; se aderent a
³⁵⁷ Note : Luc, 14, 26
³⁵⁸ Variantes de Q : n’ (aprés et) manque ; sa femme manque
³⁵⁹ Note : Luc, 14, 33
³⁶² Note : Matthieu, 29, 29
³⁶⁶ Note : Matthieu, 25, 34
³⁷² Note : Matthieu, 5, 3
³⁷⁷ Leçon non conservée : compaignii – Variante de Q : Notez
³⁷⁹ Leçon non conservée : et se pare de
³⁸⁰ Note : Grégoire I^er, Homeliae in Evangelia, XXX
³⁸¹ Note : Matthieu, 5, 3