|⁴²⁰ S’ensieut l’orrible miroir que descript sainct Jheromme touchant la mort.

|⁴²¹  « Mes tres chiers freres, dist monseigneur sainct Jheromme, sachiéz que l’ame istera du corps non pas de son gré mais en grant crainte, |⁴²² car, ainsi comme Adam combati contre Lucifer et fut vaincu, ainsi conbatera l’ame contre le corps et contre la mort et sera aussi vaincue. |⁴²³ Et comme Adam, puis qu’il fut [17v] vaincu, fut bouté hors de paradis, pareillement, quant l’ame est vaincue de la mort, elle est expulsee et chassie hors du corps.

|⁴²⁴ Et, quant l’orrible mort lie le corps et a victore de lui, lors dist elle par trois fois « O ! O ! O ! », |⁴²⁵ comme s’elle voloit dire : |⁴²⁶ « O ! com orguilleux tu as esté jusques a ceste heure ! |⁴²⁷ O ! com delicieusement as vescu en boire et mengier ! |⁴²⁸ O ! comme tu as esté precieusement et pompeusement vestu !  |⁴²⁹ Comme fort ! |⁴³⁰ Combien legier !  |⁴³¹ Je te prie, dy moy pour quoy ne te enorguillis tu maintenant ? |⁴³² Ou est ton esperance ? |⁴³³ Pourquoy ne ez tu richement vestus ? |⁴³⁴ Pourquoy ne te remues tu ? |⁴³⁵ Ou sont maintenant tes forces ? |⁴³⁶ Pourquoy n’as tu cure de tes opulentes richesses, de ton argent, de ton or, de tes vestemens precieux, de ta beauté, de ta femme, de tes filz et filles, de tes cousins et amis ? |⁴³⁷ Et ou est ta puissance ? |⁴³⁸ Pourquoy ne combas contre moy fortement ?  |⁴³⁹ Bien voy que maintenant t’ay vaincu. |⁴⁴⁰ Et ne t’ay je lyé mains et piedz ? |⁴⁴¹ Pourquoy ne recognois tu tes amis ?  |⁴⁴² Pourquoy ne parles tu a moy ? |⁴⁴³ Tes dentes, pourquoy sont ilz desnuéz ?  |⁴⁴⁴ Pourquoy sont tes yeulx clos ? [18r] |⁴⁴⁵ Tes narines, pour quoy sont elles si angoisseuses ? |⁴⁴⁶ Pourquoy se appallist ainsi ta face et ton corps se amaigrist ? » |⁴⁴⁷ Lors dist la mort : |⁴⁴⁸  « O ame, is hastivement, car en ce corps ne demourras plus longuement. » |⁴⁴⁹ A celle horrible voix s’esmouvera l’ame et vendra aux levres et dira : |⁴⁵⁰  « Par vous me convient issir. » |⁴⁵¹ Responderont les levres : |⁴⁵²  « Par nous n’entras ou corps ne par nous n’en ysteras. » |⁴⁵³ Lors se part d’illec et va aux narines.  |⁴⁵⁴ Les queles lui respondent comme les levres. |⁴⁵⁵ Aprés s’en tourne aux yeulx et puis aux oreilles, |⁴⁵⁶ mais par elles ne puet avoir passage. |⁴⁵⁷ En fin va a la sommité du chief et par illec se part du corps, |⁴⁵⁸ car par illec y entra et d’illec doit issir. |⁴⁵⁹ Adont se tient en celle sommité et regarde ça et la, ou elle voit moult de miseres, s’elle n’est du nombre des sauvéz. » |⁴⁶⁰ Et, s’elle est dampnee, lors dist elle a soy mesmes : |⁴⁶¹  « O maudite excommuniee adultere et parjure que tu es ! » |⁴⁶² Lors jette son regard sur l’aube, qu’elle receut es sains fons de batesme blanche et sans aucune tache, plus noire que le corbault ramage. |⁴⁶³ Si dist en suspirant miserablement et horriblement, criant avec pleur inen[18v]narrable : |⁴⁶⁴ « Las, las, las ! Qui est cellui qui a mué et changié mes vestemens et comment ? |⁴⁶⁵ N’estoient elles plus blanches de la nesge ? |⁴⁶⁶ Et elles sont maintenant plus noires que poye. » |⁴⁶⁷ Lors vient le dyable qui la povre ame a seduitte et le conseil du quel elle a suivy en ce monde et dist : |⁴⁶⁸ « O amie, ne te vueilles merveillier. |⁴⁶⁹ Je suis cellui qui t’ay preparé cestui vestement, mais tu n’es pas seule de ceste parure, car la pluspart du monde en est contaminee. » |⁴⁷⁰ Lors dist l’ame : |⁴⁷¹  « Et qui ez tu ? ». |⁴⁷² Dist le dyable : |⁴⁷³  « Et ne t’ay je dit que je suis cellui qui  t’ay preparé ces vestemens ? |⁴⁷⁴ Et t’ay monstré ma vie et tu m’as jusques a cy suivy et bien obeÿ, creut et labouré. |⁴⁷⁵ Pourquoy je t’ay appareillie ta place en mon regne ou quel sera pleur sans risee, strideur de dens sans cesser, tristresse sans leesse, faim sans mengier, soif sans boire, |⁴⁷⁶ tenebres sans lumiere, pueur sans odeur, doleur sans solas, plaintes sans remede, cris sans silence, murmure sans reverence, |⁴⁷⁷ ullemens sans maniere, feu inextinguible sans refroidement, vens impetueux sans transquilité, froidure sans maniere, chaleur sans termination, |⁴⁷⁸ povreté [19r] ou pluiseurs quierent morir mais morir ne peuent, et ou tous noz princes et seigneurs sont vestus de telz vestemens comme toy, c’est assavoir Belsebuch, Behemoth et Fagiel. |⁴⁷⁹ O ame, lieve toy et viens avec moy. |⁴⁸⁰ Veci mes compaignons qui viennent contre toy chantans chansons de doleur et de tristresse et moult amers. » |⁴⁸¹ Lors survient le bon angele de Dieu qui estoit commis a sa garde par la permission divine et dit : |⁴⁸² « Benoit soit cellui qui en ce monde a evité et fouy ce maudit vestement que tu portes. |⁴⁸³ O, comme tu ez maleureuse ! |⁴⁸⁴ O amie du dyable ! O maudite creature ! O malediction de Dieu omnipotent ! |⁴⁸⁵ Avec toy ay esté et si ne m’as pas veu. |⁴⁸⁶ Je t’ay apris et enseignié et tu ne m’as pas entendu. |⁴⁸⁷ Va maintenant es mains du dyable et voy le lieu infernal qui t’est preparé. |⁴⁸⁸ Dés maintenant, tes euvres t’ont jugié. |⁴⁸⁹ Veci le jour de fureur, de calamité et de misere et de moult grant amertume. » |⁴⁹⁰ Adont, la miserable ame, combien que envis, le convient entrer en tenebres et ça et la circuir les lieux infernaulx par sept jours continuelz. |⁴⁹¹ Ou .viii^e. jour retourne l’ame au corps ou [19v] quel elle veult de rentrer. |⁴⁹² Et, quant elle voit qu’elle n’i puet, adont le maudit et opprobrie, disant : |⁴⁹³ « O temple du dyable, tes euvres m’ont souillie. |⁴⁹⁴ O maudite terre ! |⁴⁹⁵ O habitation du dyable, lieuve toy maintenant hastivement |⁴⁹⁶ et viens avec moy affin que tu voies le lieu de mes tourmens qui par ta coulpe me sont appareilliés, es quelz je serai jusques au jour du grand Jugement. |⁴⁹⁷ Et aprés seras avec moy en celle mesme dampnation eternelement. |⁴⁹⁸ O miserable corps, dist l’ame, maudis soient tes yeulx, qui onques ne vouldrent veoir la lumiere de verité et la voie de la clarté de Dieu. |⁴⁹⁹ Maudites soient tes oreilles et ta langue, car oncques ne gousterent les joyes du Pere eternel ne oncques n’ouvrirent les huys de la bouche ne de l’oÿe a la loenge de leur Createur. |⁵⁰⁰ Maudites soient tes mains, car par elles n’as donné ausmones aux povres. |⁵⁰¹ Maudites soient les pensees de ton corage, car elles me incitoient a mauvais conseil. |⁵⁰² Maudis soient aussi tes piedz, car ilz n’ont volu aller a visiter les sainctes maisons de Dieu. |⁵⁰³ Maudis soient tous [20r] membres, car par eulx ay perdues les joyes des cieulx. |⁵⁰⁴ Et maudictes soient aussi toutes tes euvres, car elles m’ont acquis les tourmens pardurables, des quelz nous vueille delivrer Nostre benoit Sauveur par sa digne misericorde. |⁵⁰⁵Amen. »

⁴²³ Variante de Q : vaincu et boutez
⁴³⁶ Variantes de Q : filz de tes filles, cousisn et a.
⁴⁵³ Variante de Q : et s’en va
⁴⁵⁷ Variante de Q : entra et par illec en doit
⁴⁵⁹ Variante de Q : en icelle
⁴⁶⁸ Variante de Q : O anme ne
⁴⁷⁰ Variantes de Q : Et (aprés dyable) manque ; je pas dit ; t’a preparé
⁴⁷⁸ Variante de Q : de telz vestemenz manque
⁴⁷⁹ Variante de Q : ameres
⁴⁹⁰ Variante de Q : ame manque
⁴⁹¹ Leçon non conservée : O viii. ― Variante de Q : corps auquel
⁴⁹⁶ Leçon non conservée : aternelement
⁵⁰² Variante de Q : a (aprés aller) manque