|³⁷¹ Ensuit la seconde tentacion.

[biii va]

|³⁷² La seconde tentacion de quoy le dyable tente l’homme en l’article de la mort.

[biii vb] |³⁷³La seconde tentacion, selon nostre present acteur, de quoy le dyable tentera et es[biiii ra]sayera a decepvoir le malade en l’article de la mort est de desperacion |³⁷⁴ contre la grant esperance et confidence que tout crestien doit avoir en la misericorde de Dieu. |³⁷⁵ Et ce fait ceste tentacion en deux manieres : |³⁷⁶ premier par ostension des pechéz commis par le pacient, |³⁷⁷ secondement par parolles persuasives induisantes a desperacion.

|³⁷⁸ Premier doncques, le dyable, voyant le povre crestien crucié, tourmenté, batu, flagellé et affligé des douleurs de la mort, |³⁷⁹ voulant adjouter douleur avecques douleur et invoquer abisme avecques abisme, |³⁸⁰ prent ung grant livre en sa main ou sont escripts tous les maulx que la povre creature a commis au monde et specialement ceulx dont confession n’a point esté faicte, |³⁸¹ qui sont tant desplaisans au crestien de bonne foy que aucune chose plus ne peut estre, et luy dit : |³⁸² « Toy, meschant, qui as foy en Dieu, le quel t’a faict tant de biens et tu l’as offensé si grandement, |³⁸³ comment crois tu que il ayt misericorde de toy |³⁸⁴ quant mesmes les pechéz que tu as commis envers lui as delaisséz a confesser et ne les as pas voulus recongnoistre ? |³⁸⁵ Les voycy, je les ay tous mis en [biiii rb] escript et n’espere jamais que tu soyes a aultre que a moy ou autrement Dieu ne seroit pas vray juge. |³⁸⁶ Tu as esté a luy par grace, mais tu es a moy par pechié. |³⁸⁷ Tu deveroyes naturellement estre a luy, |³⁸⁸ mais par ta miserable voulenté tu as perdu ton droit heritage et es a moy comme prisonnier perpetuel acquis de bonne guerre. |³⁸⁹ Dieu te avoit achaté par le merite de sa passion et je te ay emblé et furtivement acquis par ma tentacion. |³⁹⁰ Tu estoyes filz de Dieu par obedience si tu eusses gardé ses commandemens, |³⁹¹ mais tu es filz du dyable par consentement en tant que tu les as transgresséz. |³⁹² Tu as laissé l’abit de immortalité que Dieu par grace te avoit donné |³⁹³ et as prins l’abit de damnacion et de toute peine par les grans pechéz enormes dont tu t’es vestu et envelopé |³⁹⁴ ainsi que il apert en ce present livre ou tous tes pechéz et specialement ceulx dont tu ne feïs jamais aucune penitance sont escriptz et a memoire redigéz. |³⁹⁵ Par quoy tu peulx bien dire ainsy comme dit Caÿn qui tua son frere Abel : |³⁹⁶Major est mea iniquitas quam ut veniam merear [biiii va] |³⁹⁷  ‘Plus grande est mon iniquité que toute la grace que je sçauroye desservir ne meriter envers Dieu.’ » |³⁹⁸ Aprés ce monstre et dit le dyable au malade prest de mourir : |³⁹⁹ « Voycy comme tu as offensé Dieu. |⁴⁰⁰ Premier, en tant que sur toutes choses tu ne le as pas aymé. |⁴⁰¹ Tu l’as juré et parjuré en vain et autrement. |⁴⁰² Tu n’as point gardé ne solemnisé ses festes. |⁴⁰³ Tu n’as point honnoré pere et mere mais courrousséz. |⁴⁰⁴ Tu as esté meurdrier au moins de voulenté si tu ne l’as esté de faict, |⁴⁰⁵ car tu as, par avarice ou fureur de vengance, souventes fois desiré la mort de autruy et voulentiers l’eusses pourchassee n’eust esté la crainte du monde plus que de Dieu. |⁴⁰⁶ Tu as acquis les biens d’autrui par furt, par force, par cautelle, par decepcion et en mille autres manieres, dont jamais ne feis restitucion. |⁴⁰⁷ Tu as rompu le mariage de ton voisin, villé sa fille, porté faulx tesmoignage sur lui et fait cent mille autres desraisons et pechéz contre les commandemens de Dieu, |⁴⁰⁸ sans les quelz garder aucun ne peult estre saulvé, |⁴⁰⁹ ainsi que met Nostre Seigneur, qui luy mesme dit : |⁴¹⁰Si vis ad vitam ingredi, serva mandata Dei |⁴¹¹  ‘Si tu veulx [biiii vb] entrer ou lieu de vie perpetuelle, garde et observe les commandemens de Dieu.’ |⁴¹² Les quelz, dit le dyable au malade, tu n’as point gardéz, mais as vescu orguilleusement, avaricieusement, parresseusement, envieusement, despiteusement, gloutonnement et luxurieusement, |⁴¹³ qui sont les sept pechiéz mortelz dont tu es plain et jamais n’en feis confession, ainsi qu’il appert. |⁴¹⁴ Par quoy vaine et folle chose est a toy de esperer que Dieu soit si misericordieux de te pardonner, veu ce que souvent tu as ouy preschier que, pour mourir en ung seul pechié mortel, on est damné. |⁴¹⁵ Oultre plus, tu ne as acomply aucune des sept euvres de misericorde, des quelles principalement Dieu tiendra son Jugement |⁴¹⁶ et ce de quoy il louera ou blasmera ceulx et celles qui assisteront devant luy, |⁴¹⁷ ainsy qu’il met aux livres fais de la sentence de son Jugement, ou il dit que, a ceulx qui au jour du Jugement seront a sa senestre, c’est assavoir aux mauvais, il dira par reproche : |⁴¹⁸Ite in ignem eternum, nam esurivi et non dedisti michi manducare, sitivi et non dedisti michi bibere, et cetera. |⁴¹⁹ Dira Dieu aux mauvais au jour du Juge[bv ra]ment : |⁴²⁰  ‘Allez, mauvais, hors de ma compagnie. |⁴²¹ Je vous condamne perpetuellement a mourir en ung feu eternel pourtant que vous, estans au monde, m’avez desprisé : |⁴²² j’ay eu fain, vous ne m’avéz donné que mangier ; |⁴²³ j’ay eu soif et vous ne m’avéz donné que boire.’ » |⁴²⁴ Et, pour tant, dira le dyable au mallade : |⁴²⁵  « Tu, qui es icy encor vivant et jamais ne acomplis ne peulx acomplir les euvres de charité, peulx bien dire et jugier que tu es frustré de la misericorde de Dieu |⁴²⁶ et est a toy grant follie d’y esperer, veu que sans misericorde tu as vescu et que sainct Jaques dit : |⁴²⁷Judicium sine misericordia fiet illi qui sine misericordia fuit super terram |⁴²⁸  ‘Jugement sans misericorde sera fait a cellui qui sans misericorde a esté sur la terre.’ |⁴²⁹ Oultre plus, tu vois plusieurs qui de nuyt et de jour sont labourans en la loy de Dieu |⁴³⁰ et Toutes fois, en aucune maniere que ce soit, ilz n’osent presumer de la misericorde de Dieu, |⁴³¹ pourtant que aucun ne sçait s’il est digne de haine ou d’amour. |⁴³² Et pourtant esse grant fatuité a ung pecheur qui tant de maulx a commis de esperer grace en la misericorde de Dieu, laquelle ne peult avoir. » |⁴³³ Par [bv rb] telles admonicions et semblables induit le dyable le pacient a desesperance, la quelle sur tous maulx est a eviter, |⁴³⁴ comme ainsi soit qu’elle offense la misericorde de Dieu, par la quelle seulement nous pouons estre sauvéz, |⁴³⁵ tesmoing le prophete qui dit : |⁴³⁶Misericordie Domini quia non consumpti sumus |⁴³⁷  « C’est, dit le prophete, de la grant misericorde de Nostre Seigneur que nous ne sommes tous consuméz, perdus et adnichilléz, veu les grans maulx dont nous sommes plains. » |⁴³⁸ Oultre dit monseigneur saint Augustin, enseignant fouyr desperance : |⁴³⁹Unusquisque positus in peccato, si de venia vera desperaverit, misericordiam funditus perdit |⁴⁴⁰ « Toute personne, qui est en pechié, s’il despere que Dieu ne luy puysse ou vueille faire grace pourveu qu’il retourne devotement et par contricion de cueur envers luy, il pert totalement sa misericorde », |⁴⁴¹ car il n’est riens qui tant offense Dieu que desperacion.

|⁴⁴² La seconde inspiracion que l’ange donne au malade contre desesperance.

bv va] |⁴⁴³ Contre la secunde tentacion que le dyable donne au mallade ou lit de la mort [bv vb] pour le vouloir induire et mener a desesperance donne icy l’ange ung bon reconfort et une bonne et salutaire inspiracion, disant : |⁴⁴⁴ « O [bvi ra] homme, pour quoy as tu diffidence de la misericorde de Dieu, |⁴⁴⁵ doubtant qu’il ne te vueille ou puisse faire grace si de cueur devot et contrict tu luy demandes, |⁴⁴⁶ posé le cas que tu aies ou eusses commis autant de larrecins et de meurdres qu’il y a de goutes d’eaue en la mer ou de gravelle, |⁴⁴⁷ mesmes si tu seul avoyes commis et perpetré tous les maulx et pechéz, quelz qu’ilz soyent, qui ont esté, sont et seront fais jamais en tout le monde contre la bonté de Dieu, |⁴⁴⁸ posé le cas que aussi jamais tu ne les eusses confesséz ne d’iceulx fait aucune penitance ne que mesmes pour le present tu n’eusses pas puissance de les confesser ne de en faire penitance, |⁴⁴⁹ car, en tel cas, suffist une seule contricion de cueur. |⁴⁵⁰ Tesmoing le Psalmiste, qui dit : |⁴⁵¹ Cor contritum et humiliatum, Deus, non despicies |⁴⁵²  ‘O Dieu, dist le Psalmiste, je congnois ta bonté si grande avecques ce que, tu l’as dit, que jamais tu ne despriseras le cueur qui par contricion et humilité retournera envers toy.’ |⁴⁵³ Ainsi que le prophete Ezechiel, parlant en la personne de Dieu, l’a dit : |⁴⁵⁴ Quacunque hora peccator ingemuerit, salvus erit |⁴⁵⁵  ‘En quelcunque heure que ce [bvi rb] soit que le pecheur aura contricion et desplaisance de son pechié, il sera saulvé.’ |⁴⁵⁶ Saint Bernard aussi dit : |⁴⁵⁷ Major est Dei pietas quam quevis iniquitas |⁴⁵⁸  ‘Plus grande est la pitié et misericorde de Dieu que quelcunque iniquité que l’homme puisse au monde commettre.’ |⁴⁵⁹ Saint Augustin pareillement dit : |⁴⁶⁰  ‘Plus, dit saint Augustin, peult Dieu pardonner que homme ne sçauroit pechier.’ » |⁴⁶¹ Par quoy, dit l’ange au mallade : |⁴⁶²  « Mon amy, quelque mal que tu ayes commis, tu n’as cause de te desesperer. »

|⁴⁶³ In casu etiam quo, et cetera.

|⁴⁶⁴ Icy corrobore l’ange son admonicion pour garder le pacient de desesperance et lui dit : |⁴⁶⁵ « Mon amy, ne te desespere point, |⁴⁶⁶ car, mesmes ou cas que tu congnoistroyes que tu fusses du nombre des damnéz, si ne debveroyes tu desesperer de la misericorde de Dieu, |⁴⁶⁷ non pas qu’il te saulvast totalement – pour tant qu’en enfer n’a nulle redemption – mais affin qu’il ne te donnast pas si cruel tourment, |⁴⁶⁸ car, quant Dieu voit la desesperance d’aucun damé, il s’en courrousse plus fort |⁴⁶⁹ et, par tant, lui augmente infiniment ses tourmens. |⁴⁷⁰ Oultre, Nostre Sauveur et Redem[bvi va]pteur Jesucrist n’est point venu au monde souffrir mort et passion en une croix pour les justes rachater mais les pecheurs, |⁴⁷¹ ainsi que lui mesmes le tesmoigne : |⁴⁷² Non veni vocare justos sed peccatores. |⁴⁷³ Dit Dieu : |⁴⁷⁴  « Je ne suis point venu appeler les justes mais les pecheurs. »

|⁴⁷⁵ Textus.

|⁴⁷⁶ Exemplum habeas in Petro, et cetera.

|⁴⁷⁷ Icy prouve l’ange au malade par exemple qu’il ne se doyve point desesperer, disant : |⁴⁷⁸ « Mon amy, ne te desespere point pour quelcunque peché que tu ayes fait. |⁴⁷⁹ Pren l’exemple de saint Pierre, qui trois fois Dieu regnia, |⁴⁸⁰ de sainct Pol, qui tant les crestiens persecuta, de sainct Mathieu et de Sachee, qui furent publiques usuriers, |⁴⁸¹ de Marie Magdaleine, qui plaine fut de tous pechéz, de la femme qui fut comprinse et trouvee en adultere, |⁴⁸² de Marie Egipciaque, qui fut commune pecheresse, du larron pendant en la croix a l’heure de la Passion. |⁴⁸³ Tous ceulx cy pecherent grandement. |⁴⁸⁴ Toutes fois ne se desespererent ilz point. |⁴⁸⁵ Et aussi Dieu leur pardonna. »

|⁴⁸⁶ Nota quam, cito, et cetera.

|⁴⁸⁷ Icy enseigne l’acteur ce que le pacient doit faire quant il se sent tenté de desesperance, disant : |⁴⁸⁸ « Tout aussi tost [bvi vb] que le pacient se sent tenté de desespoir, il doit penser en luy mesmes, jouxte les amonicions de l’ange, |⁴⁸⁹ que desesperance est pire et plus damnable que tous les pechiéz et que, pour quelcunque pechié que l’homme ayt commis, tant vil et enorme soit, il ne doit entrer en desesperance, |⁴⁹⁰ car, ainsi que dit monseigneur saint Augustin : |⁴⁹¹ Plus peccavit Judas desperando quam Judei cricifigendo Christum |⁴⁹²  « Plus pecha Judas en se desesperant que les Juifz ne firent en crucifiant Jesucrist. » |⁴⁹³ Secondement, le pacient en ce cas doit penser combien utile et necessaire est esperance |⁴⁹⁴ selon Crisostome, qui la diffinit et dit : |⁴⁹⁵ Spes est salutis nostre anchora, vite nostre fundamentum, dux itineris quo itur ad celum |⁴⁹⁶ « Esperance, dit Crisostome, est l’anchre de nostre salut, le fundement de nostre vie, la conduitte et adresse du chemin par le quel on va au ciel. » |⁴⁹⁷ Et, pourtant, esperance pour quelcunque peché ne doit estre laissee.

³⁷¹ Variante de W : S’ensuit
³⁷² Note : Une illustration pleine page, seules les trois dernières lignes sont occupées par le texte sur deux colonnes.
³⁷³ Variante de W : malade a l’ –
³⁷⁴ Variante de W : tout bon c.
³⁷⁵ Variante de W : desesperation
³⁷⁸ Leçon non conservée : le dyadle voyant
³⁸⁰ Variante de W : commis en ce present monde
³⁹² Variante de W : l’a. de domination et de
³⁹⁶ Note : Bernard de Clairvaux, Sermones in Cantica canticorum, XI
⁴⁰⁵ Variante de W : autruy et l’eusses voulentiers p. se n’
⁴⁰⁷ Leçon non conservée : autre – Variante de W : voisin violles sa
⁴¹⁰ Note : Matthieu, 19, 17
⁴¹² Variante de W : avacieusement
⁴¹⁴ Variante de W : ce (aprés veu) mq.
⁴¹⁷ Variante de W : a (entre que et ceulx) mq.
⁴¹⁸ Note : Matthieu, 25, 31-42
⁴²⁷ Note : Jacques, 2, 13
⁴³⁶ Variante de W : c’est ce dit ; grant mq. – Note : Lamentations, 3, 22
⁴³⁸ Variante de W : desesperance
⁴³⁹ Note : Grégoire I^er, Homeliarum in Ezechielem prophetam, II, VII, 13.
⁴⁴⁰ Variante de W : desespere
⁴⁴¹ Variante de W : desesperation
⁴⁴³ Note : Une illustration pleine page, seules les quatre dernières lignes sont occupées par le texte sur deux colonnes.
⁴⁵¹ Note : Psaumes, 34, 20
⁴⁵⁴ Note : Ézéchiel, 33, 14-16
⁴⁵⁷ Note : Bernard de Clairvaux, Sermones in Cantica canticorum, XI
⁴⁶⁰ Note : Augustin, Tractatus in Iohannis evangelium, 47
⁴⁷² Note : Luc, 5, 32
⁴⁷⁹ Variante de W : tant des crestiens
⁴⁸² Variante de W : M. egiptienne qui
⁴⁸⁸ Variante de W : penser a luy ; jouxte l’amonition
⁴⁹⁰ Variante de W : desesperando
⁴⁹¹ Note : Augustin, Sermones, CCCLII, III, 8 (De utilitate agendae poenitentiae)
⁴⁹⁵ Note : Jean Chrysostome, Libello de compunctione (généralement cité d'après Gerson)
⁴⁹⁶ Variante de W : va ou ciel