|¹⁸³ Temptation du dyable d’avarice.

[bi v] |¹⁸⁴ La tierce temptation de l’ennemy est avarice, que, plus infestant et travaillant les seculiers et charnelz, est trop grant occupation de choses foraines et temporelles, |¹⁸⁵ c’est assavoir la femme et amis charnelz ou temporelz et les richesses et enseignemens d’aultres affaires que, en leur vie, ont possidé ou le plus aymé, |¹⁸⁶ par lesquelles le diable tres fort vexe et travaille la personne a son diffinement, disant :

|¹⁸⁷ « O chetif, malleureux, tu relinques et delaisses tous les biens temporelz, lesquelz par plusieurs sollicitudes et tres grans labeurs sont assemblés. |¹⁸⁸ Aussi deslairas au dernier ta femme, tes enfans, tes cousins, parens et chiers amis et toutes aultres choses semblables de ce monde, |¹⁸⁹ dont te seroit grant soulas d’estre encores en leur compagnie et seroit a eulx occasion de grant bien et plaisir. »

|¹⁹⁰ Telles et semblables distructions, selon les affaires et conditions du pacient, l’ennemy, par stimulation d’avarice et couvoitise, repute a l’omme en ses extremes dernieretéz |¹⁹¹ affin que aussi, par l’amour et cupiditéz de ces choses terriennes, il le mette et destourne hors de l’amour et affection de Dieu et de son propre salut. |¹⁹² Dont singulierement est a noter que on doit garder tres chierement que on remambre au malade ses parens et amis temporelz et charnelz, femme, enfans, avoir ne aultres choses transitoires, |¹⁹³ fors de tant que sa santé spirituelle le requiert ou pourroit demander, veu que aultrement se seroit tres griefve et de trop grant peril, |¹⁹⁴ car, aussi, par telle commemoration ou souvenance seroit le malade enpeché et rapellé des choses spirituelles et solutaires |¹⁹⁵ aulx quelles lors, de toute vigeur et puissance ou par dedens et dehors, se fait a entendement cordial et seroit convertis de soy occuper a ses miserables choses temporelles et charnelles.

[bij v] |¹⁹⁶ Bonne inspiration de l’ange contre avarice.

|¹⁹⁷ Contre la tierce temptation du dyable donne l’ange bonne inspiration, disant :

|¹⁹⁸ « O homme, ne vueilles oÿr les maulvaises suggestions de l’ennemy, par lesquelles te peue lier et mocquer, |¹⁹⁹ pour quoy les choses temporelles du tout delaisses et mest au derrier. |²⁰⁰ Delesses desquelles la memoyre ou raysongnement ne te peut riens proffiter ou tourner a ton salut mais a grant empeschement et enconbrier d’icelluy. |²⁰¹ Si soyes memoratifz de la parolle de Nostre Seigneur, disant a ceux qui sont adonnéz et obstinéz a telles choses : |²⁰² « Cy fault il qu’il renonce a tout ce qu’il possede, il ne peult estre mon disciple. » |²⁰³ Et en oultre : |²⁰⁴  « Celluy, dist il, qui vient a moy et ne hais ses pere et mere, femme et enfans, freres et seurs, |²⁰⁵ encores en peult il estre mon disciple. » |²⁰⁶ Item, a ceulx qui renoncent a telles choses dist il : |²⁰⁷  « Celluy qui relinque et delaisses sa maison, freres, seurs, pere et mere et sa femme ou enfans ou ses heritages pour mon nom le double en recepvra et possidera la vie eternelle. » |²⁰⁸ Remembre toy aussi la povreté de Jhesucrist Nostre Saulveur en la croix pour toy pendant, |²⁰⁹ sa tres sainte benigne Mere et ses tres chiers disciples pour ton salut volontairement delaissent. |²¹⁰ Considere aussi que tant de sainctes et devotes personnes, en ceste renunciation et contempnement de biens et choses seculieres, ont ensuivy, dignes de avoir leur tres haulte remuneration : |²¹¹  « Venés, les benoitz de mon Pere. |²¹² Possidéz le regne celestiel qui vous est appareillés dés le commencement du monde. » |²¹³ Si, emprime ses choses en ton cueur et les transitoires toutellement deboute de hors de ton cueur comme venin |²¹⁴ et le mectz entierement a la voluntaire salutaire pouvreté |²¹⁵ et aussi, par la promesse precedente, le regne des cieux te sera donné et le obtiendras, |²¹⁶ disant Nostre Seigneur : |²¹⁷  « Bien heureux sont les pouvres d’esperit, |²¹⁸ car a eulx est le regne des cieux. » |²¹⁹ Et tu te commectz doncques plainement a Dieu, il te donra reppeulx et reichesses qui ne fauldront point. |²²⁰ Note que, quant le malade se sent [biij r] tempté par avarice et amour des choses terrienes, |²²¹ considere premier que celles affections font la persone separir et retraire de Dieu, |²²² car celle affection fourclust et restand l’amour de Dieu. |²²³ Pourtant, ayes parfaicte fiance en luy, tesmoingz saint Gregoire, qui dist |²²⁴ que « De tant est l’omme de l’amour supernelle eslongné de tant que les creatures prennent delectation et plaisance es choses terriennes ». |²²⁵ Secondement, pense que la spontaine et voluntaire pouvreté fait l’omme bien hereulx, le adroissant au ciel, |²²⁶ disant Nostre Seigneur : |²²⁷  « Bien heureux sont les pouvres d’esperit, |²²⁸ car, ainsi que dist est, a eulx est le royaulme des cieulx, etc. »

¹⁸⁴ Leçon non conservée : est (aprés charnelz) mq.
¹⁹² Leçon non conservée : singulierement et est
²⁰¹ Leçon non conservée : abstinez
²⁰² Leçon non conservée : a tour ce
²⁰³ Leçon non conservée : et (aprés moy) répété
²¹⁵ Leçon non conservée : regne du cieux
²¹⁷ Note : Matthieu, 5, 3
²²⁴ Note : Grégoire I^er, Homeliae in Evangelia, XXX
²²⁶ Leçon non conservée : a cieux est
²²⁷ Note : Matthieu, 5, 3