|²⁹⁸ Temptation du dyable de vaine gloire.

[bvj v] |²⁹⁹ Quintement, le dyable tempte l’omme malade ou mourissant par sa propre complacense, qui est orgueil spirituel, par la quel il est aux devotz, religieux et parfais plus infestes et molestans, |³⁰⁰ car il ne peult l’omme denoncer de la foy ou a desperation ou a impacience induire et actraire. |³⁰¹ Adoncques tempte il homme par sa propre complaisance, |³⁰² luy jectant au devant telles pensees :

|³⁰³ « O homme, comment tu es ferme en la foy ! |³⁰⁴ Comment tu es fors en esperance et com tu es constans et paciens en ta maladie ! |³⁰⁵ O quant moult des biens tu as faitz ! |³⁰⁶ Tres grandement tu dois avoir gloire, |³⁰⁷ car tu ne es point comme les aultres, qui ont perpetré innumerables maulx |³⁰⁸ et toutes voies, d’ung seul gemissement aux regnes des cieulx sont parvenus. |³⁰⁹ Pour quoy le regne des cieulx, de droit, ne te peult estre denyé ou escondue, |³¹⁰ car tu as loyaulement combatus pour tout prandre. |³¹¹ La couronne qui t’est appareillé et le plus hault et excellent siege devant les aultres tu obtendras. » |³¹² Par telle et semblables choses, le diable instamment labeure de mectre l’omme a spirituelle orgueil ou a sa propre complaisance. |³¹³ Pour quoy est a noter premierement car par tel l’omme resemble au diable, |³¹⁴ car par tel orgueil il ce fait d’ange diable. |³¹⁵ Secondement, car par orgueil appert que l’omme commect et fait blaisme a Dieu par ce que, le bien qu’il a de Dieu, le presume avoir de luy mesmes. |³¹⁶ Tiercement, que si grande porroit estre sa complaisance que par icelle seullement seroit dampnés. |³¹⁷ Dont dist saint Gregoire : |³¹⁸  « Se aulcun remembre le bien qu’il a fait, de luy mesmes s’en eslieve, devers l’auteur de humilité en chiet et tresbouche. »

|³¹⁹ Bonne inspiration de l’ange contre vaine gloire.

[bvij v] |³²⁰ Contre la quinte temptation de l’ennemy l’ange donne bone inspiration disant : |³²¹ « Meschant miserable, pour quoy te orgueilliz tu en arrogant et attribuant a toy mesmes constance de foy, esperance et pacience, laquelle toutesvoys seullement tu doibz attribuer a Dieu, |³²² car point de bien ou vertu n’as de toy mesmes, |³²³ disant Nostre Seigneur : |³²⁴  ‘Sans moy ne peulz riens faire’ ? |³²⁵ Et aultre part est escript : |³²⁶  ‘Tu ne doys quelque bien arroguer a toy. |³²⁷ Tu ne te vanteras point, |³²⁸ tu ne t’essauceras point par furte |³²⁹ ou impudentement esleveras. |³³⁰ Tu ne presumeras riens de toy.’ |³³¹ Et de rechief dist Notre Seigneur : |³³²  ‘Se vous ne devenés comme cestuy petit enfant, humbles, vous n’entreroy point ou royaulme des cieulx.’ |³³³ Pourtant, humilie toy, tu seras exalcéz, |³³⁴ come verifie Nostre Seigneur, disant : |³³⁵  ‘Qui se humilie sera exalcé.’ |³³⁶ Et saint Augustin dist : |³³⁷  ‘Si tu te humilie, Dieu descendra a toy. |³³⁸ Se tu eslieves et exalces, Dieu se partira a toy.’ |³³⁹ Tourne doncques ton couraige d’orgeulleuseté, laquelle jadiz transmuer fist et abismer le tres bel ange sur tous le tres plus lait et tres hideux diable |³⁴⁰ et le gecta de la haulteur des cieulx ou parfon d’enfer, laquelle aussi fut cause de tous pechés. |³⁴¹ Dont dit saint Bernard : |³⁴²  ‘Commencement de tout peché et cause de toute perdition est orgueil’, |³⁴³ disant oultre : |³⁴⁴  ‘Ostéz ce vice et sans paine tous aultres vices seront delaissés’. |³⁴⁵ Pour quoy est a noter singulierement que, quant le malade se sent tempté par orgueil, il doit premier pancer |³⁴⁶ que orgueil a tant despleu a Dieu que, a celle occasion, il banist et debouta au plus bas d’enfer le tres noble creature sur toutes, Lucifer, avecques tous ses adherens, a dampnation et exil perpetuellement.

²⁹⁸ Leçon non conservée : mq.
²⁹⁹ Leçon non conservée : complacens ; il est devotz aux r. ; et (aprés infestes)
³⁰⁵ Leçon non conservée : ne ses point
³⁰⁹ Leçon non conservée : tu es loyaulement
³¹¹ Leçon non conservée : obtendres
³¹⁶ Leçon non conservée : Tiercement qui si ; complaisance uqi par
³¹⁷ Leçon non conservée : auteur du h.
³¹⁸ Note : Grégoire I^er, Homeliae in Evangelia, IV, 1
³¹⁹ Leçon non conservée : Bonne esperance de
³²⁴ Note : Jonas, 15, 5
³²⁵ Leçon non conservée : arrogues ; vantiras ; impulentement
³²⁶ Note : Isidore de Séville, Synonyma, II, 21
³³² Note : Matthieu, 18, 3
³³⁵ Note : Matthieu, 23, 12; Luc, 18, 14
³³⁷ Note : Augustin, Enarrationes in Psalmos, XXXII, II, 23
³⁴² Note : Bernard de Clairvaux, Sermones in natali sancti Andreae, II, 7
³⁴⁴ Note : Opus imperfectum in Matthaeum, XLIII
³⁴⁵ Leçon non conservée : singulierement qui quant
³⁴⁶ Leçon non conservée : (pancer) qui orgueil ; deboute