|95 La seconde tempation nommee desesperation.
|96A cause que l’ennemy, estant comme le lion, tousjours serche comment il pourra la creature decepvoir, voiant que de foy il ne la peult decepvoir, |97 il se parforce de la mectre en desesperation, laquelle est peché irremissible procedant de maulvaise vie et faulte de foy, |98 et luy mect au devant tous les pechéz qu’il a faiz le temps passé et mal exposé sa vie, |99 comme dict le Saige, |100 et convient qu’i rende compte de toutes parolles oyseuses, dont aulcunes fois le faict desesperer |101 comme Caÿn et Judas et plusieurs aultres, lesquelz si sont dampnez, |102 et en aprés luy monstre les larrecins et oultraiges qu’ila faiz le temps passé, desquelz il n’a faict nulle emande, |103 car par ainsi le peché ne luy peult estre pardonné sans restitution, |104 et luy monstre encores les grans pugnitions que Dieu a faict le temps passé, |105 comme du deluge, [23v] de Sodome, de Datham et Abyrn, du roy Pharaon, de la seur de Moïse, |106 lesquelz ont estéz griefvement pugniz pour leurs pechéz, et ne sont point si grans, se luy semble, comme les siens.
|107 Aussurplus luy remonstre la briefveté du temps en disant qu’il est trop tard pour faire penitence |108 et qu’il n’est pas digne de soy monstrer devant Dieu, lequel plusieurs fois il a regnyé. |109 Et en aprés luy monstre ceulx que tant il a ayméz en ce monde, avecq lesquelz il a pechéz et courroussé Dieu, |110 et les biens mondains que par baratz il a acquis et convient que en douleur il les laisse sans emporter fors que peché et que de nul membre ne se peult ayder. |111 Si vouldroit desja estre mort |112 come appert en la figure cy devant, folio .vie., au dessus |113 de laquelle est l’ennemy luy remonstrant ceulx qu’il a ayméz ou monde. |114 Et, en apprés luy monstre ses pechéz par escript : |115 devant, les larrecins qu’il a faictz ; |116 de dessoubz, ceulx qu’i a despouilléz et battuz et faict extorcions. |117 Pour ses causes luy monstre l’ennemy une dague affin qu’i se desespere et tue.
|118 La seconde consolation nommee vraye esperance.
[24r] |119 Car, selon la doctrine des sainctz docteurs, la misericorde et grace du Createur est trop plus grande que la maulvaistié du pecheur, sans laquelle nul ne peult estre sauvé, |120 car le Createur, vray Pere debonnaire, ne laisse jamais son enfant s’il n’est sa grant faulte. |121 Pourtant remonstre l’ange a la creature que en la misericorde de Dieu il doit avoir fiance, |122 veu que c’est celle qui surmonte justice, sans laquelle nul bien ne pourroit estre. |123 Et, jaçoit se que la creature est pecheresse par foiblesse de nature, le Createur si est misericors, lequel a donné remede encontre tous pechéz par baptesme et penitence, |124 non obstant que nous ne pourrions de nous mesmes, sans son ayde, estre delivréz de noz ennemys. |125 Jaçoit se qu’il est venu pour saulver les pecheurs en communicquant avec eulx et souffrir passion, |126 sy debvons avoir esperance que de sa grace aurons remission veu que pour nous a voulu mourir |127 et, nonbstant que nous faisons tard penitence, il ne regarde point le bien que nous faisons si nous n’avons dont nous puissions satisfaire. |128 Il suffit tant seullement la voulenté, [24v] car Dieu regarde le cueur et non pas l’œuvre. |129 Pourtant dit il luy mesme : |130 « En l’eure que le pecheur ses pechéz plourer vouldra, de ses iniquitéz il ne me souvendra, |131 car je ne suis pas venu pour appeler les bons mais pour demander les pecheurs et felons. » |132 Et, non obstant que Caÿn et Judas par leurs pechéz si ayant esté dampnéz, se fut faulte de demander la misericorde du Createur, |133 car nous voyons, comme il appert en la figure cy devant, folio .viie., |134 comme le larron qui jamais bien n’avoit faict, a l’heure de la mort Dieu luy pardonna |135 et la Magdaleine, dont les sept pechéz gecta, |136 et a sainct Pierre, qui trois fois le regnia, |137 et a sainct Pol, qui sa loy persecutoit, auquel il revela toute sa doctrine et foy chrestiene.
97 Leçon non conservée : inremissible
98 Note : Référence non identifiée
100 Leçon non conservée : aulcuneffois
126 Note : Entre remission et veu, de biffé