|¹⁸³ La quart temptation dyabolique, nomee fole presumption et vaine gloire.

|¹⁸⁴L’ennemy de nature humaine veant que par impatience ne peult avoir la creature et mesment d’icelle qui a bien vescu en ce monde et fort resisté contre luy – |¹⁸⁵ comme dit le Psalmiste : « Les tribulations [27r] des justes si sont merveilleuses » – |¹⁸⁶ pourtant il se parforce de la decepvoir comme le scorpion qui premier monstre doulceur et a la fin picque la creature, dont il meurt, |¹⁸⁷ car il mect au devant les biens faictz en ce monde et que l’on fera aprés luy, dont il sera saulvé |¹⁸⁸ veu qu’il est chrestien et aulcunement a gardé les commandemens de Dieu et, si n’a esté si parfaict comme les sainctz, se n’a pas esté sa faulte, |¹⁸⁹ car Dieu ne luy avoit point faict tant de grace de la sanctiffier ou ventre de sa mere |¹⁹⁰ comme sainct Jehan Baptiste et plusieurs aultres, |¹⁹¹ et Dieu ne demande fors le pouvoir de l’homme.

|¹⁹² Et luy mect en aprés les afflictions et injures qu’il a souffert en sa vie, dont il n’a point esté remuneré. |¹⁹³ Pourtant, il fault que en l’aultre monde il soit saulvé, |¹⁹⁴ veu que aultre merite nous n’avons aprés la mort fors que paradis. |¹⁹⁵ Et, en oultre, il a receu les sacremens de saincte Eglise et meurt en la foy chrestienne qui est chemin de paradis. |¹⁹⁶ Pourtant le doit il avoir. |¹⁹⁷ Et, par ainsi, il chet en vaine gloire et pert tous les biens qu’il a faictz. |¹⁹⁸ Encoires luy mect y au devant fol espoir de longuement vi[27v]vre et amander sa vie |¹⁹⁹ et, non obstant qu’i soit malade, ja aultres fois est eschappee de telle malade |²⁰⁰ et, se il convient qu’i meure d’icelle, aussi il sera saulvé, |²⁰¹ veu qu’i crie mercy a Dieu et a plus faict de bien que le larron a qui Dieu pardonna et que les petitz enfans lesquels pour le baptesme sont saulvéz. |²⁰² Et encoire aprés sa mort on priera Dieu pour luy, car Dieu ne refuse point sa creature mais reçoit les pecheurs. |²⁰³ Il le doit recepvoir en la gloire eternelle. |²⁰⁴ Et cecy est manifesté par la figure cy devant, folio .xiie., |²⁰⁵ et comment l’ennemy luy presente trois couronnes : |²⁰⁶ la premiere vers le cueur, luy disant qu’il est chrestien ; |²⁰⁷ la seconde luy disant qu’il a plus faict de biens que les petitz enfans ; |²⁰⁸ la tierce, qu’il est riche et n’a faict tort a nully, dont l’on priera pour luy ; |²⁰⁹ et au dessus luy monstre Dieu, qu’il a saulvé ceulx qui esoient au limbe et a esleu plusieurs sainctz qui sans nulle douleur sont en paradis.

|²¹⁰ La quarte consolation angelicque, nommee humilité.

|²¹¹ La cause que nous summes pas souf[28r]fisans de nous mesmes de faire aulcum bien sans la grace du Createur doit avoir esperance d’estre saulvé, |²¹² veu qu’i n’a besoing de nostre service et que sans luy ne pouvons estre, |²¹³ et aussy les biens que nous faisons, lesquelx sont corruptibles, c’est par la grace qu’i nous a donnee, |²¹⁴ car tout bien part de luy et la joye que nous actendons est eternelle et incorruptible. |²¹⁵ Sy ne la pouvons acquerir sinon par sa grace et nostre humilité, |²¹⁶ car il ne exçaulce fors que les humbles et ceulx qui sont sans peché, |²¹⁷ car nulle ordure ne habite en paradis. |²¹⁸ Et tant de fois nous commectons peché dont peu de penitence faisons, |²¹⁹ car nous ne pourrions satisfaire a Dieu les grans offences que contre luy faisons, veu qu’i est eternel et nous corruptibles ! |²²⁰ Et l’ennemy mect tant de latz contre la creature que a grant peine les parfaictz peuvent eschapper, |²²¹ veu que ce monde est une mer plaine de dangier et nature humaine de soy mesme est incline a peché, |²²² comme il appert en la vie sainct Anthoine. |²²³ Pourtant [28v] dit le Saige |²²⁴ que l’homme ne scet point se il doit estre saulvé ou dampné |²²⁵ et, sy l’on mect au devant que il a receu les sacremens, par adventure il n’en estoit pas digne parfaictement, car nul n’est parfaict que Dieu. |²²⁶ Et ne souffist pas les biens que l’on fera aprés luy, car il les donne pour ce qu’i ne les en peult pourter. |²²⁷ Si en aura peu de merite. |²²⁸ Et, se il a souffert des tribulations, si est pour ses pechéz |²²⁹ et, non obstant que le larron si aist esté saulvé, ce fut pour ce que ce jour Nostre Seigneur souffrit mort et passion et lors demonstra sa grant misericorde. |²³⁰ Mais nul en telle maniere n’a esté saulvé, car peu de gens sont eslevéz pour la gloire eternelle, |²³¹ comme il appert en la figure cy devant, folio .xiiie., en laquelle a trois anges : |²³² le premier luy dict que a griefve peine le juste sera saulvé par grace de Dieu ; |²³³ le second luy monstre la divinité eternelle et Nostre Dame rendant graces de sa salvation et a l’aultre main luy monstre plusieurs qui semblent estre bons en faisant plusieurs biens, |²³⁴ qui sont estéz dampnéz, qui se glorifoient des biens qu’ilz avoient [29r] faiz ; |²³⁵ le tiers monstre sainct Anthoine, qui des dyables a eu plusieurs persecutions et n’a peu eschapper fors que par humilité.

¹⁸⁴ Leçon non conservée : resister
²⁰⁰ Leçon non conservée : enfans lequel pour
²¹⁰ Leçon non conservée : nomme
²²³ Note : Référence non identifiée.