|¹⁸⁴ Tiercement, le dyable tempte l’enferme par impacience

qui se fait souvent par grande maladie, disant :

|¹⁸⁵ « Pour quoi tu seuffres cest tres grand doleur qui est intollerable a toutes creature et a toy du tout inutile ? |¹⁸⁶ Ne aussi par tes demerites tel douleur par droit se devroit causer en toy, |¹⁸⁷ car il est escript |¹⁸⁸ que ‘Es paines, la plus benigne interpretacion se doit faire’. |¹⁸⁹ Aussi t’est chose moult grieve que nulz n’a compassion de toy, ce que sans doubte se fait contre raison. |¹⁹⁰ Et, ja soit que tes amis te peullent complaindre de bouche, toutefois principalement pour tes biens a eulx relinquir desirent de ceur ta mort. |¹⁹¹ Mais, ton ame vuydie de ton corps, a grand paine par l’espace d’un jour, pour tout ton avoir a eulx delaissié, veulent herbergier ton corps. »

|¹⁹² De telles choses et semblables, a impacience, qui est contre carité, |¹⁹³ de la quelle summes tenus Dieu amer sur toutes choses, le dyable s’efforse de atraire l’omme qu’ensi perde ses merites et souffrance. |¹⁹⁴ Noter est que aux morissants tres grand doleur de corps advient, |¹⁹⁵ meïsmement a ceulz qui n’ont de mort naturele, la quelle se fait pau souvent, |¹⁹⁶ ensi come l’enseigne experience manifeste, |¹⁹⁷ mais tres souvent par accident, soit de fievre, d’aposteme ou d’autre maladie grieve et afflictueuse et longue |¹⁹⁸ qui aux gens sourvient dont dissolver et morir seulent. |¹⁹⁹ La quelle maladie plusieurs, et par especial les plus indisposéz a la mort et envis morans, |²⁰⁰ les fait en tant impaciens et murmurans |²⁰¹ que tres souvent par trop doleur et impacience samblent dervéz et hors du sens, |²⁰² come de plusieurs personnes est apparu. |²⁰³ Par quoi se fait assavoir evidanment que tellez personnes defalent de vraie carité, |²⁰⁴ tesmoing saint Jherome, qui dit : |²⁰⁵  « Se aucuns a douleur et trop enuis mort seuffre ou enceurt, c’est signe qu’il n’aime point souffisaument Dieu. » |²⁰⁶ Et ad ce dit saint Pol : |²⁰⁷  « Carité est paciente, benigne, souffrante, et cetera. », en toute humilité et fiance en Dieu.

[14 r] |²⁰⁸ Bonne inspiracion par l’ange de pacience.

|²⁰⁹ Contre iij^e temptacion du dyable donne l’ange bonne inspiracion, disant : |²¹⁰ « O homme, tourne d’impacience ton coraige, par la quelle impacience le dyable par ses mortiferes instigacions autre chose ne quiert que le detriment et perdicion de ton ame, |²¹¹ car par impacience et murmuracion l’ame se deperd come par pacience elle est possedee et saulvee, |²¹² tesmoing saint Gregorius, qui dit : |²¹³  ‘Nul murmurant entre le royaume des cieulx.’ |²¹⁴ pour quoi dont, de ceste ta maladie, la quelle au regard de tes demerites est legiere, ne t’anoye, |²¹⁵ pourtant qu’elle devant ta mort t’est come purgatoire quant elle est toleree et soufferte come il le convient, |²¹⁶ c’est assavoir pacianment et voulentiers en gratuité, |²¹⁷ car non seulement besoingz est de gratuité es choses qui sont de consolacion |²¹⁸ mais aussi es choses qui sont d’affliction, |²¹⁹ car ensi que dit saint Gregoire : |²²⁰ ‘Misericordement Dieu baille temporele severité et maladie afin qu’il ne baille pugnicion eternelle.’ |²²¹ Et saint Augustin aussi dit : |²²²  ‘Sire, icy brulle, icy trenche affin que eternellement tu me donnes.’ |²²³ Nulles donques tribulacions te pertroublent, car il monstrent que Jhesucrist ne te veult relinquir, |²²⁴ ensivant que script saint Augustin et Gregoire : |²²⁵  ‘Les maulx qui si nous pressent nous constraingnent d’aler a Dieu.’ |²²⁶ Pourtant le salut de l’ame ne s’appreuve en la complaisance de la char mais ainchois l’eternele damnacion. |²²⁷ Come dit saint Augustin : |²²⁸  ‘Signe manifeste de dampnacion est d’optenir ses plaisirs et d’estre améz du monde.’ |²²⁹ Et de rechief : |²³⁰  ‘Il est, dist il, merveille que a tous ceulx qui sont a dampner en infer tous cailleaus ne s’eslievent a leur solaz |²³¹ mais merveille est que a tous que sont a saulver eternellement toutes pierres ne s’eslievent en leur peril.’ |²³² Oste dont de toy impacience come venimeuse pestilence |²³³ et emprendz le tres fort escu de pacience dont tous les enemis de l’ame sont facilement superéz |²³⁴ et regarde Jhesucrist le tres pacient et tous les sains jusques a la mort. |²³⁵ Et note, quant l’enferme se sent tempter par impacience, premiers considere quom nocive est impacience, |²³⁶ car, inquietant et pertourbant l’enferme, le averte et destourne de Dieu, |²³⁷ qui dist : ‘Sur qui reposera mon esperit se non sur l’humble et paisible de ceur ?’ |²³⁸ Secondement, pense que pacience est bien sollicitement a conserver premiers, car elle est moult necessaire, |²³⁹ dont l’Apostle dit : |²⁴⁰  ‘Pacience vous est necessaire.’ |²⁴¹ Et Nostre Seigneur dit : |²⁴²  ‘Voirment ne falloit il point que Cristus souffrist et ensi entrer en sa gloire ?’ |²⁴³ Et saint Gregorius : |²⁴⁴  ‘Jamais ne peult estre servee concorde que par pacience.’ |²⁴⁵ Secondement car elle est tres utile, |²⁴⁶ disant Nostre Seigneur : |²⁴⁷  ‘En vostre pacience possedréz vos ames.’ |²⁴⁸ Et saint Greogrius : |²⁴⁹  ‘C’est chose de meilleur merite tolerer adversité que d’entendre et insuder aux bonnes oepvres.’ |²⁵⁰ Item le dit Gregorius : |²⁵¹  ‘Sans fer pourons estre martirs se vraiement servons pacience en notre coraige.’ |²⁵² Et Salomon dit : |²⁵³  ‘Le pacient est meilleur que le fort homme |²⁵⁴ et qui domine et maistrie son coraige que l’expugnateur ou conquesteur des villes et citéz.’

¹⁸⁴ Leçon non conservée : par grandi maladie
¹⁸⁸ Note : Boniface VIII, De Regulis Juris, 49
¹⁸⁹ Leçon non conservée : se fuit contre
¹⁹² Leçon non conservée : et samblens a ; seffortse daetraire
¹⁹⁴ Leçon non conservée : qui non de
²⁰⁵ Note : Référence à Jérôme non identifiée (parfois attribuée à Jean).
²⁰⁶ Leçon non conservée : pacience ; et France en
²⁰⁷ Note : Paul, 1^re Épitre aux Corinthiens, 13, 4
²¹³ Note : Grégoire I^er, Homeliae in Evangelia, XIX
²²⁰ Leçon non conservée : purgnicion – Note : Grégoire I^er, Homeliae in Evangelia, XIX
²²² Note : Augustin, Enarrationes in Psalmos, XXXIII, II, 20
²²³ Leçon non conservée : te (aprés tribulacions) mq.
²²⁵ Note : Grégoire I^er, Moralia in Job, XXVI, 24
²²⁷ Leçon non conservée : et desert amez
²²⁸ Note : Pseudo-Eusebius Cremonensis, De morte Hieronymi ad Damasum, XXV
²²⁹ Leçon non conservée : dist Iil m. ; coilleaus
²³⁰ Note : Pseudo-Eusebius Cremonensis, De morte Hieronymi ad Damasum, XXV
²³² Leçon non conservée : fort esait de p. tont tous
²³⁷ Leçon non conservée : dist sui qui ; le lumble et – Note : Ésaïe, 66, 1-2
²⁴⁰ Note : Paul, Épitre aux Hébreux, 10, 36
²⁴¹ Leçon non conservée : falloit Il p.
²⁴² Note : Luc, 24, 26
²⁴⁴ Note : Grégoire I^er, Moralia in Job, XXI, xxi, 33
²⁴⁷ Note : Luc, 21, 19
²⁴⁸ Leçon non conservée : oepvers
²⁴⁹ Note : Grégoire I^er, Homeliae in Evangelia, II, XXXV, 7
²⁵¹ Note : Grégoire I^er, Homeliae in Evangelia, II, XXXV, 7
²⁵³ Note : Proverbes, 16, 32