[16r]

|²⁵⁵ Temptacion du dyable par vaine gloire.

|²⁵⁶ Quartement, le dyable tempte l’omme malade ou morissant par sa propre complacence qui est orgueil spirituel, par lequel il est, aux devoz, aux religieus et parfais, plus infestes et molestant, |²⁵⁷ car, quant il ne peut l’omme desvoier de la foy ou a desperacion ou inpacience induire et attraire, |²⁵⁸ adont l’assaut il par sa propre complaisance, |²⁵⁹ lui jettant ou devant telles pensees :

|²⁶⁰ « O quom ferme es tu en la foy, |²⁶¹ quom fors en esperance |²⁶² et quom constans et pacient en ta maladie ! |²⁶³ O quom moult de biens tu as fait ! |²⁶⁴ Tres grandement dois glorier, |²⁶⁵ car tu n’es point come les autres, qui ont perpetré innumerables maulx |²⁶⁶ et toutefois, d’un seul gemissement, aux regnes des cieulz sont parvenus. |²⁶⁷ Pour quoi le regne des cieulx, de droit, ne te peut estre devyet ou escondit, |²⁶⁸ car vous estes loyomment combatus. |²⁶⁹ Pourtant, prendz la couronne qui t’est appareillee et le plus haut et excellent siege devant les autres vous obtendréz. » |²⁷⁰ Par telles et semblables choses, le dyable instaument labeure d’induire l’omme a spirituel orgueil ou a sa propre complaissance.

|²⁷¹ Pour quoy est a noter que cest orgueil fait moult a eviter. |²⁷² Premiers, car par ce l’omme ressamble au dyable, |²⁷³ car par seul orgueil il s’est fait d’ange dyable. |²⁷⁴ Secondement, car par orgueil appert que l’omme commet et fait blasfeme par ce que, le bien qu’il a de Dieu, le presume d’avoir de lui meismes. |²⁷⁵ Tiercement, tant et telle pourroit estre sa complacense que par et pour icelle seulement seroit dampnéz. |²⁷⁶ Dont dit saint Gregore : |²⁷⁷  « S’aucuns, ramembrant le bien qu’il a fait, devers luy meymes s’en eslieve, devers l’aucteur d’humilité en chiet et tresbuche. » |²⁷⁸ Et saint Augustin dit : |²⁷⁹  « Se l’omme se justiffie meymes et presume de sa justice et droiture, il decline et cheant traverse. » |²⁸⁰ Si doit on cremir bonciement la divine droiture et temperer cremeur par espoir et fiance en Dieu de sa tres douce misericorde.

[18r] |²⁸¹ Bonne inspiracion de l’ange contre vaine glore.

|²⁸² Contre la quarte temptacion de l’ennemi l’ange donne bonne inspiracion, dissant : |²⁸³ « Meschans, miserable, pour quoi te enorgueilis tu, arrogant, attribuant a toi meymes constance de foy, esperance et pacience, la quelle toute fois seulement dois attribuer a Dieu ? |²⁸⁴ Car riens de bien ou vertu n’as de toy mymes, |²⁸⁵ dissant Nostre Seigneur : |²⁸⁶  ‘Sans moy ne poés riens faire.’ |²⁸⁷ Et autre part est escript : |²⁸⁸  ‘Tu ne dois quelque bien arroguier a toy. |²⁸⁹ Tu ne te venteraz point. |²⁹⁰ Tu ne te eshauceras par fierté ou insolentement esleveras. |²⁹¹ Tu ne presumeras riens de toy.’ |²⁹² Et de rechief dit Nostre Seigneur : |²⁹³  ‘Se vous ne devenéz come cestui petit enfant humbles et purains, vous n’enteréz point ou royaume des cieulz.’ |²⁹⁴ Pourtant, humilie toy et vous seréz exaltéz, |²⁹⁵ comme verifie Nostre Seigneur disant : |²⁹⁶  ‘Qui se humilie exaltéz sera.’ |²⁹⁷ Et saint Augustin : |²⁹⁸  ‘Se tu te humilieez, Dieu descendera a toy. |²⁹⁹ Se tu te eslieves et exaltes, Dieu se partra de toy.’ |³⁰⁰ Tourne doncques ton coraige d’orguelleuseté, la quelle jadis transmua et fist Lucifer, le tres bel ange, sur tous les tres plus lait et tres hydeus dyable |³⁰¹ et le jetta del hautain des cieulz ou parfond d’enfer, la quelle aussi fu cause de tous pechiés. |³⁰² Dont dit saint Bernard : |³⁰³  ‘ Comencement de tout pechié et cause de toute perdicion est orgueil’. |³⁰⁴ Disant oultre : |³⁰⁵  ‘Ostéz cest vice et sans paine tous autres vices seront resechiés et delaissiés.’ |³⁰⁶ Pour quoy est a noter singlierement que, quant le moritur se sent tempter par orgueil, il doit premiers penser |³⁰⁷ que orgueil en tant a displeü a Dieu que, a celle seule occasion, il bannist et debouta au plus baz d’enfert la plus tres noble creature sur toutes, Lucifer, avec tous ses adherens, le dampnant en exil perpetuellement, et cetera. |³⁰⁸ Et ensi, par telle consideration, se humilliera et abaissera, rapensant ses pechiés, |³⁰⁹ car il ne scet s’il est digne de hayine ou d’amour. |³¹⁰ Dont doit principaument prenre exemple a saint Anthoine, a qui le dyable dist : |³¹¹ ‘O Anthoine, tu m’az vaincu : |³¹² quant je te veul essaucher, tu te deprimes et ravales |³¹³ et, quant je te veul deprimer et abasser, t’eslieves.’ |³¹⁴ Secundement doit penser qui humilitéz en tant a pleü a Dieu que principaument a l’occasion d’icelle la glorieuse Vierge Marie concheupt Dieu et au dessus des chœurs et throne des anges est exaltee et eslevee.

²⁵⁷ Leçon non conservée : desvoir
²⁵⁸ Leçon non conservée : lassaut il lomme par
²⁶⁷ Leçon non conservée : des ceulx de ; devyer
²⁷⁷ Note : Grégoire I^er, Homeliae in Evangelia, IV, 1
²⁷⁹ Note : Augustin, Enarrationes in Psalmos, XXI, II, 2
²⁸³ Leçon non conservée : attribuat ; constane ; selement est dois
²⁸⁶ Note : Jonas, 15, 5
²⁸⁷ Leçon non conservée : te eshaucons par
²⁸⁸ Note : Isidore de Séville, Synonyma, II, 21
²⁹³ Note : Matthieu, 18, 3
²⁹⁴ Leçon non conservée : serez exatez ; se huillie ; sera mq.
²⁹⁶ Note : Matthieu, 23, 12; Luc, 14, 11; Luc, 18, 14
²⁹⁸ Note : Augustin, Enarrationes in Psalmos, XXXII, II, 23
³⁰¹ Leçon non conservée : hautoin
³⁰³ Note : Bernard de Clairvaux, Sermones in natali sancti Andreae, II, 7
³⁰⁵ Note : Opus imperfectum in Matthaeum, XLIII
³⁰⁷ Leçon non conservée : de bauta
³⁰⁸ Leçon non conservée : ab aispera
³¹¹ Leçon non conservée : anthoine ta maz ; veul ossancher tu – Note : Référence à Antoine partagée par la plupart des textes mais non identifiée.
³¹⁴ Leçon non conservée : a (aprés principaument) mq.